បរទេស៖ យោងតាមប្រភពពី Inclusivebusiness.net បានលើកឡើងថា នៅក្នុង​ប្រទេស​ហ្សំប៊ី ការផ្តល់សេវាកម្មមូលដ្ឋានដូចជាការថែទាំសុខភាពដល់សហគមន៍ជនបទត្រូវបានរារាំងដោយភាពគ្មានប្រសិទ្ធភាព បញ្ហាបណ្តាញផ្លូវថ្នល់ និងរបៀបដឹកជញ្ជូន ខណៈដែលកង់ថោកត្រូវបានផលិតពីលោហៈមានគុណភាពអន់​។ ដើម្បីដោះស្រាយបញ្ហានេះ Buffalo Bicycles ត្រូវបានបង្កើតឡើងសម្រាប់ដោះស្រាយគម្លាតនៅលើទីផ្សារ ដោយផលិត និងចែកចាយកង់ដែលមានគុណភាពប្រើប្រាស់បានយូរ និងអាចដឹកអីវ៉ាន់ធ្ងន់ៗបាន។

ក្រុមហ៊ុន Buffalo Bicycles គឺជាក្រុមហ៊ុនបុត្រសម្ព័ន្ធដើម្បីរកប្រាក់ចំណេញរបស់ World Bicycle Relief (WBR) ដែលជាអង្គការក្រៅរដ្ឋាភិបាលមានមូលដ្ឋាននៅទីក្រុងឈីកាហ្គោ សហរដ្ឋអាម៉េរិក។ Buffalo Bicycles បានចាប់ផ្តើមប្រតិបត្តិការរបស់ខ្លួនក្នុងប្រទេស​ហ្សំប៊ីនាឆ្នាំ២០១២ ដោយកំណត់គោលដៅផ្តល់កង់ចំនួន ២២ ០០០ ដល់បុគ្គលិកផ្នែកសុខាភិបាលដែលធ្វើការនៅក្នុងកម្មវិធីមេរោគអេដស៍/ជំងឺអេដស៍។ កាលពីដំបូង ក្រុមហ៊ុននេះត្រូវបានផ្តល់ហិរញ្ញប្បទានដំបូង WBR ។ នៅឆ្នាំ២០១៤ ក្រុមហ៊ុនចាប់ផ្តើមទទួលបានប្រាក់ចំណេញ និងសាច់ប្រាក់ងាយស្រួលនៅឆ្នាំ២០១៧ ដែលធ្វើឲ្យក្រុមហ៊ុនបានក្លាយជាអង្គភាពរកប្រាក់ចំណេញដែលអាចទ្រទ្រង់ខ្លួនឯងបាន។

ប្រតិបត្តិការ​របស់​ក្រុមហ៊ុននៅ​ហ្សំប៊ីមាន​បុគ្គលិក​ប្រហែល ៨០ នាក់ ដែល​ធ្វើការ​នៅក្នុង​ហាងលក់កង់ចំនួន ២៩ទីតាំង ។ គោលដៅដំបូងរបស់ Buffalo Bicycles គឺផ្គត់ផ្គង់កង់ចំនួន ៥ ម៉ឹននៅទូទាំងប្រទេស ប៉ុន្តែក្រុមហ៊ុនអាចធ្វើទៅបានលើស​ពី​គោលដៅ​ ដោយបាន​លក់កង់​សរុប​ចំនួន ៨៨ ០០០ គ្រឿង​ក្នុង​ខេត្ត​ចំនួន ១០។ លើសពីនេះ Buffalo Bicycles ក៏បានពង្រីកប្រតិបត្តិការទៅកាន់ប្រទេសអាហ្វ្រិកផ្សេងទៀតដូចជា ហ្ស៊ីមបាវ៉េ កេនយ៉ា ម៉ាឡាវី និងអ៊ូហ្គង់ដា ផងដែរ។ ក្រៅពីបុគ្គលិកសុខាភិបាល ក្រុមហ៊ុនក៏បានពង្រីកការផ្គត់ផ្គង់ដល់អតិថិជនផ្សេងទៀតរួមមាន កសិករ សិស្ស និងអ្នកធ្វើការនៅសេដ្ឋកិច្ចក្រៅប្រព័ន្ធជាដើម។ ភាគច្រើននៃបុគ្គលិករបស់ក្រុមហ៊ុនប្រមាណជាង ៦០ ភាគរយគឺមកពីសហគមន៍មូលដ្ឋាន។

Buffalo Bicycles បានរចនាកង់ដែលអាច​ប្រើប្រាស់​បាន​យូរ និង​អាចធន់​នឹងស្ថានភាពលំបាកនៃការធ្វើដំណើរ​នៅតាមទី​ជនបទ។ កង់នេះមានតម្លៃ ១៣០ ទៅ ១៥០ ដុល្លារក្នុងមួយគ្រឿង និងមានការធានារយៈពេល ៥ ឆ្នាំសម្រាប់ការជួសជុល ហើយកង់​អាច​ប្រើ​បាន​រហូត​ដល់ ១២ ឆ្នាំ ប្រសិន​បើ​មាន​ការ​ថែទាំ​ត្រឹមត្រូវ។ ក្រុមហ៊ុនបានបើកដំណើរការកន្លែងជួសជុលកង់នៅតាមតំបន់ជនបទ ដោយរថយន្តដឹកទំនិញចល័ត និងយាន្តជំនិះផ្សេងៗអាចទទួលបានសេវាកម្មជួសជុលឥតគិតថ្លៃ និងមានលក់គ្រឿងបន្លាស់ផងដែរ។ មិនត្រឹមតែប៉ុណ្ណោះ Buffalo Bicycles ក៏ធ្វើការជាមួយសមាគមក្នុងស្រុកផងដែរ ដូចជា កសិដ្ឋានចិញ្ចឹមគោយកទឹកដោះ និងកសិករដាំស្រូវសាលី។ តាមរយៈកម្មវិធី CSR របស់ក្រុមហ៊ុន Buffalo Bicycles ក៏បានធ្វើការជាមួយនឹង BMW សម្រាប់ការបង់រំលោះកង់ និងប្រាក់កម្ចីកង់។ ការលក់កង់ដល់អតិថិជនរបស់អង្គការដែលពាក់ព័ន្ធនឹងកម្មវិធីកសិកម្មប្រកបដោយនិរន្តរភាព និងសុខាភិបាលគឺមិនមានការរាប់បញ្ចូលពន្ធនោះទេ។

ការសិក្សាមួយបានចងក្រងជាឯកសារថា កង់របស់ Buffalo បានផ្តល់អត្ថប្រយោជន៍ដល់អតិថិជនដែលជាអ្នកចំណូលទាប និងអ្នកក្រីក្រ។ នៅប្រទេសហ្សំប៊ី កសិករចិញ្ចឹមគោយកទឹកដោះអាចដឹកទឹកដោះគោបាន ២៥ ភាគរយបន្ថែមទៀត និងទទួលបានប្រាក់ចំណូល ២៣ ភាគរយបន្ថែមក្នុងមួយខែ។  ជាមួយ​ទឹកដោះគោមួយលីត្រមានតម្លៃ ០,១៩ ដុល្លារ កសិករអាចរកប្រាក់ចំណូលបាន ១៩៧ ដុល្លារដោយប្រើប្រាស់កង់របស់ Buffalo Bicycles ហើយពេលវេលាធ្វើដំណើរត្រូវបានកាត់បន្ថយពី ៥៥ នាទី មកនៅត្រឹម ៣០ នាទីប៉ុណ្ណោះ។ ជាងនេះទៅទៀត កសិករទាំងនោះក៏ទទួលបានអត្ថប្រយោជន៍ផ្សេងៗពីកង់ដូចជា ជិះទៅសាលារៀន មន្ទីរពេទ្យ និងការជួបជុំសហគមន៍ជាដើម។ ការប៉ាន់ប្រមាណបានបង្ហាញថា កង់ចំនួន ២ ម៉ឺនគ្រឿងអាចផ្តល់អត្ថប្រយោជន៍ដល់មនុស្ស ១០ ម៉ឺននាក់។

ទាក់ទងនឹងផលប្រយោជន៍សម្រាប់បរិស្ថាន គុណភាព និងភាពធន់នៃកង់អាចជួយកាត់បន្ថយ​ការ​បំភាយ​កាបូន និងកាកសំណល់ ដោយសារការបោះចោលកង់ត្រូវបានកាត់បន្ថយ។ លើសពីនេះ កាកសំណល់ក្រដាស និងផ្លាស្ទិកពីក្រុមហ៊ុន​ត្រូវ​បាន​បញ្ជូន​ទៅកាន់​រោងចក្រ​តូច​មួយដែល​កាកសំណល់​ក្រដាស​ និងប្លាស្ទិកត្រូវបានកែច្នៃ។ យ៉ាងណាមិញ Buffalo Bicycles ក៏ប្រឈមមុខនឹងបញ្ហាមួយចំនួនផងដែរ ជាពិសេសការរក្សាតម្លៃកង់របស់ពួកគេនៅក្នុងតម្លៃសមរម្យអំឡុងពេលមានអតិផរណាក្នុងរយៈពេលប៉ុន្មានឆ្នាំមកនេះ ខណៈដែលរដ្ឋាភិបាលដាក់ពន្ធអាករ ២៥ ភាគរយលើការនាំចូលកង់។ ក្នុងរយៈពេលប៉ុន្មានឆ្នាំមកនេះ Buffalo Bicycles ​ត្រូវ​បង្កើន​តម្លៃ​កង់​របស់​ពួកគេ​ជា​បន្តបន្ទាប់ ដោយឡើងថ្លៃប្រហែល ២០ ដុល្លារ ដើម្បីបំពេញនូវគោលដៅប្រាក់ចំណេញដែលពួកគេបានកំណត់។ ក្រោយមក ក្រុមហ៊ុនអាចបញ្ចុះបញ្ចូលដោយជោគជ័យសម្រាប់ការកាត់បន្ថយពន្ធលើកង់សល់ត្រឹម ១៥ ភាគរយ។

Buffalo Bicycles បានកត់សម្គាល់ថា បទប្បញ្ញត្តិរបស់រដ្ឋាភិបាលបច្ចុប្បន្នទាក់ទងនឹងការធ្វើអាជីវកម្មនៅក្នុងសហគមន៍ជនបទនៅប្រទេសហ្សំប៊ី គឹមានភាពបត់បែន និងមិនទាមទារអ្វីពិសេសនោះទេ។ បន្ថែមពីនេះ ភ្នាក់ងាររដ្ឋាភិបាលក្នុងតំបន់ពេលខ្លះចូលរួមដឹកជញ្ជូនកង់​ដល់​សហគមន៍​ ដើម្បីជួយផ្សព្វផ្សាយកង់របស់ក្រុមហ៊ុនផងដែរ។ Buffalo Bicycles បានចុះហត្ថលេខា MOU ជាមួយក្រសួង​សុខាភិបាល​ក្នុងការធ្វើ​យុទ្ធនាការ​តស៊ូ​មតិ និង​​លើក​កម្ពស់​ការ​ហាត់​ប្រាណ​ដោយ​ការជិះ​កង់ ហើយក្រសួងអប់រំបានផ្តល់សិទ្ធិឱ្យក្រុមហ៊ុនចូលសាលារៀន ដើម្បីផ្តល់កង់ដល់សិស្សថែមទៀតផង។ លើសពីនេះ Buffalo Bicycles ក៏​កំពុង​ពិភាក្សា​ជាមួយ​ក្រសួង​បរិស្ថាន​ដើម្បី​ផ្សព្វផ្សាយ​កង់ជាជម្រើសដឹកជញ្ជូនប្រកបដោយនិរន្តរភាព ដែលជួយកាត់បន្ថយពេលវេលាធ្វើដំណើរ និងការបំភាយកាបូន។ ដើម្បីលើកកម្ពស់នូវការប្រើប្រាស់កង់បន្ថែមទៀតក្នុងនាមជាមធ្យោបាយដឹកជញ្ជូនជំនួសម៉ូតូ ក្រុមហ៊ុនមានបំណងបន្តធ្វើការជាមួយរដ្ឋាភិបាលដូចជា កង់ទាំងអស់មិនត្រូវបង់ពន្ធ និងបង្កើនការវិនិយោគលើហេដ្ឋារចនាសម្ព័ន្ន ដូចជា កន្លែងផ្ញើយានជំនិះក្នុងសាលារៀនដើម្បីឱ្យសិស្សមានកន្លែងទុកដាក់កង់ឱ្យបានត្រឹមត្រូវ ប្រកបទៅដោយសុវត្ថិភាព និងលើកទឹកចិត្តដល់សិស្សឱ្យជិះកង់ទៅសាលារៀនកាន់តែច្រើន៕