សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋាភិបាលវេណេស៊ុយអេឡា និងក្រុមប្រឆាំងបានឯកភាពគ្នាទាមទារយកមាសបម្រុងចំនួន ៣១ តោន ដែលរក្សាទុកនៅធនាគារកណ្តាលអង់គ្លេសអស់រយៈពេលជិតប្រាំបីឆ្នាំមកហើយ ដោយមានតម្លៃប្រមាណ ៤ ពាន់លានដុល្លារ។
យោងតាមការរាយការណ៍របស់ Venezuela Analysis កិច្ចព្រមព្រៀងនេះត្រូវបានសម្រេចឡើង បន្ទាប់ពីរដ្ឋាភិបាលដែលដឹកនាំដោយលោកស្រី Delcy Rodríguez និងក្រុមប្រឆាំងបានចរចាគ្នាអស់រយៈពេលពីរសប្តាហ៍ ដោយមានសហរដ្ឋអាម៉េរិកធ្វើជាអន្តរការី។
មាសទាំងនេះត្រូវបានរក្សាទុកនៅធនាគារកណ្តាលអង់គ្លេសតាំងពីឆ្នាំ ២០១៨ ហើយភាគីទាំងពីរមានបំណងយកវាមកប្រើជាមូលនិធិសម្រាប់ការសាងសង់ឡើងវិញ បន្ទាប់ពីវេណេស៊ុយអេឡារងគ្រោះរញ្ជួយដីកាលពីថ្ងៃទី ២៤ ខែមិថុនា ដែលបានបណ្តាលឱ្យមនុស្សស្លាប់ជាង ៦,០០០ នាក់។
យោងតាមសេចក្តីថ្លែងការណ៍រួមដែលចេញផ្សាយកាលពីថ្ងៃពុធ មូលនិធិនេះនឹងត្រូវប្រើប្រាស់ដើម្បីគាំទ្រដល់ការស្តារឡើងវិញនៅតំបន់ដែលរងផលប៉ះពាល់ពីគ្រោះរញ្ជួយដី។
លោក Ramón López សមាជិកប្រតិភូមកពីភាគីប្រឆាំង បាននិយាយថា ការចរចាដើម្បីដោះស្រាយបញ្ហាមាសនេះធ្វើឡើងក្រោមផែនការ និងយន្តការគ្រប់គ្រងចាំបាច់ ដើម្បីធានាឱ្យមានការប្រើប្រាស់មូលនិធិប្រកបដោយតម្លាភាព។
លោកបញ្ជាក់ថា ថវិកានឹងផ្តោតលើការសាងសង់លំនៅឋាន មណ្ឌលសុខភាព និងសាលារៀននៅតាមតំបន់ដែលរងផលប៉ះពាល់។ ដើម្បីទប់ស្កាត់ការបន្លំ ឬការលួច មូលនិធិនឹងត្រូវដាក់ក្នុងគណនីរបស់ក្រសួងរតនាគារអាម៉េរិក និងស្ថិតក្រោមការធ្វើសវនកម្មដោយក្រុមហ៊ុនអន្តរជាតិ។
លោក López ក៏បានបញ្ជាក់ថា កិច្ចព្រមព្រៀងរវាងរដ្ឋាភិបាល និងក្រុមប្រឆាំងលើការដោះស្រាយមាសនេះ គឺដាច់ដោយឡែកពីការចរចាផ្នែកនយោបាយ ដូចជាការកែទម្រង់តុលាការកំពូល ការរៀបចំការបោះឆ្នោត និងការពង្រឹងប្រព័ន្ធតុលាការ។
ក្រៅពីមាសបម្រុងដែលរក្សាទុកនៅអង់គ្លេស វេណេស៊ុយអេឡាក៏បានអំពាវនាវឱ្យមានការបញ្ចេញទ្រព្យសម្បត្តិផ្សេងទៀតដែលត្រូវបានបង្កក រួមមានសិទ្ធិដកប្រាក់ពិសេស (SDRs) ចំនួន ៤,៥ ពាន់លានដុល្លារនៅមូលនិធិរូបិយវត្ថុអន្តរជាតិ (IMF) និងគណនីធនាគាររបស់ស្ថាប័នរដ្ឋមួយចំនួននៅសហរដ្ឋអាម៉េរិក និងអឺរ៉ុប។
សេដ្ឋកិច្ចវេណេស៊ុយអេឡាបានប្រឈមនឹងសម្ពាធជាច្រើនឆ្នាំ ដោយសារអំពើពុករលួយក្រោមការដឹកនាំរបស់លោក Nicolás Maduro និងទណ្ឌកម្មរបស់សហរដ្ឋអាម៉េរិក ខណៈគ្រោះរញ្ជួយដីថ្មីៗក៏បានបន្ថែមបន្ទុកដល់សេដ្ឋកិច្ចរបស់ប្រទេសនេះ។
ធនាគារកណ្តាលវេណេស៊ុយអេឡាបានរាយការណ៍ថា អតិផរណាបានកើនឡើងដល់ ១៩,៩ ភាគរយក្នុងខែកក្កដា ពី ១៣,៨ ភាគរយក្នុងខែមិថុនា។
ចាប់តាំងពីឆ្នាំ ២០១៨ រដ្ឋាភិបាលអង់គ្លេសបានបដិសេធមិនទទួលស្គាល់រដ្ឋាភិបាលរបស់លោក Nicolás Maduro និងមិនព្រមប្រគល់មាសបម្រុងរបស់វេណេស៊ុយអេឡាត្រឡប់ទៅប្រទេសវិញ។ ក្នុងអំឡុងវិបត្តិកូវីដ-១៩ អាជ្ញាធរវេណេស៊ុយអេឡាធ្លាប់បានដាក់ពាក្យបណ្តឹងតាមផ្លូវច្បាប់ ដើម្បីទាមទារមាសទាំងនោះ ដោយមានផែនការបញ្ជូនទ្រព្យសម្បត្តិតាមរយៈអង្គការសហប្រជាជាតិ ប៉ុន្តែត្រូវបានតុលាការអង់គ្លេសបដិសេធ។
ទោះជាយ៉ាងណា ក្រោមកិច្ចព្រមព្រៀងថ្មី មាសទាំង ៣១ តោននឹងមិនត្រូវបានបញ្ជូនត្រឡប់ទៅទីក្រុងការ៉ាកាសដោយផ្ទាល់នោះទេ។ មូលនិធិដែលពាក់ព័ន្ធនឹងស្ថិតក្រោមការគ្រប់គ្រងរបស់ក្រសួងរតនាគារអាម៉េរិក និងការធ្វើសវនកម្មដោយក្រុមហ៊ុនអន្តរជាតិ ដើម្បីធានាតម្លាភាពក្នុងការប្រើប្រាស់។
ការរៀបចំនេះកើតឡើង ខណៈរដ្ឋបាលលោក Donald Trump បានគ្រប់គ្រងលើប្រាក់ចំណូលពីការនាំចេញរបស់វេណេស៊ុយអេឡា ជាពិសេសចំណូលពីការលក់ប្រេងឆៅ ដោយពេលវេលា និងទំហំថវិកាដែលត្រូវបញ្ចេញ ស្ថិតក្រោមការសម្រេចរបស់មន្ត្រីសេតវិមាន។
រដ្ឋបាលលោក Trump ក៏បានបន្តរក្សាទណ្ឌកម្មប្រឆាំងនឹងវេណេស៊ុយអេឡា ដោយមានការបន្ធូរបន្ថយខ្លះ ដើម្បីសម្រួលឱ្យក្រុមហ៊ុនលោកខាងលិចមួយចំនួនអាចចុះកិច្ចព្រមព្រៀងក្នុងវិស័យថាមពលជាមួយទីក្រុងការ៉ាកាស៕
Account
Security
Favourite Content