សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅព្រឹកថ្ងៃទី ៣០ ខែកក្កដា នេះ ធនាគារ អេស៊ីលីដា ភីអិលស៊ី បានប្រកាសលុបចោលបំណុលទាំងស្រុងជូនដល់យោធិនពលីជីវិត និងអ្នករួមខ្ចី ដែលបានបំពេញប្រតិបត្តិការក្នុងសមរភូមិការពារបូរណភាពទឹកដីកម្ពុជា។ ធនាគារក៏បានជម្រាបជូនទៅដល់អតិថិជន និងសាច់ញាតិយោធិនពលីទាំងអស់ ដែលរងនូវផលប៉ះពាល់ឱ្យទំនាក់ទំនងទៅកាន់ការិយាល័យ-សាខាធនាគារ អេស៊ីលីដា ដើម្បីទទួលបាននូវវិធានការមួយនេះ។
បើតាមសេចក្ដីប្រកាសរបស់ធនាគារដដែលបានឱ្យដឹងទៀតថា រាល់កិច្ចការចាំបាច់នានា ខ្លួននឹងសហការចូលរួមក្នុងការសម្របសម្រួល ធ្វើកិច្ចការដ៏មានសារៈសំខាន់នេះ ជាមួយធនាគារជាតិនៃកម្ពុជា។
គួរបញ្ជាក់ថា ការលុបចោលបំណុលរបស់អតិថិជនជាយោធិននាពេលនេះ ជាការឆ្លើយតបនឹងសេចក្ដីអំពាវនាវរបស់សម្ដេចនាយករដ្ឋមន្ត្រី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី ២៩ កក្កដា ទៅកាន់សមាគមធនាគារ និងសមាគមមីក្រូហិរញ្ញវត្ថុ ឱ្យពិនិត្យលទ្ធភាពក្នុងការជួយសម្រាលបន្ទុកផ្នែកហិរញ្ញវត្ថុសម្រាប់កងកម្លាំងប្រដាប់អាវុធដែលបានពលីជីវិតការពារបូរណភាពទឹកដី។
ក្រោយការអំពាវនាវរបស់សម្ដេចនាយករដ្ឋមន្ត្រី ធនាគារជាតិនៃកម្ពុជាក៏បានចេញសេចក្ដីណែនាំដល់គ្រឹះស្ថានធនាគារ និងហិរញ្ញវត្ថុផងដែរ ដោយឈរលើស្មារតីសាមគ្គីភាព មនុស្សធម៌ ព្រមទាំងដើម្បីរួមគ្នាជួយសម្រាលបន្ទុកដល់គ្រួសារយោធិនដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធ និងប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ។
យ៉ាងណាមិញ ក្រៅពីការគិតគូដល់ការជួយសម្រាលបន្ទុកហិរញ្ញវត្ថុសម្រាប់កងកម្លាំងប្រដាប់អាវុធកម្ពុជានេះទៅ សម្ដេចនាយករដ្ឋមន្ត្រីក៏បាន និងកំពុងរៀបចំការងារមួយចំនួនដូចជា៖ រៀបចំ និងអនុវត្តនូវកញ្ចប់គោលនយោបាយសម្រាប់គ្រួសារយោធិនពលី យោធិនរងរបួស និងពិការ។ សម្ដេចក៏បានចេញបទបញ្ជាឲ្យក្រសួងការពារជាតិ និងក្រសួងស្ថាប័នពាក់ព័ន្ធ សិក្សារៀបចំនូវគោលនយោបាយលើកទឹកចិត្តពិសេសសម្រាប់កងកម្លាំងប្រដាប់អាវុធទាំងយោធា ទាំងនគរបាលជាតិ ដែលបានចូលរួមដោយផ្ទាល់នៅក្នុងសមរភូមិការពារបូរណភាពទឹកដីនៅពេលនេះ។
ចំពោះយោធិន និងកងនគរបាលជាតិដែលបានពលី ឬធ្លាក់ខ្លួនពីការមិនអាចបំពេញភារកិច្ចបន្តបាន រាជរដ្ឋាភិបាលនឹងផ្ដល់ក្របខ័ណ្ឌឲ្យសាច់ញាតិបង្កើតរបស់គាត់មួយរូបបានចូលបម្រើប្រទេសជាតិនៅអង្គភាពដែលគាត់បំពេញភារកិច្ចមុនពលីឬធ្លាក់ខ្លួនពិការ៕
Account
Security
Favourite Content