កំពង់ធំ ៖ រយៈពេល៣ឆ្នាំ ចាប់តាំងពីឆ្នាំ២០២០មក សិប្បកម្មកែច្នៃគ្រាប់ស្វាយចន្ទី ជ័យ សំបូរ ក្នុងខេត្តកំពង់ធំ បានសហការជាមួយដៃគូនៅក្នុងប្រទេសជប៉ុន នាំចេញ​គ្រាប់ស្វាយចន្ទីបានប្រមាណ៧០តោន និងលក់នៅក្នុងស្រុកបានប្រមាណជា៣០តោន។ ក្រៅពីការនាំចេញផលិតផលគ្រាប់ស្វាយចន្ទីទៅកាន់ទីផ្សារប្រទេសជប៉ុន សិប្បកម្មក៏នឹងនាំចេញសំបកគ្រាប់ស្វាយចន្ទីទៅប្រទេសជប៉ុន ដើម្បីកែច្នៃជាជីវម៉ាស ផង​ដែរ។ នេះបើតាមការឱ្យដឹងរបស់លោកស្រី អ៊ិន ឡៃហួត នាយិកាគ្រប់​គ្រង​សិប្បកម្ម​កែច្នៃគ្រាប់ស្វាយចន្ទី ជ័យ សំបូរ ។

ក្នុងឱកាសដំណើរទស្សនកិច្ចសិក្សារបស់អ្នកសារពត៌មានអំពីច្រវាក់ផលិតកម្មស្វាយចន្ទីកម្ពុជា ដែលដឹកនាំដោយ ក្រសួងកសិកម្មរុក្ខាប្រមាញ់ និងនេសាទ និងសហភាពអឺរ៉ុប នាពេលថ្មីៗនេះ អ្នកស្រី លី ហួត បានមានប្រសាសន៍ថា ៖ ៣ឆ្នាំមុនសិប្បកម្មបាននាំចេញគ្រាប់ស្វាយចន្ទីប្រមាណ៧០តោន តែនៅក្នុងឆ្នាំ២០២៣នេះសិប្បកម្មកែច្នៃគ្រាប់​ស្វាយចន្ទី ជ័យសំបូរ មិនទាន់បានធ្វើការនាំចេញនៅឡើយទេ ដោយសារ​កំពុងរៀបចំ​ឯកសារស្នើសុំស្ដង់ដារ។ នៅឆ្នាំ២០២៤ខាងមុខនេះ​លោកស្រីនឹង​ពង្រីកសិប្បកម្មកែ​ច្នៃគ្រាប់ស្វាយចន្ទីជ័យ សំបូរ ដើម្បីពង្រីកផលិតកម្មក្នុងការនាំចេញ​ផលិត​ផល​គ្រាប់ស្វាយចន្ទីទៅកាន់ប្រទេសចិន ជប៉ុន និងប្រទេសកូរ៉េ ឱ្យបាន ១៥០០តោន។

លោកស្រី អ៊ិន ឡៃហួត បានបន្ដទៀតថា លោកស្រីមានក្ដីស្រមៃចង់ឱ្យផលិតផលរបស់កម្ពុជា បានទៅដល់ទីផ្សារអន្ដរជាតិ ដូចជា អាម៉េរិក និងបណ្ដាប្រទេសនៅអ៊ឺរ៉ុប ខណៈទីផ្សារចិន ពួកគេចង់បានបរិមាណច្រើន ប៉ុន្ដែពួកគេផ្ដល់តម្លៃមួយដែលមិនអាចទទួលយកបាន និងមិនមានកុងត្រាជាក់លាក់ជាមួយសិប្បកម្ម។ ក្រៅពីទីផ្សារជប៉ុន លោកស្រីកំពុងចរចាជាមួយក្រុមហ៊ុនចំនួន៤ ដែលក្នុងនោះមានក្រុមហ៊ុននៅប្រទេសកាណាដា កូរ៉េ ជប៉ុន និងប្រទេសថៃ។

ម្ចាស់សិប្បកម្មរូបនេះបាននិយាយទៀតថា ដើម្បីនាំចេញផលិតផលគ្រាប់ស្វាយចន្ទីទៅកាន់ទីផ្សារបរទេស សិប្បកម្មត្រូវមានឯកសារគ្រប់គ្រាន់ទៅតាមបែបបទ​លើការ​កែច្នៃ ទាំងពាណិជ្ជកម្ម សិប្បកម្ម និងមានម៉ាកយីហោជាក់លាក់។ ខណៈស្ដង់ដារនៃការផលិតត្រូវបណ្ដុះបណ្ដាលបុគ្គលិកចាប់ពីកសិកររហូតដល់ការកែច្នៃ។ នៅពេល​នោះសិប្បកម្មត្រូវតែប្ដេជ្ញាថា តើនៅពេលសិប្បកម្មប្រើប្រាស់ស្ដង់ដារបែបនេះតើសិប្បកម្មអាចអនុវត្តបានទេ។ ប្រសិនបើសិប្បកម្ម ប្ដេជ្ញាចិត្តធ្វើបាន នោះដៃគូរសហការ​នឹង​អាចទទួលយកបាន។

គួរជម្រាបថា អ្នកស្រីបានសម្រេចចិត្ដបបង្កើតសិប្បកម្មកែច្នៃគ្រាប់ស្វាយចន្ទីជ័យសំបូរដែលមានទីតាំងស្ថិតនៅភូមិត្រពាំងអារក្ស ឃុំជ័យ ស្រុកកំពង់ស្វាយ ខេត្ដកំពង់ធំក្នុង​គោលបំណង​កែច្នៃគ្រាប់ស្វាយចន្ទីដែលដាំក្នុងចម្ការផ្ទាល់ខ្លួន និងគ្រាប់ស្វាយចន្ទីរបស់កសិករក្នុងសហគមន៍ដើម្បីកសិករទទួលបានតម្លៃសមរម្យ និងបង្កើត​ការ​ងា​រ​​ក្នុង​សហគមន៍ផងដែរ។ កាលចាប់ផ្ដើមបើកសិប្បកម្មនេះដំបូង កម្មករបានធ្វើការបកសំបកគ្រាប់ស្វាយចន្ទីដោយដៃ និងបកបានត្រឹមតែ៣០គីឡូក្រាមប៉ុណ្ណោះក្នុងមួយថ្ងៃសម្រាប់មនុស្សម្នាក់ ប៉ុន្ដៃបច្ចុប្បន្ននេះ ក្នុងមួយថ្ងៃកម្មករ ១៥នាក់ អាចបកគ្រាប់ស្វាយចន្ទីស្រស់បានចំនួន២តោន។

គួរបញ្ជាក់ផងដែរថា អ្នកស្រី លី ហួត គឺជាកសិករដាំស្វាយចន្ទីម្នាក់ក្នុងចំណោមកសិករដាំស្វាយចន្ទី និងជាម្ចាស់សិប្បកម្មកែច្នៃគ្រាប់ស្វាយចន្ទី ជ័យសំបូរ អ្នកស្រីមាន​ការប្តេជ្ញាចិត្តខ្ពស់ក្នុងការគាំទ្រស្ត្រីក្នុងការចាប់ផ្ដើមអាជីវកម្ម និងបង្កើតការងារសម្រាប់ស្ត្រីធ្វើការនៅក្នុងសហគមន៍។ សិប្បកម្មកែច្នៃគ្រាប់ស្វាយចន្ទី ជ័យសំបូរ គឺជា​សិប្បកម្មកែច្នៃគ្រាប់ស្វាយចន្ទីដែលមានស្តង់ដារខ្ពស់មួយ។ សិប្បកម្មនេះបានកែច្នៃគ្រាប់ស្វាយចន្ទីប្រកបដោយគុណភាពខ្ពស់ដែល​អនុ​លោ​ម​​តាមប្រព័ន្ធសុវត្ថិភាព​ចំណី​អាហារ និងការគ្រប់គ្រង (GHP/HACCP) និងស្តង់ដារកែច្នៃសរីរាង្គ ដែលត្រូវបានបញ្ជាក់ដោយ Ecocert (NOP, JAS Organic និង EOS)។ គួរកត់សម្គាល់ផងដែរថា សិប្បកម្មកែច្នៃនេះបានទទួលការគាំទ្របច្ចេកទេសពីនាយកដ្ឋានកសិឧស្សាហកម្ម ក្រសួងកសិកម្ម រុក្ខាប្រមាញ់ និងនេសាទ លើកិច្ច​សន្យាកសិកម្ម ស្តង់ដារកែច្នៃ ប្រព័ន្ធគ្រប់គ្រងគុណភាពចំណីអាហារ និងសុវត្ថិភាព និងស្តង់ដារសរីរាង្គ៕