ក្រូចសើច ជាដំណាំមួយប្រភេទដែលគេដឹងជាទូទៅថា វាមានប្រយោជន៍ច្រើនទាំងវិស័យម្ហូបអាហារ និងប្រើជាឱសថបុរាណសម្រាប់ព្យាបាលជំងឺផ្សេងៗ ក៏ដូចជាថែរក្សាសម្រស់ស្បែកផងដែរ។ ជាមួយគ្នា ដើម្បីអាចទទួលបានទិន្នផលក្រូចសើចល្អ គេត្រូវយកចិត្តទុកដាក់លើកត្តាសំខាន់ៗមួយចំនួនដូចដែលជាបច្ចេកទេស ទាំងការដាំដុះ ការថែទាំ និងការប្រមូលផល។

អ្នកជំនាញផ្នែកកសិកម្មបានកត់ចំណាំថា ដើម្បីដាំក្រូចសើចបានផលល្អ ចំណុចមុនដំបូងដែលត្រូវយកចិត្តទុកដាក់គឺការជ្រើសរើសពូជ ពោលគឺកសិករដែលជាអ្នកដាំត្រូវរើសពូជណាមានប្រភពច្បាស់លាស់ ដើមរឹងមាំ ដែលគេអាចរកទិញបាននៅតាមកសិដ្ឋាន ឬកន្លែងលក់កូនឈើនានា។ ក្នុងការជ្រើសរើសពូជនេះផងដែរ គេក៏អាចទិញកូនក្រូចសើចដែលគេបំបៅរួចស្រាប់ៗ ឬអាចយកគ្រាប់ទៅបណ្ដុះសិនក៏បាន ប៉ុន្តែត្រូវចំណាយពេលយូរទើបអាចដាក់ដាំ។

បន្ទាប់ពីការជ្រើសរើសពូជហើយ ការលាយដីដើម្បីដាំក៏ជារឿងចាំបាច់ដូចគ្នា ដែលគេត្រូវលាយដីស្រែស្រទាប់ ៧០ភាគរយ អង្កាមដុត១០ភាគរយ លាយជាមួយស្លឹកឈើក្រៀមចិញ្ច្រាំឱ្យល្អិត ១០ភាគរយ លាយជាមួយលាមកសត្វ ១គីឡូក្រាម ក្នុងមួយគុម្ព និងលាយចូលគ្នាឱ្យសព្វទើបគេអាចទទួលបានដីដ៏មានជីជាតិសម្រាប់ដំណាំក្រូចសើចបាន។

ពាក់ព័ន្ធនឹងរបៀបដាំ កសិករត្រូវដាក់ដាំកូនក្រូចសើចដែលបានទិញហើយ ដោយដាក់យ៉ាងណាឱ្យដីនៅត្រឹមគល់របស់វា លុះដាំរួចត្រូវយកកំប្លោកមកគ្រប់គល់ដំណាំដើម្បីរក្សាសំណើម និងយកឈើទៅដោតហើយចងអបដើមក្រូចកុំឱ្យដួល។

បន្ទាប់ពីដាំកូនក្រូចរួចហើយ អ្នកដាំក៏ត្រូវថែទាំដាក់ជី ដោយធ្វើឡើងតាមដំណាំក់កាលក៏ដូចជារយៈពេលដាំផងដែរ។ ក្រោយពីការលាយដីជាមួយជីខាងលើរួចហើយ គេត្រូវស្រោចទឹកថ្នាំសម្លាប់មេរោគជាមុនសិន។  ចំណែកការស្រោចស្រប់ គេត្រូវរៀបចំប្រព័ន្ធទឹកឱ្យបានគ្រប់រណ្ដៅ ហើយរយៈពេល១ខែដំបូងមិនបាច់បន្ថែមជីទេ តែត្រូវស្រោចទឹកវា ២ដងក្នុងមួយថ្ងៃ ហើយសម្រាប់រយៈពេល ២-៤ខែត្រូវដាក់ជី ១៦​-៨-៨ ដើម្បីជំនួយដើម​ ដោយលាយជីស្រោច ២០ថ្ងៃម្ដង​ក្នុងបរិមាណជី ១ក្ដាប់លាយទឹក ៤ផ្តិលស្រោចបាន៤គុម្ព។

លុះដល់ខែទី៦ គេអាចប្រើជីប្រភេទដដែលក្នុងបរិមាណ ១ក្ដាប់ដៃលាយទឹក ២ផ្តិលសម្រាប់ស្រោច២ដើម និងចាប់ពីខែទី៧តទៅគេបង្កើនបរិមាណជីមកត្រឹម១ក្ដាប់សម្រាប់ទឹក១ផ្តិល និងស្រោចតែមួយគុម្ពប៉ុណ្ណោះ។ បន្ទាប់ពីក្រូចសើចចេញក្ដិបនៅខែទី៩ គេត្រូវដាក់ជី ១៥-១៥-១៥ ដើម្បីជំនួយផ្កា និងផ្លែ ដោយប្រើជី ១ក្ដាប់លាយទឹក១ផ្តិល សម្រាប់ក្រូច១គុម្ព។

ចំពោះដំណាំក្រូចសើច គេត្រូវការរយៈពេលដាំដុះពី ៨ខែ ទៅ ១ឆ្នាំ ទើបកសិករអាចប្រមូលផលក្រូចសើចបានហើយ។ គួរបញ្ជាក់ដែរថា ក្រូចសើចមានអត្ថប្រយោជន៍ច្រើនចំពោះសុខភាព និងសម្រស់ ដូចជា ជួយដល់សុខភាពមាត់ធ្មេញ ស្បែក ជួយប្រព័ន្ធរំលាយអាហារ ជួយបន្ថយការរលាក និងពង្រឹងប្រព័ន្ធស៊ាំ ហើយថែមទាំងអាចជួយថែបំប៉នសក់បានយ៉ាងមានប្រសិទ្ធភាព៕