ភ្នំពេញ ៖ ក្រុមប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃទី២២ ខែធ្នូ ឆ្នាំ២០២៥ បានបើកកិច្ចប្រជុំលើកទី៥ ដើម្បីពិនិត្យវឌ្ឍនភាព អនុម័តឯកសារគោលនយោបាយ និងកំណត់ទិសដៅអាទិភាព សម្រាប់ជំរុញរបៀបវារៈជាតិផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ សំដៅបង្កើនភាពប្រកួតប្រជែង ភាពធន់ និងកំណើនសេដ្ឋកិច្ចកម្ពុជា។

ឯកឧត្តមរដ្ឋមន្ត្រី ហែម វណ្ណឌី ប្រធានក្រុមប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍ បានសង្កត់ធ្ងន់លើកិច្ចសហការ និងការទទួលខុសត្រូវរួមរបស់ក្រសួង-ស្ថាប័ន ជាអង្គតែមួយរបស់ជាតិ ក្នុងការកសាងប្រព័ន្ធអេកូឡូស៊ី នវានុវត្តន៍ជាតិ ដោយផ្តោតលើការប្រែក្លាយគោលនយោបាយទៅជាលទ្ធផលដែលអាចវាស់វែងបាន ព្រម​ទាំងសារៈសំខាន់ជាយុទ្ធសាស្ត្រនៃបច្ចេកវិទ្យាក្នុងបរិបទតំបន់ និងសកល នាពេលបច្ចុប្បន្ន។

ឯកឧត្តមបានលើកឡើងថា៖

« វិទ្យាសាស្ត្រ បច្ចេកវិទ្យា និងនវានុវត្តន៍ ត្រូវបានផ្តល់គុណប្រយោជន៍ជាក់ស្តែងសម្រាប់សង្គម-សេដ្ឋកិច្ច ពិសេសពង្រឹងភាពប្រកួតប្រជែង និងគាំទ្រសហគ្រាសធុនតូច និងមធ្យម ក្នុងវិស័យអាទិភាពរបស់ជាតិ។ បច្ចេកវិទ្យា មានសារៈសំខាន់ មិនត្រឹមតែសម្រាប់ការកសាងភាពធន់នៃសេដ្ឋកិច្ចប៉ុណ្ណោះទេ ប៉ុន្តែក៏សម្រាប់សមត្ថភាព សន្តិសុខ និងការត្រៀមលក្ខណៈរបស់ជាតិផងដែរ»។

កិច្ចប្រជុំបានណែនាំសមាសភាពគណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ ពិនិត្យវឌ្ឍនភាពនៃគំនិតផ្តួចផ្តើមនានាពាក់ព័ន្ធនឹងការគ្រប់គ្រងការស្រាវជ្រាវ និងអភិវឌ្ឍន៍ និងការរៀបចំបង្កើតមូលនិធិស្រាវ​ជ្រាវ​ជាតិ ការប្រមូលផ្តុំ និងរៀបចំទិន្នន័យអ្នកវិទ្យាសាស្ត្រ និងអ្នកជំនាញបច្ចេកវិទ្យា ថ្នាលរដ្ឋាភិបាលឌីជីថល និងការចូលរួមរបស់កម្ពុជាក្នុងកិច្ចសហប្រតិបត្តិការវិទ្យាសាស្ត្រ បច្ចេកវិទ្យា និងនវានុវត្តន៍នៅកម្រិតអាស៊ាន។

កិច្ចប្រជុំក៏បានពិនិត្យ និងអនុម័តឯកសារចំនួនពីរ គឺល័ក្ខខ័ណ្ឌវិនិច្ឆ័យសម្រាប់វាយតម្លៃវិទ្យាសាស្រ្ត បច្ចេកវិទ្យា និងនវានុវត្តន៍ និងគោលការណ៍ណែនាំស្ដីពីការទាក់ទាញបុគ្គលមានទេពកោសល្យសម្រាប់កម្ពុជា។

ក្រុមប្រឹក្សាជាតិបានកំណត់អាទិភាពចំនួន៤ រួមមានការស្រាវជ្រាវ និងអភិវឌ្ឍន៍ ដែលផ្តោតលើតម្រូវការជាក់ស្តែងរបស់វិស័យឯកជន, ក្របខ័ណ្ឌផ្ទេរបច្ចេកវិទ្យា និងការបង្កើតថ្នាលសាកល្បងនវានុវត្តន៍ (innovation sandbox), ការបង្កើនផលិតភាពសម្រាប់សហគ្រាសធុនតូច និងមធ្យម តាមរយៈបរិវត្តកម្មឌីជីថល និងការអភិវឌ្ឍជំនាញ និងការកសាងមូលធនមនុស្សរយៈពេលវែង ជាពិសេសជំនាញ STEM។

ឯកឧត្តមរដ្ឋមន្ត្រីក៏បានលើកទឹកចិត្តឱ្យក្រសួង-ស្ថាប័ន សាកលវិទ្យាល័យ គ្រឹះស្ថានស្រាវជ្រាវ និងវិស័យឯកជន បន្តពង្រឹងកិច្ចសហការព​ន្លឿនគោលដៅវិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា ឆ្ពោះទៅការសម្រេចចក្ខុវិស័យកម្ពុជាឆ្នាំ ២០៥០៕