សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការជំរុញទេសចរណ៍ក្នុងស្រុក គឺជាសសរស្តម្ភដ៏មានសារៈសំខាន់មួយក្នុងការជួយទ្រទ្រង់សេដ្ឋកិច្ចជាតិ និងពង្រឹងភាពធន់វិស័យទេសចរណ៍កម្ពុជា ជាក់ស្ដែង ទេសចរជាតិ បាននិងកំពុងដើរតួនាទីសំខាន់ក្នុងការគាំទ្រដល់កំណើនសេដ្ឋកិច្ចក្នុងស្រុក បង្កើតការងារ និងលើកកម្ពស់ជីវភាពរបស់ប្រជាពលរដ្ឋ។
វិស័យទេសចរណ៍កម្ពុជា បានបង្ហាញសញ្ញាយ៉ាងល្អប្រសើរក្នុងឆ្នាំ ២០២៦ នេះ ជាក់ស្ដែង ចំនួនភ្ញៀវទេសចរជាតិដើរកម្សាន្តក្នុងស្រុក បានកើនឡើងដល់ជាង ២០ លាននាក់ ក្នុងរយៈពេល ៥ ខែដំបូង ឆ្នាំ២០២៦ ស្មើនឹងកំណើន ៥៤,២ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍ពីក្រសួងទេសចរណ៍។
កំណើនទេសចរជាតិជាង ២០,៣ លាននាក់ក្នុងរយៈពេលត្រឹមតែ ៥ ខែនេះ ត្រូវបានចាត់ទុកថា ជានិន្នាការវិជ្ជមានថ្មីមួយដ៏ល្អប្រសើរ និងបង្ហាញពីភាពរឹងមាំនៃទីផ្សារទេសចរណ៍ក្នុងស្រុក ដែលកំពុងដើរតួនាទីសំខាន់ក្នុងការគាំទ្រកំណើនសេដ្ឋកិច្ច បង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋនៅតាមសហគមន៍ទេសចរណ៍ទូទាំងប្រទេស។
ឯកឧត្តម ហួត ហាក់ មានប្រសាសន៍ថា ការជំរុញទេសចរណ៍ក្នុងស្រុក ត្រូវបានចាត់ទុកជាសសរស្តម្ភដ៏មានសារៈសំខាន់មួយក្នុងការទ្រទ្រង់ និងពង្រឹងភាពធន់វិស័យទេសចរណ៍កម្ពុជា តាមរយៈការអនុវត្តយុទ្ធនាការ «ទស្សនាកម្ពុជានៅរដូវកាលបៃតង» និង ស្របតាមទស្សនាទាន «ស្រលាញ់ជាតិ ត្រូវស្គាល់ទឹកដី» និង «ទេសចរណ៍ ផ្សារភ្ជាប់ទឹកដី»។
ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានថ្លែងបែបនេះ នាឱកាសអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយ របាយការណ៍លទ្ធផលនៃការវាយតម្លៃបញ្ចប់អាណត្តិ នៃការអនុវត្តផែនការអភិវឌ្ឍន៍ទេសចរណ៍បច្ចុប្បន្នកម្ម ឆ្នាំ ២០២១-២០២៥ រាជធានី ខេត្ត កាលពីដើមខែកក្កដា កន្លងទៅនេះ។
ក្នុងឱកាសនោះដែរ ឯកឧត្តមរដ្ឋមន្រ្តី ក៏បានដាក់ចេញនូវអនុសាសន៍សំខាន់ៗ ដល់រដ្ឋបាលរាជធានី-ខេត្ត និងមន្ទីរទេសចរណ៍ទាំងអស់ ឱ្យបន្តយកចិត្តទុកដាក់លើការអនុវត្តគោលការណ៍ណែនាំស្តីពីការរៀបចំផែនការអភិវឌ្ឍន៍ទេសចរណ៍រាជធានី ខេត្ត ប្រកបដោយស្មារតីទទួលខុសត្រូវខ្ពស់, ពង្រឹងការផ្សព្វផ្សាយគោលដៅទេសចរណ៍របស់ខ្លួនឱ្យបានទូលំទូលាយ, កំណត់ម៉ាកសញ្ញា (Branding) របស់រាជធានី ខេត្ត, បង្កើតការនិទានរឿង (Storytelling) អំពីគោលដៅទេសចរណ៍, និងកំណត់ម្ហូបអាហារអត្តសញ្ញាណប្រចាំខេត្ត និង តំបន់(Signature Dish)។
ដោយឡែកក្នុងពេលស្ថានភាពទេសចរអន្តរជាតិនៅក្នុងប្រទេសកម្ពុជាមានការថមថយ ទាំងវិស័យរដ្ឋ និងឯកជន មិននៅស្ងៀមនោះឡើយ ដោយបានខិតខំស្វះស្វែងរកដំណោះស្រាយ ធ្វើយ៉ាងណាអាចជំរុញទេសចរក្នុងស្រុក បង្កើនសកម្មភាព ធ្វើដំណើរកម្សាន្តឱ្យច្រើន និងស្នាក់នៅរយៈពេលយូរជាងមុន ដើម្បីអាចជំនួសទេសចរបរទេសបានមួយផ្នែក និងជ្រោមជ្រែងវិស័យនេះឱ្យបានប្រសើរ។
ឯកឧត្តម ស៊ីន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ប្រាប់បណ្ដាញព័ត៌មាន AMS ឱ្យដឹងថា បន្ទាប់ពីមើលឃើញស្ថានភាពទេសចរអន្តរជាតិថមថយក្នុងរយៈពេលប៉ុន្មានខែដើមឆ្នាំនេះ ក្រោមឥទ្ធិពលនៃបញ្ហាសង្គ្រាមនៅតំបន់មជ្ឈិមបូព៌ា និងកត្តាសេដ្ឋកិច្ចពិភពលោកមិនប្រាកដប្រជា ទាំងវិស័យរដ្ឋ និងឯកជន មិននៅស្ងៀមនោះទេ ហើយក៏មិនមែនមិនខ្វល់ខ្វាយដែរ ពោលគឺសហការរួមគ្នា ស្វែងរកដំណោះស្រាយ ដើម្បីរកច្រកចេញ និងជំរុញវិស័យទេសចរណ៍កម្ពុជាឱ្យនៅតែមានភាពប្រសើរ និងបន្តចូលរួមជំរុញកំណើនសេដ្ឋកិច្ចជាតិ។
បច្ចុប្បន្ននេះ តួអង្គពាក់ព័ន្ធទាំងអស់ ដូចជា ក្រសួងទេសចរណ៍ រដ្ឋលេខាធិការដ្ឋានអាកាសចរណ៍ស៊ីវិល ក្រសួងសេដ្ឋកិច្ច និងហិរញ្ញវត្ថុ និងវិស័យឯកជនដែលពាក់ព័ន្ធនឹងវិស័យទេសចរណ៍ កំពុងរួមគ្នាធ្វើកិច្ចការងារដើម្បីបង្កើនភាពទាក់ទាញទេសចរក្នុងស្រុក ដោយនឹងបង្កើតផលិតផលទេសចរណ៍ថ្មីៗ ធ្វើយ៉ាងណាឱ្យភ្ញៀវទេសចរក្នុងស្រុកធ្វើដំណើរកម្សាន្តបានច្រើន និងស្នាក់នៅតំបន់ទេសចរណ៍ បានយូរជាងមុន។
ឯកឧត្តម ស៊ីន ចាន់សេរីវុត្ថា បានបន្ថែមថា ៖
“ពាក់ព័ន្ធនឹងវិស័យអាកាសចរណ៍ ឃើញថាមានក្រុមហ៊ុនអាកាសចរណ៍ក្នុងស្រុកបានបង្កើតជើងហោះហើរថ្មីៗទៅកាន់អាកាសយានដ្ឋានក្នុងស្រុក ដូចជា ពីភ្នំពេញទៅសៀមរាប ភ្នំពេញទៅអាកាសយានដ្ឋានតារាសាគរខេត្តកោះកុង ទៅអាកាសយានដ្ឋានខេត្តព្រះសីហនុ ដើម្បីឱ្យភ្ញៀវទេសចរដែលចង់ធ្វើដំណើរតាមផ្លូវអាកាស អាចសាកល្បងក្នុងការធ្វើដំណើរតាមផ្លូវអាកាស ប៉ុន្តែដោយសារតែពេលនេះ វាជារដូវកាលបៃតង ការធ្វើដំណើរតាមផ្លូវអាកាសក្នុងប្រទេសកម្ពុជាមិនសូវជាមមាញឹកទេ ប៉ុន្តែរំពឹងថា ពេលចប់រដូវបៃតង នឹងមានភ្ញៀវទេសចរក្នុងស្រុកក៏ដូចជាអន្តរជាតិក្នុងប្រទេសធ្វើដំណើរតាមផ្លូវអាកាសច្រើន។”
លោក ហូ វណ្ឌី ទីប្រឹក្សាសមាគមទេសចរណ៍កម្ពុជាបានមានប្រសាសន៍ថា បន្ទាប់ពីសង្កេតឃើញនិន្នាការនៃចំនួនទេសចរអន្តរជាតិនៅកម្ពុជាមានការថមថយគួរឱ្យកត់សម្គាល់ សមាគមជំនាញ បានប្រជុំរកដំណោះស្រាយ ដើម្បីជំរុញទេសចរក្នុងស្រុក ជាពិសេសក្នុងរដូវបៃតងនាពេលនេះ។ ពាក់ព័ន្ធនឹងកិច្ចការនេះ ប្រតិបត្តិករទេសចរណ៍ បានស្នើសុំអាជ្ញាធរដែនដី ពិសេសនៅតំបន់ដែលមានរមណីយដ្ឋានប្រវត្តិសាស្ត្រ និងរមណីយដ្ឋានធម្មជាតិ ដូចជាតំបន់អេកូទេសចរណ៍ និងកសិ-អេកូទេសចរណ៍ រៀបចំទីតាំងនៅតំបន់នោះឱ្យមានភាពទាក់ទាញជាងមុន និងរៀបចំផ្ដល់សេវាកម្មទេសចរណ៍ប្រកបដោយគុណភាព។ អ្វីដែលពិសេសនោះ បានស្នើសុំឱ្យអាជ្ញាធរដែនដីក្នុងមូលដ្ឋានត្រូវធានាឱ្យបានថា អ្នកផ្ដល់សេវាកម្មនៅតំបន់ទាំងនោះ មានសីលធម៌ ស្មោះត្រង់ រួសរាយ និងមិនគេងចំណេញលើតម្លៃផលិតផល និងសេវាទេសចរណ៍ឡើយ។
លោកបន្តថា ៖
“ទេសចរក្នុងស្រុក គឺជាចលករមួយដែលជំរុញឱ្យសេដ្ឋកិច្ចក្នុងគ្រួសារ សេដ្ឋកិច្ចក្នុងតំបន់ និងកំណើនសេដ្ឋកិច្ចជាតិទាំងមូលផងដែរ ដូច្នេះ បើសិនជាទេសចរក្នុងស្រុកដើរកម្សាន្តកាន់តែច្រើន នឹងធ្វើឱ្យខ្សែច្រវាក់សេវាកម្មទេសចរណ៍ក្នុងស្រុកកាន់តែកើនឡើងផងដែរបើទោះបីជាទេសចរបរទេសធ្លាក់ចុះក៏ដោយ។”
លោក ហូ វណ្ឌី បានបន្ថែមថា សម្រាប់សេវាកម្មដែលធ្លាប់ផ្ដល់ជូនភ្ញៀវទេសចរបរទេស ដូចជា សណ្ឋាគារ ភោជនីយដ្ឋាន ជាដើម ក៏ត្រូវកែលម្អតម្លៃ ដើម្បីតម្រូវជាមួយនឹងទេសចរក្នុងស្រុក ធ្វើយ៉ាងណាឱ្យមានចំណូល។ ក្រៅពីនេះ ក្រុមដឹកជញ្ជូន ក្រុមអាកាសចរណ៍ក្នុងស្រុក ក៏គួរតែមានការសិក្សាពីតម្លៃជាថ្មីសម្រាប់ការផ្ដល់សេវាកម្មជូនភ្ញៀវទេសចរក្នុងស្រុកផងដែរ។
លោកបញ្ជាក់ថា បើសិនជាចរន្តទេសចរណ៍ក្នុងស្រុកមានសកម្មភាពកាន់តែច្រើន នោះនឹងអាចធ្វើឱ្យវិស័យទេសចរណ៍នៅតែល្អប្រសើរ ហើយក៏អាចជំនួសទេសចរបរទេសដែលកំពុងធ្លាក់ចុះនេះបានមួយកម្រិតធំផងដែរ ។
យោងតាមរបាយការណ៍របស់ក្រសួងទេសចរណ៍កម្ពុជាបានឱ្យដឹងថា ក្នុងរយៈពេល ៥ ខែ ឆ្នាំ ២០២៦ នេះ កម្ពុជាទទួលបានភ្ញៀវទេសចរបរទេស សរុបចំនួន ១,៥៤ លាននាក់៕
Account
Security
Favourite Content