ភ្នំពេញ ៖ សភាយុវពាណិជ្ជករអន្តរជាតិកម្ពុជា សាខាភ្នំពេញ ( JCI Phnom Penh ) ត្រូវបានបង្កើតឡើងក្នុងឆ្នាំ២០១០ ហើយត្រូវបានទទួលស្គាល់ជាផ្លូវការក្នុងឆ្នាំ២០១២។ សភាយុវពាណិជ្ជករអន្តរជាតិ សាខាភ្នំពេញ មានសមាជិកចំនួន ៥០នាក់ (F/៥០%) ដែលក្នុងនោះ ៤០% នៃសមាជិកទាំងអស់​គឺជាសហគ្រិន។ យើងមានបេសកកម្ម ផ្តោតសំខាន់លើផ្នែកចំនួន ៤​ រួមមាន៖ សហគមន៍ ធុរកិច្ច កិច្ចការអន្តរជាតិ និងការអភិវឌ្ឍន៍បុគ្គល។​ នៅក្នុងឆ្នាំ២០២៥នេះ សភាយុវពាណិជ្ជករអន្តរជាតិកម្ពុជា សាខាភ្នំពេញ  នឹងរៀបចំព្រឹត្តិការណ៍ដ៏សំខាន់មួយនៅ​រាជធានីភ្នំពេញ ដែលមានឈ្មោះថា វេទិកាជជែកពិភាក្សាអំពីពាណិជ្ជកម្ម ការផ្គូរផ្គងពាណិជ្ជកម្ម និងការតាំងពិព័រណ៍អាជីវកម្មប្រចាំឆ្នាំ២០២៥ – (2025 Business Dialogue, Matching and Business Expo) ដែលមានឈ្មោះហៅកាត់ថា 2025 BDME។​

វេទិកាជជែកពិភាក្សាអំពីពាណិជ្ជកម្ម និងការផ្គូរផ្គងពាណិជ្ជកម្ម (Business Dialogue and Matching) គឺជាកម្មវិធីមួយដែលរៀបចំនៅថ្ងៃទី០៥ ខែកក្កដា ឆ្នាំ២០២៥ ចាប់ពីម៉ោង ៨:០០ព្រឹក រហូតដល់ម៉ោង ៥:៣០ល្ងាច ដែលមានទីតាំងនៅក្នុងសាលពហុបំណងនៃមជ្ឈមណ្ឌលសហប្រតិបត្តិការកម្ពុជា-កូរ៉េ។ កម្មវិធីនេះ នឹងមានអ្នកចូលរួមសរុបប្រមាណជាង ៥០០នាក់មកពីជាង១០០ក្រុមហ៊ុន ដែលជាក្រុមហ៊ុនក្នុងស្រុកស្ថិតក្នុងវិស័យផ្សេងៗគ្នា រួមមានដូចជា៖ វិស័យទេសចរណ៍ វិស័យកសិកម្ម វិស័យអចលនទ្រព្យ និងវិស័យវិនិយោគជាដើម។ ក្នុងកម្មវិធីនេះ អ្នកចូលរួមតម្រូវឱ្យជាវសំបុត្រដែលមានតម្លៃ ១៥ដុល្លារ (ជាវមុនថ្ងៃទី២០ ខែមិថុនា ឆ្នាំ២០២៥) សម្រាប់សំបុត្រធម្មតាមានតម្លៃ ២០ដុល្លារ ។ បន្ថែមពីនេះទៅទៀត អ្នកចូលរួមក៏អាចធ្វើការជាវនូវសំបុត្រអាហារថ្ងៃត្រង់ (Networking Lunch) ដែលមានតម្លៃ ១០ដុល្លារ។ បន្ទាប់ពីកម្មវិធីវេទិកាជជែកពិភាក្សាអំពីពាណិជ្ជកម្ម យើងនឹងមានកម្មវីធីការផ្គូផ្គងពាណិជ្ជកម្ម (Business Matching) ដែលធ្វើឡើងក្នុងគោលបំណងផ្តល់ឱកាសសម្រាប់ម្ចាស់អាជីវកម្ម និងសហគ្រិនក្នុងវិស័យដូចគ្នា បានផ្គូផ្គង ជួបសន្ទនាគ្នា ដើម្បីបន្តការពិភាក្សា បង្កើតទំនាក់ទំនង និងពង្រីកអាជីវកម្មរបស់ខ្លួន។

ចំណែកឯការតាំងពិព័រណ៍អាជីវកម្ម (Business Expo) នឹងប្រព្រឹត្តទៅរយៈពេល០២ថ្ងៃ ចាប់ពីថ្ងៃទី០៥ ដល់ថ្ងៃទី០៦ ខែកក្កដា ឆ្នាំ២០២៥ ចាប់ពីម៉ោង ៨:00ព្រឹក ដល់ម៉ោង ៥:៣០ល្ងាច នៅមុខមជ្ឈមណ្ឌលសហប្រតិបត្តការកម្ពុជាកូរ៉េ និងមជ្ឈមណ្ឌលជាតិបណ្តុះបណ្តាលធុរកិច្ចថ្មីនៃកម្ពុជា នៃសាកលវិទ្យាល័យភូមិន្ទភ្នំពេញ។ សរុបស្តង់តាំងពិព័រណ៍អាជីវកម្មទាំងអស់ចំនួន ៤៥ស្តង់ នឹងបើកឱ្យអ្នកចូលរួមទស្សនាដោយសេរី ហើយរំពឹងថា នឹងមានអ្នកចូលរួមប្រមាណជាង ៤០០០នាក់។ ម្ចាស់អាជីវកម្ម ឬម្ចាស់សហគ្រាសដែលមានបំណងក្នុងការជាវស្តង់ ដើម្បីបង្ហាញអំពីផលិតផល និងសេវាកម្មរបស់ខ្លួន ពួកយើងបានរៀបចំនូវតម្លៃស្តង់ទៅតាមទីតំាងផ្សេងៗគ្នា ដែលក្នុងនោះរួមមាន៖ តម្លៃ ៣៥០ដុល្លារ/ស្តង់ (សម្រាប់ទីតាំងនៅ NICC: N09-N014 indoor និងនៅ CKKC: K01-K14 indoor) តម្លៃ ៣០០ដុល្លារ/ស្តង់ (សម្រាប់ទីតាំងនៅ NICC: N01-N08 indoor និងនៅ CKCC: N15-N19 outdoor) និងតម្លៃ ២០០ដុល្លារ/ស្តង់ (សម្រាប់ទីតាំងនៅ CKC: PC01-PC12 indoor)។ តម្លៃស្តង់នេះ នឹងមានការបញ្ចុះតម្លៃចំនួន ៥០ដុល្លារ រាល់ការជាវមុនថ្ងៃទី២២ ខែមិថុនា ឆ្នាំ២០២៥ ទន្ទឹមនឹងនេះផងដែរ រាល់ការជាវស្តង់ពិព័រណ៍អាជីវកម្ម លោកអ្នកនឹងទទួលបានសំបុត្រចូលរួមវេទិកាជជែកពិភាក្សាអំពីពាណិជ្ជកម្ម និងការផ្គូផ្គងពាណិជ្ជកម្មចំនួន ០២សំបុត្រដោយឥតគិតថ្លៃ។

វេទិកាជជែកពិភាក្សាអំពីពាណិជ្ជកម្ម ការផ្គូផ្គងពាណិជ្ជកម្ម និងការតាំងពិព័រណ៍អាជីវកម្មឆ្នាំ២០២៥ រៀបចំឡើងក្នុងគោលបំណង៖

• ជួយផ្សព្វផ្សាយពីសក្តានុពលសេដ្ឋកិច្ច និងឱកាសវិនិយោគនៅកម្ពុជា តាមរយ:ការជជែកពិភាក្សាលើប្រធានបទសំខាន់ៗ ពីសំណាក់វាគ្មិន ដែលជាបញ្ញាជនប្រកបដោយថាមវន្ត ចំណេះដឹង និងបទពិសោធ ព្រមទាំងសាងស្នាដៃល្អៗក្នុងការប្រកបអាជីវកម្ម ក៏ដូចជាឥស្សរជនជាន់ខ្ពស់ក្នុងជួររាជរដ្ឋាភិបាលផងដែរ
• បង្កើនការចែករំលែកចំណេះដឹង និងបទពិសោធន៍នៃការធ្វើអាជីវកម្មដល់គ្នាទៅវិញទៅមក
• បង្កើតឱកាសរឹតចំណងទំនាក់ទំនងរវាងសហគមន៍អាជីវកម្មទាំងក្នុងស្រុក និងក្រៅស្រុក ព្រមទាំងរវាងវិស័យឯកជន និងរាជរដ្ឋាភិបាល
• បង្កើតឱកាសជួបពិភាក្សា ស្វែងយល់អំពីតម្រូវការ និងផលលំបាកនានាដែលវិស័យឯកជនកំពុងប្រឈម ហើយត្រូវការកិច្ចជួយគាំទ្រពីរាជរដ្ឋាភិបាល ព្រមទាំងជា​ឱកាសទទួលបាននូវអ្វីដែលជាការឆ្លើយតបទៅនឹងគោលនយោបាយសំខាន់ៗរបស់រាជរដ្ឋាភិបាលទាក់ទងនឹង
  ការអភិវឌ្ឍន៍សេដ្ឋកិច្ច និងឱកាសវិនិយោគនាពេលអនាគតផងដែរ។

សម្រាប់ព័ត៌មានបន្ថែមអំពី “កម្មវិធីវេទិកាជជែកពិភាក្សាអំពីពាណិជ្ជកម្ម​ ការផ្គូផ្គងពាណិជ្ជកម្ម និងការតាំងពិព័រណ៍អាជីវកម្មប្រចាំឆ្នាំ២០២៥” លោកអ្នកអាចធ្វើការទាក់ទងមកកាន់ក្រុមការងាររៀបចំកម្មវីធីដែលរួមមាន៖

១. លោក យូ ជិនខេង (អនុប្រធានផ្នែក វេទិកាជជែកពិភាក្សាអំពីពាណិជ្ជកម្ម និងការផ្គូផ្គងអាជីវកម្ម)

លេខទំនាក់ទំនង៖ ០៨៥ ៦៨៨ ៤៩៧

២. លោក ម៉ន គីមឆៃ​ (អនុប្រធានផ្នែក ការពិព័រណ៍អាជីវកម្ម)

លេខទំនាក់ទំនង៖ ០៧៨ ៨១៥ ០៥៥