ភ្នំពេញ៖ ប្រធានសមាគមអ្នកចិញ្ចឹមសត្វនៅកម្ពុជា បានឱ្យដឹងថា នៅក្នុងរដូវបុណ្យចូលឆ្នាំចិន-វៀតណាម ឆ្នាំ២០២៥នេះ តម្លៃសាច់ជ្រូក មាន់ ទា នៅមានតម្លៃថេរ  ហើយអាចផ្គត់ផ្គង់ទីផ្សារមិនខ្វះទេ បើទោះជាមានតម្រូវការលើសឆ្នាំកន្លងទៅក៏ដោយ។

លោក ស្រ៊ុន ពៅ ប្រធានសមាគមអ្នកចិញ្ចេមសត្វនៅកម្ពុជាបានបញ្ជាក់ថា ៖ បច្ចុ​ប្បន្ន តម្លៃសាច់នៃសត្វចិញ្ចឹមនៅក្នុងស្រុកគឺអាចទទួលយកបាន ទាំងអ្នកហូបដែលជាអ្នកទិញ ទាំងអ្នកចិញ្ចឹម ជាក់ស្ដែង តម្លៃសាច់ជ្រូករស់នៅកម្ពុជាលក់ចូលទីផ្សារមានតម្លៃថេរ គឺប្រមាណជាង ៩ពាន់រៀល ក្នុងមួយគីឡូ​ក្រាម (៩៥០០រៀល/គក្រ។

លោកប្រធានសមាគម បានឱ្យដឹងថា ៖

«តម្លៃសាច់ជ្រូក លក់ក្នុងតម្លៃថេរ តែចំនួននៃការហូរចូលក្នុងទីផ្សារ​ គឺកើនជាងពេលសព្វដង ព្រោះសម្រាប់ថ្ងៃធម្មតាជ្រូករស់ ដែលផ្គត់ផ្គង់ទីផ្សារតែចំនួនប្រមាណ២០០០ក្បាលទេ  តែពេលរដូវសែនចូលឆ្នាំចិនវៀតណាមនេះ បានកើនឡើងដល់ជាង១ម៉ឺនក្បាល បើតាមស្ថិតិសមាគមទទួលបាន »។

បើតាម ចែ មួយ អ្នកលក់សាច់ជ្រូករាយនៅផ្សារទួលគោក រាជធានីភ្នំពេញ បានឱ្យដឹងថា សាច់ជ្រូកដែលគាត់ទទួលយកមកលក់ក្នុងរដូវបុណ្យចូលឆ្នាំចិននេះ គឺលក់បានរហូតដល់ជា១០០គីឡូ ដល់ទៅ២០០គីឡូ ក្នុងមួយថ្ងៃ ប៉ុន្តបើជាថ្ងៃធម្មតាលក់ត្រឹម ៥០-១០០គីឡូប៉ុណ្ណោះ។

ចែ មួយ បានឱ្យដឹងដែរថា ៖

« ចំពោះតម្លៃពេលបុណ្យចូលឆ្នាំចិននេះ សាច់សុទ្ធលក់បានតម្លៃ ២០ ០០០រៀល និងសាច់បីជាន់តម្លៃ ២២ ០០០រៀល ឆ្អឹងជំនី ២០ ០០០ រៀល ឆ្អឹងជំនីខ្ចី ២៧ ០​០០ រៀល ​ក្នុងមួយគីឡូក្រាម »។

លោកប្រធានសមាគមបានឱ្យដឹងថា បើទោះបីជាទីផ្សារសាច់ជ្រូកនៅរក្សាតម្លៃថេរ តែសាច់មាន់មានការឡើងថ្លៃតិចតួច (សម្រាប់សាច់មាន់ស្រែ)។  សាច់មាន់សម្រាប់ថ្ងៃចូលឆ្នាំចិន បើតាមដែលលោកបានដឹង (ថ្ងៃទី២៦-០១-២០២៤) ការផ្គត់ផ្គង់តម្រូវការទីផ្សារ រហូតដល់ជាង២ម៉ឺនក្បាល ហើយសម្រាប់មាន់កសិកម្ម មាន់បីសាសន៍ មាន់សាច់ និងមាន់ស្រែ ដែលតម្រូវការទីផ្សារប្រចាំថ្ងៃ មានចំនួនប្រមាណ ១៨,០០០ ទៅ២០,០០០ក្បាលក្នុងមួយថ្ងៃ។

អ្នកស្រី​  រិទ្ធ ចន្ថា ជាប្រធានក្រុមប្រឹក្សាសហគមន៍ទឹកហូត ស្រុករលាផ្អៀ ខេត្តកំពង់ឆ្នាំង បានឱ្យដឹងថា សហគមន៍បានចិញ្ចឹមមាន់មួយចំនួន ហើយក្នុងស្ថានភាពបច្ចុប្បន្ន តាមផែនកាសហគមន៍ មិនមានចិញ្ចឹមច្រើននោះទេ។

អ្នកស្រី​  រិទ្ធ ចន្ថា បានប្រាប់ AMS ថា កសិករសហគមន៍បានបន្ថែមចំនួនចិញ្ចឹមមាន់សម្រាប់ផ្គត់ផ្គង់ទីផ្សារ ដោយបន្ថែមចំនួនមាន់ប្រមាណ២០០ក្បាល សម្រាប់បោះឱ្យទីផ្សារក្នុងខេត្តគោលដៅ បន្ទាប់ពីទទួលបានការបញ្ជាទិញក្នុងរយៈពេលជាង១ខែមុខសម្រាប់ចូលឆ្នាំចិន។

អ្នកស្រី​  រិទ្ធ ចន្ថា បានបញ្ជាក់ថា៖

«តម្លៃមាន់ស្រែសហគមន៍ គឺមាន់រស់ញី ថ្លៃ ២៧ ០០០រៀល ដូចមាន់ឈ្មោលដែរថ្លៃ ២៧០០០រៀល ប៉ុន្តែមាន់ខ្លាញ់ថ្លៃ ៣ម៉ឺនរៀល ក្នុងមួយគីឡូក្រាម »។

លោក ស៊ុ្រន ពៅ ក៏បានលើកឡើងបន្ថែមថា ក្រោយពីសមាគមបានធ្វើការផ្សព្វផ្សាយធ្វើឱ្យបងប្អូន(អ្នកហូប) រួចផុតពីកត្តាប្រឈមនៃជំងឺ មិនមានផលប៉ះពាល់ ព្រោះក្រោយពីយើងបានផ្សព្វផ្សាយមួយរយៈ គាត់បានយល់ដឹងច្រើន ពីសាច់ល្អ និងសាច់មិនល្អ គឺសាច់ណាជាសាច់ក្នុងស្រុក និងសាច់ណាជាសាច់នាំចូល(សាច់បង្កក) ៕