សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំបន់ជុំវិញ អគារទីស្ដីការក្រសួងរៀបចំដែនដីនគរូបនីយកម្ម និងសំណង់ ប៉ែកខាងជើងរាជធានីភ្នំពេញ កំពុងតែមានភាពទាក់ទាញ ក្នុងការអភិវឌ្ឍលំនៅឋានតម្លៃខ្ពស់សម្រាប់អ្នកចំណូលខ្ពស់ ជាក់ស្ដែងបច្ចុប្បន្ននេះ លំនៅឋានប្រណីតៗនៅតំបន់នោះ បានលេចរូបរាងឡើងជាបន្តបន្ទាប់ និងមានមនុស្សចូលទៅរស់នៅជាបន្តបន្ទាប់ផងដែរ ។
នៅជាប់នឹងក្រសួងរៀបចំដែនដីនគរូបនីយកម្មនិងសំណង់នាពេលនេះ គេឃើញបុរីមួយដែលអភិវឌ្ឍន៍លំនៅឋានប្រណីតនិងបណ្ដុំទៅដោយអ្នកមានជីវភាពធូរធារស់នៅ គឺបុរី ហ្គ្រេនភ្នំពេញ ដែលត្រូវបានក្រុមហ៊ុនលំដាប់យក្សជីបម៉ុងទិញយកកំពុងតែពង្រីកខ្លួនជាបន្តបន្ទាប់ និងមានបុរីជាច្រើនបាននិងកំពុងអភិវឌ្ឍន៍យ៉ាងមមាញឹក ។
នៅជុំវិញទីស្ដីការក្រសួងរៀបចំដែនដីនគរូបនីយកម្ម និងសំណង់នេះដែរ គេឃើញមានការអភិវឌ្ឍលើហេដ្ឋារចនាសម្ព័ន្ធថ្មីៗនិងធំទូលាយ ហើយក៏ឃើញថានៅមុខក្រសួងរៀបចំដែនដីនគរូបនីយកម្មនិងសំណង់នោះដែរ មានភោជនីយដ្ឋាន អាហារដ្ឋាន កន្លែងកម្សាន្ត ជាច្រើនត្រូវបានលេចរូបរាងនិងមានមនុស្សទៅកម្សាន្តធ្វើឱ្យតំបន់នេះមើលទៅដូចជាទីប្រជុំជន និងបណ្ដុំមនុស្សច្រើនកុះករមួយអញ្ចឹងដែរ ។
លោកឧកញ៉ាឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជាបានមានប្រសាសន៍លើកឡើងថា នៅពេលអគាររដ្ឋដាក់ទីតាងនៅទីណា ពេលនោះ ការអភិវឌ្ឍហេដ្ឋារចនាសម្ព័ន្ធដូចជាផ្លូវ ភ្លើង និងទឹកតែងតែតភ្ជាប់ទៅដល់ទីនោះ ដូច្នេះអ្នកវិនិយោគនឹងចូលទៅកាន់តំបន់នោះដើម្បីអភិវឌ្ឍន៍គម្រោងរបស់ខ្លួនផងដែរ ។ ជាក់ស្ដែងទីតាំងទីស្ដីការក្រសួងរៀបចំដែនដីនគរូបនីយកម្ម និងសំណង់ នៅជុំវិញនោះសុទ្ធតែជាផ្លូវធំៗងាយស្រួលក្នុងការធ្វើដំណើររបស់ប្រជាពលរដ្ឋ ។
លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថាតាមពិតទៅតំបន់នោះ មានភាពទាក់ទាញលើគម្រោងអភិវឌ្ឍន៍លំនៅឋានតម្លៃខ្ពស់ៗយូរមកហើយ ប៉ុន្តែនៅរយៈពេលប៉ុន្មានឆ្នាំចុងក្រោយនេះ ឃើញថាវាកាន់តែមានភាពទាក់ទាញបន្ថែមទៀត ។ លោកថា៖
« អ្វីដែលធ្វើឱ្យអ្នកអភិវឌ្ឍន៍ចូលទៅកាន់តំបន់នោះ កាន់តែច្រើន ដោយសារតែប្រព័ន្ធហេដ្ឋារចនាសម្ព័ន្ធ ផ្លូវ ភ្លើង ទឹក និងលូរំដោះទឹកបានរៀបចំរួចរាល់កាលពីយូរមកហើយ ហើយតាមការជាក់ស្ដែងពេលមានភ្លៀងធ្លាក់ម្ដងៗមិនដែលលឺថាតំបន់លិចទឹកនោះឡើយ ដូច្នេះហើយទើបមានអ្នកអភិវឌ្ឍន៍កាន់តែច្រើនចូលទៅអភិវឌ្ឍន៍ដើម្បីផ្គត់ផ្គង់ជូនអតិថិជន » ។
លោកបន្តថានៅតំបន់នេះក៏មានផ្លូវធំៗទូលាយ អាចតភ្ជាប់ទៅកាន់ផ្លូវជាតិសំខាន់ៗ តាមរយៈផ្លូវក្រវាត់ក្រុង ហើយមិនថាគេមិនថាយើងឡើយ តែងចង់បានផ្ទះរស់នៅ ហើយងាយស្រួលក្នុងការចេញចូលក្រុង និងចេញចូលទៅតាមខេត្តដូចជាទៅកាន់លំហែរបស់ខ្លួននៅតាមខេត្តនានា ។
លោកបន្ថែមថា មួយរយៈចុងក្រោយនេះ មានគម្រោងបុរីធំៗជាច្រើន បានចាប់ផ្ដើមអភិវឌ្ឍន៍គម្រោងរបស់ខ្លួនសម្រាប់អ្នកមានជីវភាពធូរធាប៉ុន្តែវារឹតតែល្អប្រសើរបើសិនជាអ្នកអភិវឌ្ឍន៍ចាប់ផ្ដើមអភិវឌ្ឍន៍លំនៅឋានតម្លៃសមរម្យសម្រាប់អ្នកមានចំណូលមធ្យមក្នុងការទិញរស់នៅ ៕
Account
Security
Favourite Content