អាជីវកម្ម និងក្រុមហ៊ុនរកស៊ីបែបគ្រួសា ( Family Business )ជាឆ្អឹងខ្នងមួយដ៏សំខាន់នៃភាពរីកចម្រើនសេដ្ឋកិច្ចរបស់ប្រទេសមួយ ប៉ុន្តែទោះបីជាមានភាពជោគជ័យខ្លាំងក្នុងពេលបច្ចុប្បន្ន ប៉ុន្តែវាក៏មិនប្រាកដថានឹងឈររឹងម៉ាំ ហើយទទួលបានភាពជោគជ័យខ្លាំងដូចគ្នានោះដែរ។

បញ្ហាសំខាន់តែមួយគត់ដែលគេសង្កេតឃើញថាជាកត្តាជះឥទ្ធិពលដ៏សំខាន់ទៅលើអនាគតរបស់អាជីវកម្ម ឬក្រុមហ៊ុនបែបគ្រួសារទាំងនោះ គឺការធ្វើផែនការបន្តវេនដ៏សមរម្យមួយ ឬអាចហៅថា Succession Plan។

ផែនការបន្តវេនជាផ្លូវការ ឬមិនផ្លូវការ Formal/Informal ចាំបាច់ណាស់ដែលនឹងអាចកំណត់បាននូវវាសនារបស់ក្រុមហ៊ុន និងរបររកស៊ី ប៉ុន្តែមានក្រុមហ៊ុនច្រើនណាស់ដែលមិនបានគិតគូរដល់បញ្ហានេះ ឬមានផែនការក្នុងរយៈពេល ៣ ទៅ ៥ ឆ្នាំទៅមុខទៀត។

របាយការណ៍ស្រាវជ្រាវដែលបង្ហាញដោយ WEFORUM បានរកឃើញថា គិតត្រឹមតែប្រទេសអាមេរិកប៉ុណ្ណោះ អាជីវកម្ម និងក្រុមហ៊ុនបែបគ្រួសារដល់ទៅប្រមាណ ៦១ភាគរយមិនទាន់បានគិតគូរទៅដល់ផែនការបន្តវេននៅឡើយទេ ខណៈដែលក្រុមហ៊ុនទាំងនោះស្ថិតនៅក្នុងចំណែកសេដ្ឋកិច្ច ឬ GDP របស់អាមេរិកដល់ទៅ ៦៤ភាគរយ និងជាចំណែកនៃការបង្កើតការងារថ្មីដល់ទៅ៧៨ភាគរយ។

របាយការណ៍ដដែលរកឃើញដែរថា រយៈពេល ៣ ទៅ ៥ឆ្នាំខាងមុខ មានក្រុមហ៊ុនប្រមាណជា៤៦ភាគរយប៉ុណ្ណោះដែលបានគិតគូរអំពីផែនការបន្តវេន ប៉ុន្តែមិនទាន់បានសម្រេចចិត្តជាផ្លូវការនៅឡើយទេដោយភាគច្រើនពួកគេកំពុងខ្វាយខ្វល់តែអំពីបញ្ហារកប្រាក់ចំណូលការបង្កើនទ្រព្យ, ការបង្កើនទីផ្សារ, ការបង្កើនគុណភាពក្រុមហ៊ុន និងការបង្កើនទំនុកចិត្តអតិថិជន។

ផែនការបន្តវេន ឬ Succession Plan ពិតជាមានសារៈសំខាន់ណាស់សម្រាប់អាយុជីវិត និងភាពរីកចម្រើននៃក្រុមហ៊ុន ក៏ដូចជាអាជីវកម្មឲ្យបានច្រើនជំនាន់ ពីព្រោះថាមិនត្រឹមតែជាផែនការបន្ទាន់សម្រាប់គ្រាមានអាសន្ន ឬការចូលនិវត្តន៍ប៉ុណ្ណោះទេ ប៉ុន្តែក៏ជាវិធានការដើម្បីធានាថាស្ថាប័នរបស់អ្នកបានត្រៀមបេក្ខភាពដែលមានសមត្ថភាព សម្រាប់តួនាទីសំខាន់ៗរួចរាល់នៅពេលវេលាខ្លីណាមួយតាមផែនការ ឬដោយមិនបានគ្រោងទុក។

ផែនការប្រភេទនេះអាចជួយអ្នកឱ្យតម្រឹមយុទ្ធសាស្ត្រទេពកោសល្យរបស់អ្នកជាមួយនឹងយុទ្ធសាស្ត្រ និងចក្ខុវិស័យអាជីវកម្មរបស់អ្នក កាត់បន្ថយហានិភ័យនៃការបាត់បង់ចំណេះដឹង និងជំនាញរបស់ស្ថាប័ន កាត់បន្ថយការរំខាន និងរក្សាការបន្តនៃប្រតិបត្តិការ បង្កើនការចូលរួមរបស់បុគ្គលិក និងភាពស្មោះត្រង់ ជំរុញវប្បធម៌នៃការសិក្សា និងការអភិវឌ្ឍន៍ ហើយថែមទាំងចំណេញពេលវេលា និងថវិកាលើការជួល និងបណ្តុះបណ្តាលបេក្ខជនខាងក្រៅថែមទៀតផង។

ដូច្នេះការត្រៀមពេលវេលាឲ្យបានគ្រប់គ្រាន់ដើម្បីរៀបចំផែនការបន្តវេននឹងធ្វើឲ្យផែនការអនាគតសម្រាប់ជីវិតអាជីវកម្ម និងក្រុមហ៊ុនរបស់អ្នកកាន់តែប្រសើរ និងមានភាពរឹងម៉ាំទោះបីជាស្ថានភាពទីផ្សារសេដ្ឋកិច្ចប្រទេសជាតិនឹងប្រែប្រួលខ្លាំងយ៉ាងណាក៏ដោយ៕