ជាគំនិតល្អមួយសម្រាប់បងប្អូនដែលមានបរិវេណ ឬទីធ្លាទំនេរជុំវិញផ្ទះ អាចច្នៃជាសួនដាំដំណាំ ឬបន្លែតូចៗ ដែលជាការកម្សាន្តអារម្មណ៍ផង និងអាចឈានដល់ពង្រីកទៅជាកសិដ្ឋានដាំដំណាំសរីរាង្គសម្រាប់ផ្គត់ផ្គង់ទីផ្សារ និងទទួលបានចំណូលបន្ថែម។

Sarita Farm ជាកន្លែងបណ្ដុះកូនបន្លែលក់មួយស្ថិតនៅខណ្ឌកំបូល ដោយចាប់ផ្ដើមពីការដាំកម្សាន្ត និងគ្រាន់ជាបន្លែធម្មជាតិសម្រាប់ទទួលទានប្រចាំគ្រួសារនោះបានអភិវឌ្ឍ និងពង្រីកទៅជាកសិដ្ឋានខ្នាតតូចមួយក្រោមការកែច្នៃទីធ្លាទំនេរលើដំបូលផ្ទះទៅជាកន្លែងដាំដុះ ដោយមានរៀបចំជាផ្ទះសំណាញ់ដើម្បីដាំប្រភេទបន្លែបែបអ៊ឺរ៉ុប។

លោក សារិ ប៊ុនធឿន (ហៅ ហ៊ា ទុយ) ជាម្ចាស់កសិដ្ឋានមួយនេះបានរៀបរាប់ប្រាប់ថា ៖

«ពីមុនខ្ញុំដាំបន្លែលើដំបូលផ្ទះនេះគ្រាន់តែជាការកម្សាន្ត និងដាំយកបន្លែហូបក្នុងគ្រួសារប៉ុណ្ណោះ ប៉ុន្តែក្រោយមកដោយសារតែមានអ្នកសួររកទិញកូនបន្លែច្រើន ខ្ញុំក៏ចាប់ផ្តើមពង្រីកការបណ្តុះកូនបន្លែនៅលើដំបូលផ្ទះដោយរៀបចំនៅក្នុងត្រេ និងបណ្តុះទៅតាមប្រភេទបន្លែដែលមានតម្រូវការ ជាពិសេសប្រភេទបន្លែប៉ែកអឺរ៉ុបតែម្ដង»។​

លោកបន្ថែមថា ៖

«យើងបានរៀបចំផ្ទះសំណាញ់នៅពាក់កណ្ដាលឆ្នាំ២០២៤ និងបានប្រែក្លាយទៅជាអាជីវកម្មនៅខែតុលា ឆ្នាំ២០២៤នេះ ដោយយល់ថា វាជាដំណោះស្រាយមួយសម្រាប់អ្នកដែលចង់ដាំបន្លែជុំវិញផ្ទះ ជាពិសេសអ្នករស់នៅតាមបុរី ដែលសល់ដីទំនេរតិចតួច និងចង់ដាំដុះ ហើយក្រៅពីលក់កូនបន្លែ ខ្ញុំក៏មានលក់ប្រភេទដី និងជី សម្រាប់បំប៉នដំណាំផងដែរ»។

ចំពោះប្រភេទកូនដំណាំដែលកសិដ្ឋានខាងលើមានលក់ រួមមានប្រភេទកូនសាលាដបរទេសជាង ២០ប្រភេទ ប៉េងប៉ោះឈឺរី kale និងកូនដំណាំមួយចំនួនដែលសមស្របនឹងការដាំដុះជុំវិញផ្ទះ ដោយដំណាំទាំងនេះងាយស្រួលថែទាំ និងឆាប់បានផល។

លោកបញ្ជាក់ថា ៖

«រយៈពេលបណ្ដុះកូនដំណាំ យើងចំណាយពេលប្រមាណ ១៥-២០ថ្ងែគឺគ្រប់អាយុអាចយកទៅដាំបន្តបាន ដោយក្នុងមួយខែយើងអាចផលិតបានប្រមាណ ១០០-៣០០ត្រេសម្រាប់ប្រភេទសាលាដ ឯប្រភេទដំណាំលក់ជាដើមផ្សេងទៀត ដូចជា ប៉េងប៉ោះឈឺរី យើងអាចផលិតបាន ១០០-៣០០ដើមផងដែរ។ ដោយឡែក ចំពោះតម្លៃវិញ ប្រភេទសាលាដស្រួយពូជបរទេស ស្ពៃក្ដោប លក់ក្នុងតម្លៃ ១០ដុល្លារក្នុង ១ត្រេ ដែលមាន ១០៥កូន ចំណែកឯប្រភេទប៉េងប៉ោះឈឺរី ដើមគិនឆាយ Kale លក់ក្នុងតម្លៃចាប់ពី ១ដុល្លារឡើងទៅ អាស្រ័យទំហំដើម»។

យ៉ាងណាក៏ដោយ ត្បិតថាមានការគាំទ្រច្រើនក៏ពិតមែន ប៉ុន្តែលោក ប៊ុនធឿន ក៏បានបញ្ជាក់ឱ្យដឹងពីកត្តាប្រឈមផងដែរថា បច្ចុប្បន្ននេះសម្រាប់ការផលិតគឺនៅមានកម្រិតដោយសារតែការលាយដី ជី និងច្រកដីចូលថង់បណ្ដុះត្រូវចំណាយពេលច្រើន ខណៈការបញ្ជារទិញមានចំនួនច្រើន។ ជាមួយគ្នានេះ ដើម្បីពង្រឹងគុណភាព និងចំណេះដឹងផ្នែកកសិកម្ម លោកបាន និងកំពុងសិក្សាបន្ថែមជាមួយអ្នកជំនាញនៅ NPIC ដើម្បីរកម៉ាស៊ីនច្រកដីចូលថង់ ដើម្បីជួយសម្រួលដល់ដំណើរការដាំដុះឱ្យបានកាន់តែឆាប់រហ័ស និងធ្វើតាមគំរូ smart farm ផងដែរ។

ចុងក្រោយ ម្ចាស់កសិដ្ឋានខាងលើក៏បានចូលរួម និងបញ្ចេញជាមតិយោបល់ដែរថា ការដាំដំណាំនៅជុំវិញផ្ទះ ឬនៅទីធ្លាដីដែលទំនេរ ក្រៅពីបានកម្សាន្តអារម្មណ៍ បំបាត់ភាពអផ្សុក ថែមទាំងទទួលបាននូវទិន្នផលសម្រាប់ធ្វើជាម្ហូបអាហារដែលគ្មានគីមី ជួយកាត់បន្ថយចំណាយប្រចាំថ្ងៃ ហើយក៏អាចទទួលបានចំណូលខ្លះពីការលក់ផងដែរ។ សម្រាប់ថ្ងៃខាងមុខនេះ Sarita Farm ក៏មានគម្រោងបណ្តុះប្រភេទបន្លែផ្សេងទៀត ដើម្បីឱ្យអ្នកដែលចង់ដាំដុះកាន់តែមានជម្រើសច្រើន និងអាចដាំដុះបានងាយស្រួល៕