ទៀបបារាំង ជាប្រភេទទៀបម្យ៉ាងមានសម្បកជាបន្លាស្រួចៗ ទន់ៗ សាច់ខាងក្នុងដូចសាច់ទៀបខ្មែរដែរ តែមានរសជាតិជូរអែម ដែលប្រជាជនខ្មែរនិយមបរិភោគផ្លែទុំស្រស់ និងដាំក្បែរផ្ទះគ្រាន់នឹងបេះទទួលទានជុំគ្រួសារ។ ថ្ងៃនេះ AMS Economy សូមបង្ហាញពីបច្ចេកទេសសំខាន់ៗក្នុងការដាំទៀបបារាំងឱ្យទទួលបានទិន្នផលខ្ពស់ និងចេញផ្កាស្ទើររាល់ខែ។  

ចំពោះការជ្រើសរើសពូជទៀបបារាំង គេត្រូវរើសយកពូជណាដែលមានផ្លែច្រើន ធំ មានទម្ងន់ពី ១-២គីឡួក្រាម មានគ្រាប់តិច ផ្លែមានរាងល្អ មានរសជាតិឆ្ងាញ់ ហើយជាពូជដែលធន់នឹងជំងឺ ក៏ដូចជាសត្វល្អិតបំផ្លាញ។ ចំណែកការបណ្ដុះគ្រាប់ទៀបបារាំង គេត្រូវយកគ្រាប់ចេញពីផ្លែ លាងទឹកឱ្យស្អាតរួចដាក់ហាលថ្ងៃ ទើបយកគ្រាប់ទៅបណ្ដុះដោយដាក់ឃ្លាតគ្នា ៣-៥សង់ទីម៉ែត្រ និងជម្រៅ ១សង់ទីម៉ែត្រ រួចស្រោចទឹកឱ្យជាប់ជាប្រចាំរហូតដល់កូនរុក្ខជាតិចេញស្លឹកបាន ៥-៦គឺអាចយកទៅដាំបានហើយ។

គេអាចដាំទៀបបារាំងលើប្រភេទដីខុសៗគ្នា តែវាអាចដុះលូតលាស់ល្អបំផុតនៅលើដីធូរ ឬដីប្រហោងស្ពោតៗ ងាយច្រោះទឹក និងមានកម្រិត pH ជាមធ្យម ៥-៦ ឬគេអាចទិញដីស្រាប់ឬដីលាយជាមួយលាមកគោស្ងួតៗ លាមកមាន់ស្ងួត អង្កាម សំបកដូង ភក់ខ្មៅ កម្ទេចកម្ទីសរីរាង្គនិងលាយជាមួយកំបោររួចដាក់ទៅក្នុងដីមុនដាំ។

ភាគច្រើនគេដាំទៀបបារាំងដោយប្រើគ្រាប់ ព្រោះអាចទទួលបានដើមធំ តែគេក៏អាចដាំដោយមែកផ្សាំក៏បាន​ ដោយជ្រើសរើសមែកដែលមានភ្នែកល្អ ដើមធំ គុណភាណផ្លែផ្អែមឆ្ងាញ់ គ្មាជំងឺ គ្មានសត្វល្អិតបំផ្លាញ។ ចំពោះរបៀបដាំគេត្រូវជីករណ្ដោះអាស្រ័យលើទំហំដើម លុះពេលដាក់កូនដាំរួចត្រូវស្រោចទឹកឱ្យត្រជាក់គល់ ហើយការដាំត្រូវទុកចន្លោះពីដើមមួយទៅដើមមួយទៀត ៣-៤ម៉ែត្រ ឬ ៣x៣ម៉ែត្រ ឬ ២.៥x២.៥ម៉ែត្រក៏បាន។

ចំពោះការថែទាំ ទៀបបារាំងក៏ដូចជារុក្ខជាតិដទៃទៀតដែរ វាត្រូវការការស្រោចទឹក សម្អាតស្មៅ ពូនគល់ ដាក់ជី ពិសេសត្រូវថែទាំឱ្យបានដិតដល់កំឡុងពេលទៀបចេញផ្កា និងចេញផ្លែ។ ក្រៅពីនេះវាក៏អាចប្រឈមនឹងជំងឺក៏ដូចជាសត្វល្អិតមួយចំនួនដូចជា ជំងឺអង់ត្រាក់ណូសជំងឺផ្សិតអុចស្លឹក ជំងឺរលួយដីភ្លូដ្យា ជំងឺដំបៅពណ៌ខ្មៅ និងសត្វល្អិតមួយចំនួនទៀតដូចជា ចៃម្សៅ ដង្កូវចោះផ្លែ និងរុយចោះផ្លែជាដើម។

ទៀបបារាំងអាចប្រមូលផលក្នុងរយៈពេល ៣-៥ឆ្នាំក្រោយពេលដាំ ដែលវាអាចចេញផ្កាស្ទើររាល់ខែ តែកំឡុងពេលដែលល្អគឺនៅចន្លោះខែឧសភា និងមិថុនា ហើយទុំនៅវិច្ឆិកាឬខែធ្នូ។ តាមការសង្កេត ទៀបចាស់ល្អមានក្រឡារីក ពណ៌បៃតងស្រាល ហើយអាចទុំក្នុងរយៈពេលពី ៣-៥ថ្ងៃ ដោយឡែកការប្រមូលផលត្រូវបេះដោយដៃចៀសវាងធ្លាក់ ឬធ្វើឱ្យជាំផ្លែដែលអាចបង្កឱ្យរលួយពេលផ្លែទុំ។

គួរបញ្ជាក់ដែរថា ការបរិភោគទៀតបារាំងអាចជំនួយដល់ការព្យាបាលជំងឺមហារីកគ្រប់ប្រភេទ ជួយបង្កើនទឹកដោះសម្រាប់ស្ត្រីបំបៅដោះកូន ជួយបំបាត់ឈាមចេញតាមជើងធ្មេញ បំបាត់ក្អក ចុកសន្លាក់ ឈឺមួយចំហៀងក្បាលជាដើម។ មិនត្រឹមតែប៉ុណ្ណោះ ផ្នែកផ្សេងៗទៀតរបស់ទៀបបារាំងដូចជាស្លឹកស្រស់ សំបក សាច់ឈើ ក៏អាចព្យាបាលជំងឺមហារីកបានផងដែរ៕