កន្ធាយ​ ជាប្រភេទសត្វចតុបាតដែលកំពុងមានតម្រូវការទីផ្សារ ខណៈដែលគេអាចយកទៅច្នៃចម្អិនធ្វើជាម្ហូបអាហារបានច្រើនច្រើនមុខ និងមានរសជាតិឆ្ងាញ់ ដូចជា ស៊ុប ចំហុយខ្ទឹមស ឬអប់គ្រឿង និងឆា ជាដើម។ ដោយសារតែវាមានតម្រូវការយ៉ាងដូច្នេះ បានជំរុញកសិករ ក៏ដូចជាវារីវប្បករមួយចំនួនងាកមកបង្កើតជាកសិដ្ឋានចិញ្ចឹមជាហូរហែដោយអាចទទួលបានចំណូល និងប្រាក់ចំណេញគួរសមក្រោយពេលលក់ចេញទៅលើទីផ្សារ។

លោក ចន បូរិន ម្ចាស់កសិដ្ឋានចិញ្ចឹមកន្ធាយកម្ពុជាមួយកន្លែង ស្ថិតក្នុងឃុំក្រញូង ស្រុកកំចាយមា ខេត្តព្រៃវែង បានរៀបរាប់ប្រាប់ឱ្យថា បច្ចុប្បន្ននេះ ចំពោះទីផ្សារសត្វកន្ធាយរបស់លោកហាក់មានភាពទូលំទូលាយ ដែលក្រៅពីផ្គត់ផ្គង់ទីផ្សារនៅក្នុងតំបន់នៃខេត្តព្រៃវែង លោកក៏ទទួលបានការបញ្ជាទិញពីបណ្តាអាហារដ្ឋាន និងភោជនីយដ្ឋាននៅតាមបណ្តាខេត្តមួយចំនួនផងដែរ ជាពិសេស ខេត្តដែលមានជនជាតិចិនរស់នៅច្រើន ដូចជា ភ្នំពេញ សៀមរាប ព្រះសីហនុ (កំពង់សោម) ជាដើម។

លោកបានបញ្ជាក់ឱ្យដឹងផងដែរថា កសិដ្ឋាន​ចិញ្ចឹម​កន្ធាយរបស់លោកទើបតែចាប់ដំណើរការ​នៅក្នុងអំឡុងឆ្នាំ២០១៩ប៉ុណ្ណោះ ដោយ​ផ្តើម​ចិញ្ចឹមដាក់កូនចំនួន៥០០ក្បាលចូលក្នុងស្រះតូចមួយប៉ុណ្ណោះ។ ប៉ុន្តែដោយសារតែកន្ធាយងាយស្រួលចិញ្ចឹម និងមានទីផ្សារល្អថែមទៀតនោះ លោកក៏បានពង្រីកការចិញ្ចឹមជាបន្តបន្ទាប់ ដែលរហូតមកដល់ពេលនេះបានបង្កើន ២៤ស្រះ នៅលើផ្ទៃដីជាង១០ហិកតា ដោយស្រះទំហំ ១០ម៉ែត្រ គុណនឹង ៣០ម៉ែត្រ អាចដាក់កន្ធាយបានជាមធ្យម ៥០០០ក្បាល។​ ​ក្នុងរយៈពេល ៦ខែ កន្ធាយ​ទាំងនេះនឹងធំធាត់​ដល់​ទម្ងន់ប្រមាណ ២តោនកន្លះ ហើយ​គេអាចចាប់​ផ្តើម​លក់​បាន ដោយកន្ធាយរស់មួយគីឡូលក់ក្នុងតម្លៃ៥ដុល្លារ។

ម្ចាស់កសិដ្ឋានចិញ្ចឹមកន្ធាយរូបនេះបានបញ្ជាក់ថា កន្ធាយមួយស្រះទម្ងន់២តោនកន្លះ ​អាចផ្តល់ចំណូល​បានចំនួន ១២ ៥០០ដុល្លារ ដែលយ៉ាងហោចណាស់ លោកអាចរកផល​ចំណេញបានពីការចិញ្ចឹម និងលក់ប្រមាណ ៦០០០ ដុល្លារ។

លោក ថាយ សុមុនី ប្រធាននាយកដ្ឋានអភិវឌ្ឍន៍វារីវប្បកម្ម នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា កន្ធាយកម្ពុជាបាន​ផ្គត់​ផ្គង់​ទីផ្សារក្នុងស្រុក​ប្រមាណ ៤០ភាគរយ ខណៈដែលមានតម្រូវការខ្ពស់បន្ទាប់ពីបង្កងទឹកសាប។

លោកបានមានប្រសាសន៍ថា ៖

«យើងជំរុញការងារចិញ្ចឹមកន្ធាយនឹង ដោយសារមានទីផ្សារដូចកង្កែបចឹង ឥឡូវយើងឃើញថា បងប្អូនកសិករយើងបានធ្វើការងារ និងយកចិត្តទុកដាក់ ហើយបានឈរជើងគួរសម ក្នុងចន្លោះពី ៣០ ទៅ ៤០ភាគរយដែលអាចផ្គត់ផ្គង់ក្នុងស្រុក»។

បើតាម​មន្ត្រីក្រសួងកសិកម្មដដែល បានប្ជាក់ថា ៖ មុននឹងចិញ្ចឹមកន្ធាយ កសិករត្រូវរៀបចំស្រះឱ្យស្អាតជាមុន យកសំណាញ់ខៀវហុំព័ទ្ឋឱ្យបានជិតកុំឱ្យកន្ធាយវៀរចេញរួច បន្ទាប់​មកគេត្រូវពិនិត្យទឹកទៅតាមកម្រិត PH ពិនិត្យកំហាប់អំបិល កំហាប់បាស់ឱ្យត្រូវតាមស្តង់ដារ និងត្រូវដាំរុក្ខជាតិទឹកដើម្បីធ្វើជាជំរកសម្រាប់កន្ធាយជាមុនសិន។ ពេលរៀបចំស្រះរួច គេត្រូវយកកូនកន្ធាយដែលមានអាយុ ២ខែ មកដាក់និងត្រូវផ្តល់ចំណីឱ្យបានទៀតទាត់ ត្រឹមរយៈពេល៦ខែ កសិករអាចចាប់កន្ធាយលក់នៅលើទីផ្សារបាន៕