សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងបន្តលើកកម្ពស់ការយល់ដឹង បង្កើនសមត្ថភាព និងជំរុញការចូលរួមរបស់សហគ្រាសធុនតូច និងមធ្យមនៅកម្ពុជាអនុវត្តត្រឹមត្រូវស្របតាមច្បាប់ មជ្ឈមណ្ឌលអភិវឌ្ឍធុរកិច្ច បានរៀបចំសិក្ខាសាលាស្ដីពី «ការលើកទឹកចិត្តពន្ធ និងអាករ សម្រាប់សហគ្រាសធុនតូច និងមធ្យម» ក្រោមអធិបតីភាពរបស់រដ្ឋមន្ត្រីប្រតិភូអមនាយករដ្ឋមន្ត្រី ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលមជ្ឈមណ្ឌលអភិវឌ្ឍធុរកិច្ច។
មានប្រសាសន៍នៅក្នុងអង្គពិធីទាំងមូល លោកបណ្ឌិតសភាចារ្យ ហ៊ាន សាហ៊ីប នារសៀលថ្ងៃទី៣០ ខែមីនា ឆ្នាំ២០២៣ បានលើកឡើងថា សិក្ខាសាលានេះ គឺជាសកម្មភាព គាំទ្រធុរកិច្ចមួយរបស់មជ្ឈមណ្ឌលអភិវឌ្ឍធុរកិច្ចដែលត្រូវបានបង្កើតឡើង ក្រោមគំនិតផ្តួចផ្តើម និងអនុសាសន៍ ដឹកនាំជាបន្តបន្ទាប់របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
សិក្ខាសាលានេះ គឺជាសកម្មភាពលើកកម្ពស់ការយល់ដឹង និងជំរុញការចូលរួមរបស់វិស័យឯកជន ក្នុងការអនុវត្តគោលនយោបាយ និងបទប្បញ្ញត្តិរបស់រាជរដ្ឋាភិបាល ក្រោមការដឹកនាំដ៏ខ្ពង់ខ្ពស់ដោយ សម្តេចតេជោនាយករដ្ឋមន្ត្រី ដែលបានផ្តល់អាទិភាពខ្ពស់ក្នុងការអភិវឌ្ឍសហគ្រាសធុនតូច និងមធ្យម។
ឯកឧត្តមបណ្ឌិតសភាចារ្យ បានបញ្ជាក់ថា ៖
“រាជរដ្ឋាភិបាលមានគោលដៅបន្តពង្រឹងការអភិវឌ្ឍសហគ្រាសធុនតូច និងមធ្យម, លើកកម្ពស់សហគ្រិនភាព និងសហគ្រាសបង្កើតថ្មី ដើម្បីជំរុញផលិតកម្មក្នុងស្រុកតភ្ជាប់សហគ្រាសធុនតូច និងមធ្យម ជាមួយនឹងក្រុមហ៊ុនវិនិយោគផ្ទាល់ពីបរទេស និងជំរុញការនាំចេញ។ រាជរដ្ឋាភិបាលបានដាក់ចេញ «គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥» ក្នុងនោះការពង្រឹង និងទំនើបកម្មសហគ្រាសធុនតូច និងមធ្យម គឺជាវិធានការគោលនយោបាយអាទិភាព”
តាមរយៈនេះ រាជរដ្ឋាភិបាលបានផ្តល់ការលើកទឹកចិត្ត ក្នុងការបង្កើតចង្កោមសហគ្រាសធុនតូច និងមធ្យម (SME Cluster) និងបង្កើតយន្តការនានា ដើម្បីគាំទ្រ រួមមាន ធនាគារសហគ្រាសធុនតូច និងមធ្យមកម្ពុជា, ក្រុមហ៊ុនសាជីវកម្មធានាឥណទានកម្ពុជា, មូលនិធិអភិវឌ្ឍសហគ្រិន, មូលនិធិអភិវឌ្ឍន៍ជំនាញ, មជ្ឈមណ្ឌលបណ្តុះធុរកិច្ចថ្មី «តេជោ», មជ្ឈមណ្ឌលអភិវឌ្ឍន៍ធុរកិច្ច, ព្រមទាំងរៀបចំលិខិតបទដ្ឋានគតិយុត្ត ពិសេសអនុក្រឹត្យស្តីពីការលើកទឹកចិត្តផ្នែកពន្ធដារ និងគយ សម្រាប់សហគ្រាសធុនតូច និងមធ្យម។
ឯកឧត្តមបណ្ឌិតសភាចារ្យ ហ៊ាន សាហ៊ីប បានលើកឡើងថា ទោះបីយ៉ាងណា, សហគ្រាសធុនតូច និងមធ្យមនៅជួបប្រទះបញ្ហាប្រឈមមួយចំនួនជាអាទិ៍ ការទទួលបានឥណទាននៅមានកម្រិត, ប្រភពទុនវិនិយោគនៅមានភាពចង្អៀត, កង្វះសហគ្រិនភាព និងសមត្ថភាពគ្រប់គ្រងសហគ្រាសខ្លួនឯងផ្ទាល់ និងការលើកទឹកចិត្តពន្ធអាករមិនទាន់មានលក្ខណៈគ្រប់ជ្រុងជ្រោយ។ បញ្ហាប្រឈមទាំងនេះត្រូវបានដោះស្រាយជាបន្តបន្ទាប់ តាមរយៈការដាក់ចេញគោលនយោបាយ និងយន្តការនានា ។ ជាមួយនេះ រាជរដ្ឋាភិបាលក៏បានផ្តល់ការលើកទឹកចិត្តជារួម តាមវិស័យអាទិភាព ពិសេសវិស័យកសិកម្ម និងការលើកទឹកចិត្តដោយឡែក សម្រាប់សហគ្រាសធុនតូច និងមធ្យម។
ពាក់ព័ន្ធនឹងការរៀបចំសិក្ខាសាលានេះ ឯកឧត្តម អ៊ឹម សុខធី នាយកប្រតិបត្តិនៃមជ្ឈមណ្ឌលអភិវឌ្ឍធុរកិច្ចបានមានប្រសាសន៍ថា ការរៀបចំសិក្ខាសាលានេះឡើង គឺក្នុងគោលបំណងទី១ លើកកម្ពស់ការយល់ដឹងសហគ្រាសធនតូច និងមធ្យមដែលជាអ្នកទទួលផលពីការលើកទឹកចិត្ត ឬក៏គោលនយោបាយគាំទ្រផ្សេងៗរបស់រាជរដ្ឋាភិបាល។ ទី២គឺដើម្បីផ្សព្វផ្សាយបន្ថែមទៀត ឱ្យកាន់តែទូលំទូលាយនូវគោលនយោបាយ ក៏ដូចជាច្បាប់បញ្ញត្តិពាក់ព័ន្ធរបស់រាជរដ្ឋាភិបាលពាក់ព័ន្ធនឹងការលើកទឹកចិត្តសម្រាប់សហគ្រាសធនតូច និងមធ្យម ទី៣គឺក្នុងគោលបំណងសម្រាប់ការផ្ដល់នូវ កិច្ចសហការ ឬក៏ទំនាក់ទំនងផ្សេងៗក្នុងចំណោមតួអង្គពាក់ព័ន្ធ ដើម្បីរួមចំណែកក្នុងការអភិវឌ្ឍន៍ សហគ្រាសធនតូច និងមធ្យមនៅកម្ពុជាទៅមុខទៀត។
ឯកឧត្តមក៏បានបន្តសង្កត់ធ្ងន់ដែរថា ៖
“សិក្ខាសាលានេះគឺជាសកម្មភាពមួយក្នុងការចូលរួមចំណែកគាំទ្របំពេញបន្ថែមទៅលើអ្វីដែលរដ្ឋាភិបាលបានអនុវត្តកន្លងមក ហើយសកម្មភាពនេះក៏ទទួលបាននូវការគាំទ្រច្រើនពីអ្នកចូលរួមផងដែរ ហើយទៅមុខទៀត មជ្ឈមណ្ឌលអភិវឌ្ឍន៍ធុរកិច្ចប្ដេជ្ញាខិតខំបន្តនូវបេសកម្ម ភារកិច្ចរបស់ខ្លួនដើម្បីចូលរួមចំណែកអនុវត្តនូវគោលនយោបាយរបស់រដ្ឋាភិបាល ក៏ដូចជាជំរុញការអនុវត្តច្បាប់ និងបទបញ្ញត្តិទាំងឡាយរបស់រាជរដ្ឋាភិបាល។ “
សូមបញ្ជាក់ថា មជ្ឈមណ្ឌលអភិវឌ្ឍធុរកិច្ច គឺជាអង្គភាពមួយនៃក្រសួងសេដ្ឋកិច្ច និងហិរញ្ញវត្ថុ ដែលត្រូវបានបង្កើតឡើង ដើម្បីផ្តល់កន្លែងប្រមូលផ្តុំគំនិតផ្តួចផ្តើមនានា ឲ្យនៅក្រោមហេដ្ឋារចនាសម្ព័ន្ធតែមួយ និងផ្តល់សេវាកម្ម និងអនុវត្តកម្មវិធី ឬគម្រោងគាំទ្រធុរកិច្ច ព្រមទាំងធ្វើការសម្របសម្រួល និងកិច្ចសហការក្នុងការអភិវឌ្ឍធុរកិច្ច។ ក្នុងន័យនេះ សិក្ខាសាលានេះ ត្រូវបានរៀបចំឡើងដោយមានកិច្ចសម្របសម្រួល និងកិច្ចសហការក្នុងចំណោមតួអង្គពាក់ព័ន្ធ ព្រមទាំងកិច្ចសហការ និងការគាំទ្រពីសហគ្រិនខ្មែរ, អគ្គនាយកដ្ឋានពាក់ព័ន្ធ និងវិស័យឯកជន៕
Account
Security
Favourite Content