ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ថ្មីៗនេះបានផ្ញើសារអំពាវនាវ ស្ដីពីការធ្វើជំរឿនកសិកម្មនៅព្រះរាជាណាចក្រកម្ពុជា ឆ្នាំ២០២៣ ដែលជាជំរឿនកសិកម្មលើកទី ២ នៅកម្ពុជាស្របតាមច្បាប់ស្តីពីស្ថិតិ។ ការណ៍នេះបានកំណត់នូវកាតព្វកិច្ចរបស់ម្ចាស់អង្គភាពកសិកម្មទាំងអស់ រួមមាន សហគ្រាសកសិដ្ឋានកសិកម្ម និងគ្រួសារកាន់កាប់កសិកម្មនីមួយៗ ដែលត្រូវចូលរួមសហការ ក្នុងការផ្តល់ព័ត៌មានទិន្នន័យដល់មន្ត្រីជំរឿនកសិកម្ម។

សម្តេចតេជោ បានមានប្រសាសន៍ថា ជំរឿនកសិកម្មនៅកម្ពុជា នឹងត្រូវធ្វើចាប់ពីថ្ងៃទី១ ខែមេសា ដល់ថ្ងៃទី៣០ ខែមេសា ឆ្នាំ២០២៣ ក្នុងគោលបំណងទទួលបាននូវព័ត៌មានសំខាន់ៗក្នុងវិស័យកសិកម្ម ក៏ដូចជាស្ថានភាពកសិកម្ម ដើម្បីធ្វើជាមូលដ្ឋានទិន្នន័យគ្រឹះ សម្រាប់រៀបចំគោលនយោបាយ យុទ្ធសាស្ត្រផែនការ សកម្មភាព និងគម្រោងកម្មវិធីនានា ដើម្បីជំរុញកិច្ចអភិវឌ្ឍវិស័យកសិកម្ម សេដ្ឋកិច្ច សង្គមកិច្ច និងសុខុមាលភាពប្រជាជន។

សម្តេចតេជោ បានគូសបញ្ជាក់ថា ជំរឿនកសិកម្ម គឺជាការងារដ៏ធំជាប្រវត្តិសាស្ត្រ និងមានសារៈសំខាន់សម្រាប់ប្រទេសជាតិ ហើយក៏ជាការងារស្ថិតិជាតិនៃកម្ពុជា ដែលនាំមកនូវព័ត៌មាន ទិន្នន័យទាំងឡាយរបស់សហគ្រាស កសិដ្ឋានកសិកម្ម និងគ្រួសារកាន់កាប់កសិកម្មគ្រប់ប្រភេទ និងគ្រប់ទំហំខ្នាតទាំងអស់។ ដូច្នេះហើយ ប្រទេសជាច្រើននៅលើពិភពលោក គឺសុទ្ធតែមានការចាំបាច់ក្នុងការធ្វើជំរឿនកសិកម្ម ក្នុងនោះប្រទេសដែលមានសុខសន្តិភាព ស្ថិរភាពនយោបាយ អាចដំណើរការ និងការប្រព្រឹត្តទៅនៃជំរឿនកសិកម្មបានល្អ។

ជាងនេះទៅទៀត លទ្ធផលទិន្នន័យដែលបានមកពីជំរឿនកសិកម្ម នឹងត្រូវបានប្រើប្រាស់យ៉ាងទូលំទូលាយ នៅក្នុងវិស័យសាធារណៈ និងវិស័យឯកជន។

យ៉ាងណាមិញ សម្តេចតេជោក៏បានអំពាវនាវដល់ម្ចាស់សហគ្រាសកសិដ្ឋានកសិកម្ម និងគ្រួសារកាន់កាប់កសិកម្មគ្រប់ប្រភេទទាំងអស់ ឱ្យចូលរួមគាំទ្រការងារនេះ និងផ្តល់ព័ត៌មានទិន្នន័យ តាមសំណួរសម្ភាសន៍ឱ្យបានពេញលេញ ត្រឹមត្រូវ និងស្មោះត្រង់ ជូនដល់មន្ត្រីជំរឿនកសិកម្ម ដើម្បីបង្កើតបាននូវស្ថិតិល្អ។ ស្ថិតិល្អបង្កើតបាននូវគោលនយោបាយល្អ ហើយគោលនយោបាយល្អនឹងជំរុញការ អភិវឌ្ឍប្រទេសជាតិយើងបានជឿនលឿនរីកចម្រើន។

សូមបញ្ជាក់ថា កាលពីថ្ងៃថ្ងៃទី៣០ ខែមីនា ឆ្នាំ២០២៣ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ និងជាប្រធានគណៈកម្មាធិការជាតិជំរឿនកសិកម្មនៅកម្ពុជាឆ្នាំ២០២៣ បានអញ្ជើញចុះត្រួតពិនិត្យការបណ្តុះបណ្តាលមន្ត្រីត្រួតពិនិត្យ និងមន្ត្រីសម្ភាសន៍ជំរឿនកសិកម្ម ក្នុងស្រុកទឹកឈូ ខេត្តកំពត ដែលមានមន្ត្រីចំនួន ៤៧ នាក់ មកពីស្រុកចំនួន ៣ រួមមាន៖ ស្រុកទឹកឈូ ក្រុងកំពត និងក្រុងបូកគោ ដែលត្រូវទទួលការបណ្តុះបណ្តាល និងចុះអនុវត្តការធ្វើជំរឿនកសិកម្មក្នុងស្រុក ក្រុងទាំង ៣ នេះ។

ឯកឧត្តម បានថ្លែងថា ការធ្វើជំរឿនកសិកម្មឆ្នាំ ២០២៣ នេះ គឺដូចទៅនឹងការធ្វើជំរឿនប្រជាពលរដ្ឋដែរ គឺដើម្បីប្រមូលទិន្នន័យពីការប្រើប្រាស់ដីធ្លី ការដាំដុះដំណាំ និងការចញ្ចឹមសត្វគ្រប់ប្រភេទ។ តែយ៉ាងណា ឯកឧត្តម បន្តថា ការធ្វើជំរឿនកសិកម្មនេះគឺនឹងផ្តោតសំខាន់លើគ្រួសារកសិកម្មតែប៉ុណ្ណោះ។ 

ស្រដៀងគ្នានេះ ឯកឧត្តម យ៉ង់ សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងដែរថា ការធ្វើជំរឿនកសិកម្មនេះគឺដើម្បីទទួលបានទិន្នន័យជាក់លាក់ពិតប្រាកដ បន្ថែមពីតួរលេខដែលក្រសួងកសិកម្មប្រមូលប្រចាំឆ្នាំ។ ហើយការធ្វើជំរឿនកសិកម្មនេះទៀតសោត ក៏ដើម្បីងាយស្រួលក្នុងការសម្របសម្រួល និងគាំទ្រដល់ប្រជាកសិករផងដែរ។ 

ទាក់ទិននឹងការធ្វើជំរឿនកសិកម្មនេះ លោក ឆេង ថុង ប្រធានសហគមន៍កសិកម្មសំបូរមានជ័យ បានថ្លែងដែរថា រាជរដ្ឋាភិបាលបានរៀបចំធ្វើជំរឿនកសិ​កម្មគឺជាការងារគន្លឹះសំខាន់មួយ ដើម្បីឱ្យទទួលបានព័ត៌មានគ្រប់ផ្នែកក្នុងវិស័យកសិកម្ម ដែលជាសូចនាករយ៉ាងសំខាន់សម្រាប់តាមដាន ត្រួតពិនិត្យ វាយតម្លៃលើកម្មវិធីគោលនយោបាយអភិវឌ្ឍន៍សេដ្ឋកិច្ចរបស់រាជរដ្ឋាភិបាលកម្ពុជា។

សូមបញ្ជាក់ថា តាមការប៉ាន់ប្រមាណចំនួនប្រជាជនកម្ពុជា គឺមានកំណើនដល់ជាង ១៧ លាននាក់ ដែលមានប្រមាណ ៣,៩ លានគ្រួសានៅឆ្នាំ ២០២៣ ក្នុងនោះមានគ្រួសារប្រកបមុខរបរកសិកម្មនៅទូទាំប្រទេសកម្ពុជាមានប្រមាណជាង ២,៧ លានគ្រួសារ៕