ភ្នំពេញ ៖ វិស័យធនាគារមានភាពរីកចម្រើនគួរឱ្យកត់សម្គាល់ ដោយក្នុងរយៈពេល ២៥ ឆ្នាំចុងក្រោយនេះ ការកើនឡើងនូវទ្រព្យសកម្មប្រមាណ ៨០ ដង ស្មើប្រមាណ ៨១ ប៊ីលានដុល្លារអាមេរិក រីឯឥណទានកើនឡើងប្រមាណ ១៦១ ដង ស្មើនឹងប្រមាណ ៥៦ ប៊ីលានដុល្លារអាមេរិក រួមជាមួយនឹងប្រាក់បញ្ញើកើនឡើងប្រមាណ ៦៩ ដង ស្មើប្រមាណ ៤៥ ប៊ីលានដុល្លារអាមេរិក។ នេះបើតាមការលើកឡើងរបស់លោក ហេង បូមករា អគ្គនាយករង អគ្គនាយកដ្ឋានត្រួតពិនិត្យទី១ នៃធនាគារជាតិនៃកម្ពុជា ថ្លែងក្នុងពិធីបើកព្រឹត្តិការណ៍ពិព័រណ៍ជំនាញ និងការងារក្នុងវិស័យធនាគារ និងហិរញ្ញវត្ថុកាលពីថ្ងៃចុងសប្ដាហ៍កន្លងទៅនេះ។
លោកអគ្គនាយករងបានបញ្ជាក់ថា៖ សមិទ្ធផលទាំងនេះបានមកពីជំនឿទុកចិត្ដរបស់សាធារណជន វិនិយោគិនលើស្ថិរភាពសេដ្ឋកិច្ច និងភាពធន់របស់ប្រព័ន្ធធនាគារ។ ជាមួយគ្នានេះ បណ្ដាញគ្រឹះស្ថានធនាគារ និងហិរញ្ញវត្ថុបានពង្រីកពាសពេញប្រទេស ហើយការប្រើប្រាស់សេវាធនាគារបានផ្សាំខ្លួនក្នុងជីវភាពរស់ប្រចាំថ្ងៃរបស់ប្រជាជនទូទៅ។ ក្នុងនោះឌីជីថល និងការធ្វើពិពិធកម្មសេវាធនាគារទៅតាមតម្រូវការរបស់អ្នកប្រើប្រាស់បានរួមចំណែកយ៉ាងសំខាន់ក្នុងការជំរុញការប្រើប្រាស់ និងទទួលបានសេវាហិរញ្ញវត្ថុផ្លូវការ។
តួយ៉ាងតាមលទ្ធផលនៃការអង្កេត FINSCOPE កម្រិតនៃការទទួលបាន និងប្រើប្រាស់សេវាហិរញ្ញវត្ថុផ្លូវការនៅក្នុងប្រទេសកម្ពុជាបានកើនឡើងពី ៥៩%ក្នុងឆ្នាំ២០១៦ ដល់ ៦៧% នៅឆ្នាំ២០២១។
លោកបានបន្តលើកឡើងថា៖ ស្របតាមភាពរីកចម្រើននេះ ធនាគារជាតិនៃកម្ពុជាក៏មានមណ្ឌលសិក្សាបច្ចេកទេសធនាគារដែលបានដើរតួនាទីសំខាន់ក្នុងការបណ្តុះបណ្តាលនិស្សិត ក៏ដូចជាមន្រ្តីរបស់ធនាគារជាតិនៃកម្ពុជាក្នុងការចូលរួមបណ្ដុះបណ្ដាលធនធានមនុស្សសម្រាប់បំពេញតម្រូវការនៅក្នុងវិស័យធនាគារផងដែរ។ ជាក់ស្ដែង គិតត្រឹមខែកក្កដា ឆ្នាំ២០២៣នេះ គ្រឹះស្ថានធនាគារ និងហិរញ្ញវត្ថុបានផ្តល់ការងារជូនដល់ពលរដ្ឋកម្ពុជាមានចំនួន ៩៦ ៨០០ នាក់ ដោយក្នុងបុរសប្រមាណ ៦១ ០០០ នាក់ និងស្រ្តីប្រមាណ ៣៥ ០០០ នាក់។ ឱកាសការងារនេះ គ្រឹះស្ថានធនាគារបានស្រូបយកកម្លាំងពលកម្មប្រមាណជា ៦៥,០% គ្រឹះស្ថានមីក្រូហិរញ្ញវត្ថុបានស្រូបយក ៣៣,០% និងក្រុមហ៊ុនភតិសន្យាហិរញ្ញវត្ថុ បានស្រូបយក ២,០%។
ស្របគ្នានឹងការរីកចម្រើននៃបច្ចេកវិទ្យាហិរញ្ញវត្ថុ ការផ្ដល់សេវាធនាគារបែបប្រពៃណីបានវិវត្ដន៍ខ្លួនទៅរកការផ្ដល់សេវាធនាគារបែបឌីជីថលតាមរយៈការធ្វើឌីជីថលូបនីយកម្មនៃផលិតផល ប្រតិបត្តិការ និងសកម្មភាពនានាដល់អតិថិជនតាមបណ្ដាញអនឡាញ។ ក្នុងន័យនេះ ដើម្បីគាំទ្រប្រតិបត្ដិការធនាគារ និងហិរញ្ញវត្ថុ ទាមទារឱ្យមានធនធានមនុស្សដែលមានការយល់ដឹងអំពីបច្ចេកវិទ្យា និងជំនាញផ្សេងទៀត បន្ថែមលើជំនាញធនាគារនិងហិរញ្ញវត្ថុ។
លោក ហេង បូមករា បានគូសបញ្ជាក់ថា ទីផ្សារការងារនៅក្នុងវិស័យធនាគារមានវិសាលភាពធំដែលត្រូវការជំនាញជាច្រើនដូចជា ជំនាញបច្ចេកវិទ្យាព័ត៌មាន ជំនាញច្បាប់ ជំនាញគ្រប់គ្រង និង ជំនាញម៉ាឃីតធីង ជាដើម៕ ដោយ ៖ ញ៉ែម សុផល