បន្ទាយមានជ័យ ៖ ក្នុងកម្មវិធីផ្សព្វផ្សាយស្ដីពីប្រាក់រៀល ប្រព័ន្ធបាគង និងប្រព័ន្ធ KHQR នៅខេត្តបន្ទាយមានជ័យកាលពីថ្ងៃដើមសប្ដាហ៍នេះ មន្ត្រីជាន់ខ្ពស់ធនាគារជាតិនៃកម្ពុជាបានអំពាវនាវដល់ភាគីពាក់ព័ន្ធ និងសា​ធារណជន ចូលរួមប្រើប្រាស់ប្រាក់រៀលឱ្យបានទូលំទូលាយ ដើម្បីបង្កើនការគ្រប់គ្រងគោលនយោបាយម៉ាក្រូសេដ្ឋកិច្ច និងធ្វើឱ្យមាននិរន្តរភាពនៃការអភិវឌ្ឍន៍សេដ្ឋកិច្ចរបស់ប្រទេស។

ឯកឧត្តម យឹម លាត ទេសាភិបាលរងធនាគារជាតិនៃកម្ពុជា បានមានប្រសាសន៍ថា ការប្រើប្រាស់ប្រាក់រៀលមានការកើនឡើងគួរឱ្យកត់សម្គាល់នាពេលថ្មីៗនេះ ដោយសារភាគីពាក់ព័ន្ធជាច្រើន ចូលរួមលើកកម្ពស់ប្រាក់រៀល ប៉ុន្តែដុល្លារូបនីយកម្មនៅតែមានកម្រិតខ្ពស់ធៀបនឹងប្រាក់រៀលក្នុងសេដ្ឋកិច្ច។

ឯកឧត្តម យឹម លាត បានបន្តថា៖

«ដូច្នេះហើយប្រសិនបើអ្នកលក់ និងអ្នកទិញប្រើប្រាក់រៀលដូចគ្នា វាអាចជួយធ្វើឱ្យប្រតិបត្តិការបានលឿន និងងាយស្រួលដោយមិនចាំបាច់បារម្ភពីអត្រាប្តូរប្រាក់ឡើយ»។

លទ្ធផលនៃការសិក្សារបស់ធនាគារជាតិនៃកម្ពុជា ជាមួយ UNDP ក្នុងឆ្នាំ២០២៣ បានបង្ហាញថា កម្មកររោងចក្រដែលរស់នៅតាមបណ្តាខេត្តបានប្រើប្រាស់ប្រាក់រៀលរហូតដល់ ៩២ ភាគរយនៃការចំណាយប្រចាំថ្ងៃ ជាពិសេសលើថ្លៃស្នាក់នៅ ទឹក ភ្លើង ការធ្វើដំណើរ អាហារ សំលៀកបំពាក់ និងថ្លៃថ្នាំពេទ្យ ខណៈដែលកម្មករនៅទីក្រុងចំណាយជាប្រាក់រៀលចំនួន ៨២ ភាគរយ។

ឯកឧត្តម ទេសាភិបាលរងបានឱ្យដឹងថា ប្រាក់រៀលត្រូវបានប្រើប្រាស់ឡើងវិញអស់រយៈពេល ៤៤ ឆ្នាំមកហើយ ហើយរយៈពេល ២ទសវត្សរ៍ចុងក្រោយនេះ កម្ពុជាទទួលបានសុខសន្តិភាពពេញលេញ និងកំណើនសេដ្ឋកិច្ច។

ឯកឧត្តមបានសង្កត់ធ្ងន់ថា ៖

«តើយើងធ្លាប់បានឃើញរូបិយប័ណ្ណធ្លាក់ចុះក្រោម ៤,០០០ រៀល ក្នុងមួយដុល្លារ ឬឡើងដល់ជាង ៤២០០រៀល ធៀបក្នុងមួយដុល្លារដែរឬទេ? គឺអត់ទេ យើងមិនដែលឃើញមានទេ។ ដូច្នេះយើងអាចនិយាយបានថា ប្រាក់រៀលនៅរក្សាស្ថិរភាពបាន។ ទោះជាយ៉ាងនេះក្តី ការប្រើប្រាស់ប្រាក់ដុល្លារនៅតែបន្តកើនឡើងខ្ពស់ បើធៀបនឹងប្រាក់រៀល ជាពិសេសនៅរាជធានីភ្នំពេញ និងបណ្តាទីរួមខេត្ត។»

ក្នុងឱកាសនេះ ឯកឧត្តម ទេសាភិបាលរង បានអំពាវនាវដល់ក្រសួង ស្ថាប័ន រោងចក្រ សហគ្រាស គ្រឹះស្ថានធនាគារ និងហិរញ្ញវត្ថុ ជាពិសេសសាធារណជនទូទៅ បន្តប្រើប្រាស់ប្រាក់រៀលឱ្យបានទូលំទូលាយ រួមទាំងការទូទាត់ជាប្រាក់រៀល ការដាក់ស្លាកតម្លៃជាប្រាក់រៀល សន្សំប្រាក់រៀល និងជំរុញឱ្យមានការប្រើប្រាស់ប្រាក់រៀលបន្ថែមទៀតនៅទូទាំងប្រទេស។

បណ្ឌិត ហុង វណ្ណៈ អ្នកជំនញសេដ្ឋកិច្ចនៃរាជបណ្ឌិត្យសភាកម្ពុជា បានឱ្យដឹងថា ដោយសារដុល្លារូបនីយកម្ម ការប្រែប្រួលនៃអត្រាប្តូរប្រាក់មានឥទ្ធិពលផ្ទាល់ និងឆាប់រហ័សលើអតិផរណានៅកម្ពុជា ព្រោះនៅពេលដែលប្រាក់រៀលធ្លាក់ចុះ តម្លៃទំនិញ និងសេវាកម្មនឹងកើនឡើងភ្លាមៗ។ ដូច្នេះហើយ ការរក្សាស្ថិរភាពនៃអត្រាប្តូរប្រាក់រៀលបានរួមចំណែកយ៉ាងសំខាន់ក្នុងការកាត់បន្ថយអតិផរណា

លោកបណ្ឌិត បានមានប្រសាសន៍ថា៖

« ការពង្រឹងការប្រើប្រាស់ប្រាក់រៀលឱ្យកាន់តែទូលំទូលាយ គឺចាំបាច់ដើម្បីកាត់បន្ថយឥទ្ធិពលនៃកត្តាខាងក្រៅមកលើកម្រិតតម្លៃនៅកម្ពុជា និងពង្រឹងគោលនយោបាយរូបិយវត្ថុ ដើម្បីគ្រប់គ្រងស្ថិរភាពតម្លៃ និងជំរុញកំណើនសេដ្ឋកិច្ចឱ្យកាន់តែមានប្រសិទ្ធភាព»។

លោកបណ្ឌិតបានបន្ថែមថា ៖

«ប្រទេសណាក៏ដោយ តែងតែប្រើប្រាស់រូបិយវត្ថុរបស់ប្រទេសខ្លួន ដូចជា ប្រទេសកម្ពុជា គឺជារឿងសំខាន់ក្នុងការប្រើប្រាស់ប្រាក់រៀល គឺរូបិយវត្ថុដ៏សំខាន់របស់ប្រទេសជាតិមួយ និងជាគុណតម្លៃ ដែលបង្ហាញពីឯករាជ្យភាព វប្បធម៌ សន្តិភាព កិច្ចសហប្រតិបត្តិការរវាងរដ្ឋ និងឯកជន, រវាងប្រជាជន និងប្រជាជន។ ​​ ការប្រើប្រាស់ប្រាក់រៀលកាន់តែច្រើនក្នុងសេដ្ឋកិច្ច ក៏អាចជួយបង្កើនទុនបម្រុងអន្តរជាតិក្នុងកម្រិតបច្ចុប្បន្ន ដែលនឹងពង្រឹងទំនុកចិត្តរបស់អ្នកវិនិយោគ និងសាធារណជន ចំពោះស្ថិរភាពសេដ្ឋកិច្ច និងហិរញ្ញវត្ថុរបស់កម្ពុជា»។

យ៉ាងណាក៏ដោយ លោកបណ្ឌិត ហុង វណ្ណៈ ក៏បានបង្ហាញពីទស្សនៈជឿជាក់លើអ្នកគ្រប់គ្រង អ្នកសេដ្ឋកិច្ចទាំងអស់ នឹងពិចារណាគិតគូរហ្មត់ចត់ ក្នុងការជំរុញការប្រើប្រាស់រូបិយវត្ថុជាតិឱ្យកាន់តែទូលាយ ដោយផ្អែកទៅលើការវិវត្តនៃសេដ្ឋកិច្ចរបស់កម្ពុជា ។ បើសិនអាចខិតខំវិវត្តឈានទៅយកដុល្លារូបនីយកម្មពីចរន្តប្រើប្រាស់នៅក្នុងទីផ្សារសេដ្ឋកិច្ចកម្ពុជាបាន ហើយអាចពង្រីកពង្រឹងសេដ្ឋកិច្ចរបស់ខ្លួនឱ្យកាន់តែរឹងមាំ នោះពន្លឺ និងឥទ្ធិពលនៃប្រាក់រៀលនឹងកើនឡើង៕