ភ្នំពេញ ៖ ភ្ជាប់ទៅនឹងមហិច្ឆតាចង់បានគម្រោងវិនិយោគថ្មីៗចូលមកកាន់កម្ពុជាបន្ថែមពីលើអ្វីដែលមានស្រាប់ វិស័យឯកជនតំណាងដោយសភាពាណិជ្ជកម្មកម្ពុជា ដែលជាប្រតិបត្តិករយ៉ាងសកម្ម បានស្នើដល់រាជរដ្ឋាភិបាលពិចារណាលើការលើកលែងពន្ធផ្នែកកសិកម្មកែច្នៃ ដើម្បីអាចផ្តល់ឱកាស និងទាក់ទាញវិនិយោគិនទាំងក្នុងស្រុក និងក្រៅស្រុកមកបន្ថែមទៀត។

នៅក្នុងវិស័យកសិកម្ម រាជរដ្ឋាភិបាលកម្ពុជា បានអនុគ្រោះ និងជួយជំរុញឱ្យមានពិពិធកម្មកាន់តែប្រសើរឡើង តាមរយៈការលើកលែងពន្ធដល់ការដាំដុះចម្រុះដោយផ្ទាល់ទៅដល់បងប្អូនប្រជាកសិករនៅទូទាំងប្រទេស លើកលែងតែឈ្មួញកណ្តាលប៉ុណ្ណោះដែលត្រូវបង់ពន្ធទៅលើប្រាក់ចំណេញ។ ប៉ុន្តែសម្រាប់ការវិនិយោគទៅលើវិស័យកសិកម្មកែច្នៃមុនពេលលក់ចេញជាផលិតផលពាក់កណ្តាលសម្រេច ឬផលិតផលសម្រេច នៅតែប្រឈម ឬទទួលបានត្រឹមការព្យួរទុកពន្ធតាមរយៈសំណើសុំក្នុងរយៈពេលកំណត់ណាមួយពីប្រតិបត្តិករដែលជាអ្នកវិនិយោគ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា ការកែច្នៃវត្ថុធាតុដើមចេញពីកសិផលក្នុងស្រុកដើម្បីផ្គត់ផ្គង់នៅលើទីផ្សារ និងឈានដល់ការនាំចេញ គឺជាវិស័យមួយដែលមានភាពចាំបាច់ ​និងសំខាន់បំផុតក្នុងការជួយទ្រទ្រង់កំណើនសេដ្ឋកិច្ចទាំងប្រជាកសិករ ក៏ដូចជាសង្គមជាតិផងដែរ ជាពិសេសអាចនាំមកនូវបច្ចេកទេសថ្មីៗ និងផ្តល់ឱកាសការងារជាច្រើនដល់ពលរដ្ឋខ្មែរ។ ដូច្នេះ ការកៀរគរឱ្យមានការបណ្តាក់ទុនវិនិយោគនៅក្នុងឧស្សាហកម្មកែច្នៃកសិផលនេះគឺជាអាទិភាពបំផុត។

អ្នកឧកញ៉ា បានបញ្ជាក់ថា ៖

«ថ្នាក់ដឹកនាំគួរពិចារណាលើការលើកលែងពន្ធទៅលើការវិនិយោគក្នុងវិស័យកសិកម្មកែច្នៃ ដើម្បីអាចបង្កើនភាពទាក់ទាញវិនិយោគិនក្នុងវិស័យនេះបន្ថែមទៀត ខណៈដែលពពេលបច្ចុប្បន្ននេះ អ្នកវិនិយោគទទួលបានត្រឹមការព្យួរពន្ធតាមរយៈការស្នើសុំក្នុងរយៈពេលកំណត់ខ្លីតែប៉ុណ្ណោះ។ ប្រសិនបើថ្នាក់ដឹកនាំមានគោលនយោបាយក្នុងការលើកលែងពន្ធដូចការលើកឡើង វានឹងក្លាយជាមេដែកឆក់ដែលស្រូបទាញទុនវិនិយោគចូលមកបន្ថែមជាមិនខាន ដែលអាចបង្កើនទាំងលទ្ធភាពផលិតកែច្នៃកសិកផលក្នុងស្រុក ជួយទាំងសេដ្ឋកិច្ចប្រជាកសិករតាមរយៈការទទួលបានតម្លៃសមរម្យ ហើយអាចមមានលទ្ធភាពប្រកួតប្រជែងខ្ពស់ទៀតផង»។

ជាមួយនឹងការស្នើសុំឱ្យរដ្ឋាភិបាលពិចារណាក្នុងការលើកលែងពន្ធលើវិស័យមួយនេះ អ្នកឧកញ៉ា លឹម ហេង បានអះអាងថា ទោះជារដ្ឋាភិបាលលើកលែងពន្ធ ប៉ុន្តែចំណូលថវិកាជាតិក៏មិនបាត់បង់ទៅណានោះដែរ គ្រាន់បង្វែរពីចំណូលពន្ធលើការវិនិយោគទៅជាចំណូលតាមរយៈពន្ធផ្សេងៗដែលស្ថិតនៅក្នុងប្រតិបត្តិការនៃការវិនិយោគដដែល ដូចជា ពន្ធលើអាករបន្ថែម ពន្ធលើប្រាក់ចំណេញ និងពន្ធប្រាក់ខែបុគ្គលិកជាដើម។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជាបានបង្ហាញពីទស្សនៈគាំទ្រចំពោះការស្នើសុំខាងលើនេះ ដែលវាជាចំណុចសំខាន់ក្នុងទាក់ទាញទុនវិនិយោគបន្ថែមនៅកម្ពុជា។

លោកបណ្ឌិតបានមានប្រសាសន៍ថា ៖

«សម្រាប់ការលើកលែងពន្ធសម្រាប់សហគ្រាសកែច្នៃកសិផលនេះ ទោះជាមិនមែន QIP ក៏ដោយ ក៏គួរតែមានការលើកលែងទៅ។ លើកលែងដំបូងអាចនឹងមានការធ្លាក់ចុះចំណូលពន្ធដារបន្តិចបន្តួច ព្រោះសហគ្រាកែច្នៃនៅកម្ពុជាមានចំនួនតិចប៉ុណ្ណោះ ផ្ទុយទៅវិញ នៅក្នុងរយៈពេលវែង ចំណូលពន្ធនឹងកើនឡើង ព្រោះចំនួនអ្នកវិនិយោគកើនឡើងច្រើន អាចបង្កើតការងារក៏ច្រើន ដែលរដ្ឋអាចប្រមូលពន្ធពាក់ព័ន្ធត្រឡប់មកវិញ»។

និយាយជារួម ការលើកលែងពន្ធនៅក្នុងវិស័យមួយនេះនឹងផ្តល់ចំណេញច្រើនដល់កម្ពុជា ខណៈដែលអ្នកវិនិយោគអាចវិភាគទៅលើគម្រោងប្រតិបត្តិការលើមុខជំនួញ ក៏ដូចជាការវិនិយោគរបស់ខ្លួនបានយ៉ាងច្បាស់លាស់ ទាំងទំហំទុនដែលត្រូវបណ្តាក់លើកដំបូង ទាំងទំហំនៃផលចំណេញត្រឡប់មកវិញ ដែលមិនមែនជាការវិនិយោគដោយប្រថុយប្រថាននោះទេ ៕