ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ កាលពីពេលកន្លងទៅនេះបានបើកកិច្ចប្រជុំអន្តរក្រសួង-ស្ថាប័ន ដើម្បីពិភាក្សាលើការរៀបចំវិធានការលើកទឹកចិត្ត និងវិធានការជាកញ្ចប់សម្រាប់ដោះស្រាយគម្រោងវិនិយោគដែលជាប់គាំងក្នុងខេត្តព្រះសីហនុនៅទីស្តីការក្រសួងសេដ្ឋកិច្ច និងហិរញ្ញវត្ថុ។

លោ ឡុង ឌីម៉ង់ អភិបាលរងខេត្តព្រះសីហនុដែលបានចូលរួមកិច្ចប្រជុំខាងលើនេះបានឱ្យដឹងថា កិច្ចប្រជុំនេះមានគោលបំណងសំខាន់ គឺដើម្បីពិភាក្សាលើស្ថានភាព បញ្ហាប្រឈម ទិដ្ឋភាពច្បាប់ សមិទ្ធិលទ្ធភាព និងយន្តការដោះស្រាយគម្រោងវិនិយោគជាប់គាំងក្នុងខេត្តព្រះសីហនុ។

លោកបន្តថា  អង្គប្រជុំបានគាំទ្រលើការសិក្សា និងការរៀបចំឱ្យមានវិធានការដោះស្រាយនេះ និងបានស្នើឱ្យមានការកំណត់អត្តសញ្ញាណកម្មគម្រោងវិនិយោគជាប់គាំង និងការរៀបចំផែនការសកម្មភាព ព្រមទាំងស្នើឱ្យមានការពិភាក្សាលម្អិត លើវិធានការនីមួយៗ។

បន្ថែមពីនេះ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ឱ្យដឹងដែរថា កិច្ចប្រជុំអន្តរក្រសួង-ស្ថាប័ន ដើម្បីពិភាក្សាលម្អិតលើការរៀបចំវិធានការលើកទឹកចិត្ត និងវិធានការជាកញ្ចប់សម្រាប់ដោះស្រាយគម្រោងវិនិយោគដែលជាប់គាំងក្នុងខេត្តព្រះសីហនុនៅថ្ងៃទី៣១ ខែមករា ឆ្នាំ២០២១ ខាងមុខបន្ថែមទៀត ។

លោក ហ៊ីង ថូរ៉ាក់ស៊ី រដ្ឋលេខាធិការក្រសួងប្រចាំនៃទីស្តីការគណៈរដ្ឋមន្ត្រីកាលពីថ្ងៃទី១២ ខែតុលា ឆ្នាំ២០២២ បានជូនដំណឹងដល់ អន្តរក្រសួង-ស្ថាប័នមានក្រសួងសេដ្ឋកិច្ចនិងហិរញ្ញវត្ថុ និងក្រសួងរៀបចំដែនដី នគរូបនីយកម្ម និងសំណង់ជាដើម ស្តីពីរាជរដ្ឋាភិបាលយល់ព្រមលើកទឹកចិត្ត ដល់ម្ចាស់អគារ និង/ឬ គម្រោងវិនិយោគដែលជាប់គាំងក្នុងខេត្តព្រះសីហនុ។

បើតាមលិខិតរបស់លោក ហ៊ីង ថូរ៉ាក់ស៊ី ក្នុងនោះត្រូវមានវិធានការគោលនយោបាយបន្ថែមរបស់រាជរដ្ឋាភិបាល ដោយផ្ដល់ការលើកទឹកចិត្តដល់ម្ចាស់អគារ និង/ឬ គម្រោងវិនិយោគដែលជាប់គាំងក្នុងខេត្តព្រះសីហនុ ក្នុងស្ថានភាពចំពោះមុខសិន ដើម្បីជំរុញវិនិយោគ បង្កើតតម្រូវការ និងបង្កើនជំនឿទុកចិត្ត សំដៅស្តារ និងអភិវឌ្ឍសេដ្ឋកិច្ច ពិសេសក្នុងខណៈពេលដែលកម្ពុជានៅ បន្តទទួលរងផលប៉ះពាល់ពីការរីករាលដាលនៃជំងឺកូវីដ-១៩, សង្គ្រាមរវាងរុស្ស៊ី និងអ៊ុយក្រែន, គោលនយោបាយ សូន្យកូវីដរបស់ចិន និងម្យ៉ាងស្ថានភាពជាប់គាំងនេះមានរយៈពេលច្រើនឆ្នាំ ហើយខេត្តព្រះសីហនុកំពុងស្ថិតក្នុង ដំណាក់កាលរៀបចំផែនការមេ ប្រែក្លាយជាតំបន់សេដ្ឋកិច្ចពិសេសគំរូពហុបំណង។

ជាមួយនេះ ក្រសួងសេដ្ឋកិច្ច និងហិរញ្ញវត្ថុ ត្រូវបន្តធ្វើការសិក្សាឱ្យបានច្បាស់លាស់ អំពីវិធានការនេះ ដើម្បីគ្រប់គ្រងប្រសិទ្ធភាពនៃការលើក ទឹកចិត្ត ចៀសវាងផលរាលដាល និងឆ្លើយតបនឹងគោលបំណងរបស់រាជរដ្ឋាភិបាល ដោយផ្តោតលើវិសាលភាព ឬ និយមន័យអគារ និង/ឬ តម្រោងជាប់គាំង, ក្របខ័ណ្ឌពេលវេលា, លក្ខណៈវិនិច្ឆ័យ និងទំហំនៃការផ្តល់ការ លើកទឹកចិត្ត និងយន្តការគ្រប់គ្រង តាមដានត្រួតពិនិត្យ។

រាជរដ្ឋាភិបាលក៏តម្រូវឱ្យរៀបចំយន្តការអន្តរក្រសួង ស្ថាប័នមួយ ក្រោមឆត្រនៃគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ដឹកនាំដោយក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីក្រសួងរៀបចំដែនដី នគរូបនីយកម្ម និងសំណង់, ក្រសួងទេសចរណ៍, ក្រសួងយុត្តិធម៌ និងរដ្ឋបាលខេត្តព្រះសីហនុ ព្រមទាំងស្ថាប័នពាក់ព័ន្ធផ្សេងទៀត តាមការចាំបាច់ ដែលមានភារកិច្ចសិក្សាលម្អិត និងលើកអនុសាសន៍ស្តីពីវិធានការជាកញ្ចប់របស់រាជរដ្ឋាភិបាល សម្រាប់ដោះស្រាយបញ្ហាប្រឈមនេះ ព្រមទាំងដឹកនាំសម្របសម្រួល ជំរុញការអនុវត្ត ផ្សព្វផ្សាយ និងលើកកម្ពស់ ការចូលរួមរបស់តួអង្គពាក់ព័ន្ធ បន្ទាប់ពីរាជរដ្ឋាភិបាលដាក់ចេញវិធានការខាងលើនេះ៕