ភ្នំពេញ ៖ ក្រុមការងារនៃអប្សរាមេឌាសឺវីស (AMS) រួមជាមួយ សមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) និងក្រុមហ៊ុន ក្រេឌីត ប្យួរ៉ូ ខេមបូឌា (CBC) បានរៀបចំធ្វើបទបង្ហាញពីកម្មវិធីវិថីហិរញ្ញវត្ថុ (Financial Street) ក្នុងគោលបំណងដើម្បីលើកម្ពស់ការផ្សព្វផ្សាយចំណេះដឹងហិរញ្ញវត្ថុតាមរយៈការផលិតវីដេអូអប់រំផ្នែកហិរញ្ញវត្ថុជូនដល់សាធារណជន។

ការរៀបចំធ្វើបទបង្ហាញពីកម្មវិធីវិថីហិរញ្ញវត្ថុ ដែលរៀបចំឡើងដោយស្ថាប័នទាំង ៤ ខាងលើ ត្រូវបានធ្វើឡើងនៅព្រឹកថ្ងៃទី២៧ ខែកក្កដា ឆ្នាំ២០២៣  ដោយមានអ្នកចូលរួមចំនួនជិត ១០០ នាក់ មកពីវិស័យធនាគារ និងមីក្រូហិរញ្ញវត្ថុ។

វិថីហិរញ្ញវត្ថុ (Financial Street) គឺជាកម្មវិធីអប់រំចំណេះដឹងផ្នែកហិរញ្ញវត្ថុមួយ ដែលផ្តួចផ្តើមឡើងដោយក្រុមការងារ AMS និងសហការរៀបចំដោយសមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) និង ក្រុមហ៊ុន ក្រេឌីត ប្យួរ៉ូ ខេមបូឌា (CBC) ហើយនិងទទួលបានការគាំទ្រដោយធនាគារជាតិនៃកម្ពុជា។ កម្មវិធីនេះគឺជាផ្នែកមួយនៃសកម្មភាពជាច្រើនផ្សេងទៀតរបស់សមាគមធនាគារនៅកម្ពុជា។

ទន្ទឹមនេះ សមាគមមីក្រូហិរញ្ញវត្ថុកម្ពុជា (CMA) និងក្រុមហ៊ុន ក្រេឌីត ប្យួរ៉ូ ខេមបូឌា (CBC) ក៏បានចូលរួមចំណែកយ៉ាងសកម្មផងដែរ ក្នុងការផ្សព្វផ្សាយចំណេះដឹងហិរញ្ញវត្ថុដល់ប្រជាពលរដ្ឋ ដើម្បីជំរុញឱ្យវិស័យហិរញ្ញវត្ថុនៅកម្ពុជា កាន់តែភាពរឹងមាំទាំងនាពេលបច្ចុប្បន្ន និងអនាគត។

សូមបញ្ជាក់ថា កម្មវិធីវិថីហិរញ្ញវត្ថុ ត្រូវបានសម្ពោធកាលពីថ្ងៃទី៣ ខែមីនា ឆ្នាំ២០២៣។ អស់រយ:ពេលជាង ៤ខែនេះ ក្រុមការងារ AMS រួមជាមួយ ABC CMA និង CBC បានធ្វើការយ៉ាងសកម្មក្នុងការផលិតវីដេអូអប់រំផ្នែកហិរញ្ញវត្ថុឱ្យសម្រេចបានតាមផែនការ ដែលមាន២០ វីដេអូ។ កម្មវិធីវិថីហិរញ្ញវត្ថុនឹងចាក់ផ្សាយវីដេអូជាបន្តបន្ទាប់ចាប់ពីដើមខែសីហា ខាងមុខនេះតទៅ។ ជាមួយគ្នានេះ យុទ្ធនាការនៃកម្មវិធីវិថីហិរញ្ញវត្ថុ គឺជាការចូលរួមចំណែកមួយផ្នែកទៀត ក្នុងការចូលរួមលើកកម្ពស់ចំណេះដឹងហិរញ្ញវត្ថុដល់សាធារណជន។

ជាការពិតណាស់ ចំណេះដឹងផ្នែកហិរញ្ញវត្ថុ គឺជារបៀបវារៈដ៏សំខាន់ ដែលមាននៅក្នុងយុទ្ធសាស្រ្តជាតិស្តីពីបរិយាបន្នហិរញវត្ថុឆ្នាំ ២០១៩-២០២៥ ។ ធនាគារជាតិនៃកម្ពុជា បានយកចិត្តទុកដាក់ខ្ពស់នៃរបៀបវារៈនេះ និងបានជំរុញសមាគមទាំងពីរ និងសមាជិករបស់ខ្លួនឱ្យបង្កើនសកម្មភាព លើរបៀបវារៈដ៏សំខាន់នេះ៕