ទីក្រុងឆ្លាតវៃ ឬ Smart City ជាអនាគតនៃការរស់នៅរបស់មនុស្សយើងជៀសមិនផុតឡើយដើម្បីអាចសម្របខ្លួនទៅនឹងការប្រើប្រាស់ធនធានប្រកបដោយនិរន្តភាព និងប្រកបដោយភាពងាយស្រួលបំផុតក្នុងកិច្ចការងារប្រកបមុខរបរ និងជីវិតធ្វើការងារប្រចាំថ្ងៃ។

Smart City ប្រើប្រាស់កម្មវិធីជាច្រើន រួមទាំងចំណុចប្រទាក់ក្រឡារបស់អ្នកប្រើប្រាស់ និងបណ្តាញទំនាក់ទំនងរួមជាមួយនឹង Internet of Things (IoT) ដើម្បីផ្តល់ដំណោះស្រាយដែលបានតភ្ជាប់សម្រាប់សាធារណៈជន។ ក្រៅពីនោះយើងក៏នឹងអាចមើលឃើញនូវបច្ចេកវិទ្យាទំនើប និងថ្មីៗជាច្រើនផ្សេងទៀតផងដែរក្នុងដំណើរការនៃការអភិវឌ្ឍ និងកសាងទីក្រុង។

វិស័យសំខាន់ៗស្ទើរទាំងអស់នឹងត្រូវសម្របខ្លួនជាមួយនឹងបច្ចេកវិទ្យាឆ្លាតវ៉ៃចាប់រាប់តាំងពីវិស័យកសិកម្មទៅដល់វិស័យសេដ្ឋកិច្ច និងពាណិជ្ជកម្ម ឬសូម្បីតែវិស័យហេដ្ឋារចនាសម្ព័ន្ធក្តី។

ហេដ្ឋារចនាសម្ព័ន្ធបែបឆ្លាតវៃ ឬ Smart Infrastructure ក្នុងន័យនេះនឹងមិនសំដៅតែទៅលើរូបវន្តផ្នែករឹងនោះទេ ប៉ុន្តែវាក៏ជាការរៀបចំប្រព័ន្ធគ្រប់គ្រងផ្នែកទន់ច្របាច់បញ្ចូលគ្នាផងដែរ ដើម្បីអាចឲ្យការងារនៃការសម្រេចចិត្តបានធ្វើឡើងកាន់តែល្អប្រសើរ និងលឿនជាងមុន ពីព្រោះថាអ្នកគ្រប់គ្រងនឹងអាចធ្វើការត្រួតពិនិត្យបានច្បាស់ការវាស់វែងបានលឿនការវិភាគបានត្រឹមត្រូវព្រមទាំងការទំនាក់ទំនងគ្នាបានច្បាស់លាស់ និងក៏ដូចជាការប្រមូលទិន្នន័យពាក់ព័ន្ធផងដែរ។

មានការបែងចែកប្រភេទហេដ្ឋារចនាសម្ព័ន្ធបែបឆ្លាតវ៉ៃអាស្រ័យទៅលើទំហំនៃទីក្រុងដែលត្រូវកសាង និងទំហំនៃការងារដែលប្រើប្រាស់មនុស្សសម្រាប់គ្រប់គ្រង ប៉ុន្តែខាងក្រោមនេះគឺជាប្រភេទខ្លះៗដែលត្រូវបានអ្នកជំនាញរបស់ប្រទេសអង់គ្លេស Royal Academy of Engineering of the United Kingdom កំណត់ជាប្រភេទ Smart Infrastructure ដែលគេអាចយកមកប្រើប្រាស់បាន ៖

Smart infrastructure មិនត្រឹមតែប្រមូលទិន្នន័យ និងសម្រេចចិត្តបានដោយស្វ័យប្រវត្តិនោះទេ ប្រព័ន្ធបែបនេះថែមទាំងអាច់ធ្វើការសម្របខ្លួន និងផ្លាស់ប្តូរលក្ខខណ្ឌជាច្រើនទៀតតាមការចង់បានទៀតផង។

Smart networks ជាប្រព័ន្ធកាន់តែទំនើបដោយអាចភ្ជាប់ទំនាក់ទំនងជាមួយនឹងអត្តចរិតរបស់អ្នកប្រើប្រាស់ និងសន្និដ្ឋានទៅលើសកម្មភាពរបស់អ្នកប្រើប្រាស់ដែលវាបានធ្វើឲ្យការសម្រេចចិត្តទាំងឡាយគឺមានចំណុចខ្វះខាតតិចតួចបំផុត។

Smart buildings សំដៅទៅលើអគារទាំងឡាយដែលសាងសង់ឡើងដោយមានបំពាក់ និងតម្លើងជាមួយនឹងបច្ចេកវិទ្យាទំនើបជាច្រើនដែលអាចដំណើរការការងារខាងក្នុងអគារដោយស្វ័យប្រវត្តិ និងការសម្រេចចិត្តដោខ្លួនឯងរួមទាំងសីតណ្ហភាពអំពូលសន្តិសុខ និងប្រព័ន្ធសន្តិសុខផ្សេងទៀតជាដើម។

Smart public infrastructure ជាប្រព័ន្ធឆ្លាតវ៉ៃដែលរាប់បញ្ចូលជាមួយនឹងឧបករណ៍អេឡិចត្រូនិកដែលអាចធ្វើការផ្លាស់ប្តូរព័ត៌មាន ហើយអាចកែលំអមុខងារ និងការសម្រេចចិត្តបានកាន់តែប្រសើរដោយខ្លួនឯង។

Smart beaches បច្ចុប្បន្នគម្រោងដំណើរការបែប smart beaches បានកំពុងតែដំណើរការនៅតាមទីតាំងជាច្រើនរួចមកហើយ ដូចជានៅអេស្បាញជាដើម។ គម្រោងបែបនេះមានរួមបញ្ចូលទាំងការប្រើប្រាស់យន្តហោះដ្រូនការប្រើប្រាស់ sensors ការចតរថយន្តបែបឆ្លាតវ៉ៃ និងក៏ដូចជាការចរចាបែបឆ្លាតវ៉ៃជាដើម។

អ្នកជំនាញជឿជាក់ថា Smart infrastructure គឺជាចំណែកដ៏ចាំបាច់ក្នុងការចូលរួមចំណែកកសាងទីក្រុងឆ្លាតវ៉ៃនាពេលអនាគត ពីព្រោះតែក្រៅតែជួយសម្រួលការងារកាន់តែងាយស្រួល និងមានភាពប្រាកដប្រជាខ្លាំងចំពោះការសម្រេចិត្តហើយនោះ វាក៏ថែមទាំងអាចជួយដល់ការសន្សសំចៃការចំណាយថ្លៃដើមចំពោះសេវាកម្ម និងប្រតិបត្តិការនានាទាំងតម្លៃ និងពេលវេលា។

ហេដ្ឋារចនាសម្ព័ន្ធឆ្លាតវៃក៏អាចបង្កើនបទពិសោធន៍ចំពោះអ្នកប្រើប្រាស់ និងផ្តល់សេវាកម្មដែលសម្របទៅនឹងតម្រូវការផ្លាស់ប្តូររបស់អ្នកប្រើប្រាស់។ ឧទាហរណ៍មួយនៅក្នុងទីក្រុងឆ្លាតវៃអាចជា APP ឬ WhatsApp ទីក្រុង ដែលពលរដ្ឋអាចប្រើដើម្បីស្វែងរកផលិតផលនៅលើការលក់ ឬព័ត៌មានក្នុងស្រុក និងធ្វើអន្តរកម្មជាមួយសេវាកម្មមួយចំនួនទោះបីជានៅទីតាំងផ្សេងគ្នាក្តី។

អ្វីដែលជាលក្ខណៈពិសេសសម្រាប់ដំណើរការនេះវានឹងអាចជួយដល់កិច្ចការងារគ្រប់គ្រង និងប្រើប្រាស់ធនធានទាំងអស់ប្រកបដោយនិរន្តភាពបំផុតបូករួមទាំងការកែច្នៃកាកសំណល់ និងការគ្រប់គ្រងការប្រើប្រាស់ថាមពលនៅក្នុងទីក្រុងផងដែរ៕