សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សមាគមវារីវប្បករនៅកម្ពុជា អំពាវនាវដល់អាជ្ញាធរនៅជាប់ព្រំដែន ទប់ស្កាត់ការនាំចូលកង្កែបសាច់ពីប្រទេសវៀតណាម ខណៈតម្លៃទីផ្សារក្នុងស្រុក បានធ្លាក់ចុះខ្លាំងជាប់គ្នាៗ ពោលគឺនៅត្រឹម ៥០០០ រៀលក្នុងមួយគីឡូក្រាម នៅរយៈពេលប៉ុន្មានខែចុងក្រោយនេះ។
លោក ឡែម ផូរវរិទ្ធិ ប្រធានគណៈកម្មការប្រតិបត្តិ នៃសមាគមវារីវប្បករកម្ពុជា មានប្រសាសន៍ថា តម្លៃកង្កែបសាច់នៅលើទីផ្សារទូទាំងប្រទេសបានធ្លាក់ចុះខ្លាំង នៅអំឡុងពេល ៣ ខែចុងក្រោយនេះ ដែលធ្វើឱ្យកសិករចិញ្ចឹមកង្កែបក្នុងស្រុកជួបការខាតបង់ជាបន្តបន្ទាប់។
លោកថា តម្លៃសាច់កង្កែបនៅតាមកសិដ្ឋាន នៅពេលមុនចូលឆ្នាំខ្មែរមានតម្លៃចន្លោះពី ៦៥០០ រៀលទៅ ៧០០០ រៀល ក្នុងមួយគីឡូក្រាម ប៉ុន្តែនៅរយៈពេល ៣ ខែក្រោយនេះ សាច់កង្កែបបានធ្លាក់ចុះមកនៅត្រឹម ៤៨០០ រៀលទៅ ៥០០០រៀល តែប៉ុណ្ណោះ ដោយសារតែការនាំចូលកង្កែបពីប្រទេសវៀតណាមមានចំនួនលើសតម្រូវការទីផ្សារក្នុងស្រុក។
លោកបញ្ជាក់ដូច្នេះថា៖
“ការធ្លាក់ចុះនេះគឺដោយសារតែអាជ្ញាធរនៅតាមព្រំដែន បើកឱ្យឈ្មួញវៀតណាមនាំចូលកង្កែបសាច់ច្រើនលើសកម្រិត និងមានការបង់ពន្ធមិនគ្រប់លក្ខណៈ ដោយហេតុថានៅប្រទេសវៀតណាមកង្កែបសាច់មានតម្លៃ ៤៨០០ រៀលក្នុងមួយគីឡូក្រាម ហើយពេលលក់នៅលើទីផ្សារក្នុងប្រទេសកម្ពុជាមានតម្លៃ ៤៨០០ រៀលដូចគ្នា។”
លោក ទេស ចិន្តា ប្រធានក្រុមអ្នកចិញ្ចឹមកង្កែបនៅស្រុកសូត្រនិគម ខេត្តសៀមរាប ឱ្យដឹងដូចនេះដែរថា តម្លៃសាច់កង្កែបធ្លាក់ចុះខ្លាំងនៅត្រឹម ៤៨០០ រៀលក្នុងមួយគីឡូក្រាម ខណៈកាលពីអំឡុងខែមេសា មុនពេលចូលឆ្នាំខ្មែរតម្លៃកង្កែបសាច់អាចលក់បានចន្លោះពី ៦០០០រៀលទៅ ៦៥០០ រៀលក្នុងមួយគីឡូក្រាម។
លោកបន្តថា ករណីធ្លាក់ថ្លៃនេះដោយសារការទម្លាក់តម្លៃ ពីសំណាក់ឈ្មួញនាំចូលពីប្រទេសវៀតណាម ដែលនាំចូលមានចំនួនច្រើនលើសតម្រូវការទីផ្សារក្នុងស្រុក។
ដូចគ្នានេះដែរ កសិករឈ្មោះ រី វុទ្ធី ប្រធានក្រុមអ្នកចិញ្ចឹមកង្កែបក្នុងភូមិដុំ ឃុំពាមរោង ស្រុកស្វាយអន្ទរ ខេត្តព្រៃវែងលើកឡើងថា ការធ្លាក់ចុះតម្លៃកង្កែបសាច់នៅលើទីផ្សារ បានធ្វើឱ្យកសិករអ្នកចិញ្ចឹមកង្កែបជួបការខាតបង់ បើធៀបទៅលើការចំណាយទិញចំណី និងតម្លៃភ្លើងអគ្គិសនីសម្រាប់បូមទឹកចេញចូលអាងចិញ្ចឹមកង្កែបប្រចាំថ្ងៃ។ លោកថា៖
“សម្រាប់កសិករដែលបង្កាត់កូនចិញ្ចឹមយកសាច់ដោយខ្លួនឯង នៅអាចទប់ទល់បានទោះជាតម្លៃធ្លាក់ចុះ ប៉ុន្តែសម្រាប់កសិករដែលទិញកូនកង្កែបពីគេ យកមកចិញ្ចឹមបំប៉នយកសាច់លក់ ជួបហានិភ័យទៅលើការខាតបង់ជាបន្តបន្ទាប់ ខណៈតម្លៃចំណីនិងតម្លៃភ្លើងមិន ធ្លាក់ចុះដូចតម្លៃសាច់កង្កែប។”
លោក សុថាវរិទ្ធិ មើលឃើញថា ការនាំចូលកង្កែបសាច់ដែលលើសកូតាអនុញ្ញាត និងការនាំចូលដែលមិនមានអាជ្ញាបណ្ណតាមច្រកព្រំដែនមួយចំនួន បានធ្វើឱ្យកង្កែបសាច់ផលិតក្នុងស្រុក ស្ទះលក់មិនចេញ ហើយតម្លៃកង្កែបសាច់នឹងបន្តធ្លាក់ចុះក្រោម ៥០០០ រៀលក្នុងមួយគីឡូក្រាម ដែលទាមទារឱ្យមានការទប់ស្កាត់ពីអាជ្ញាធរពាក់ព័ន្ធ កុំឱ្យនាំចូលលើសតម្រូវការទីផ្សារនាបច្ចុប្បន្ន។
បើតាមតួលេខរបស់សមាគមវារីវប្បករនៅកម្ពុជា ឱ្យដឹងថា កម្ពុជាមានតម្រូវការកង្កែបសាច់ចំនួន ២០ តោនក្នុងមួយថ្ងៃ ខណៈដែលការចិញ្ចឹមក្នុងស្រុកអាចផ្គត់ផ្គង់ទីផ្សារបានប្រមាណ ១០តោនក្នុងមួយថ្ងៃ ស្មើនឹង ៥០% នៃតម្រូវការសរុបទូទាំងប្រទេស៕
Account
Security
Favourite Content