សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុទឹកស៊ីអ៊ីវ ជាប្រភេទគ្រឿងទេសមួយប្រភេទដែលគេនិយមប្រើវាដើម្បីបន្ថែមរសជាតិ បន្ថែមពណ៌ដល់ម្ហូប ក៏ដូចជាធ្វើជាទឹកជ្រលក់ក៏ពេញនិយម។ ដោយមើលឃើញពីតម្រូវការនៃគ្រឿងទេសនេះ មានសិប្បកម្មក្នុងស្រុកមួយកំពុងផលិតទឹកស៊ីអ៊ីវល្បើងដោយការបន្ទំ ផ្អាប់ទុកតាមធម្មជាតិ និងស្របតាមបច្ចេកទេសរបស់ប្រទេសជប៉ុន។
ទឹកស៊ីអ៊ីវល្បើងរូបទូក ជាយីហោទឹកស៊ីអ៊ីវក្នុងស្រុកមួយដែលផលិតឡើងតាមបច្ចេកទេសរបស់ប្រទេសជប៉ុន ដោយដាក់បន្ទំ ផ្អាប់ទុកតាមគោលការណ៍ធម្មជាតិរយៈពេលមួយឆ្នាំទើបច្រោះចេញ ហើយគេពុំមានបន្ថែមល័ក្ខ បន្ថែមក្លិន បន្ថែមរសជាតិដូចជា ប៊ីចេង ឬសារធាតុគីមីនោះឡើយ។
អ្នកស្រី នូ សុវណ្ណរី ជាម្ចាស់សិប្បកម្ម អ៊ីលីស ដែលមានផលិតទឹកស៊ីអ៊ីវល្បើងរូបទូកត្នោតបានមានប្រសាសន៍ថា៖
«មូលហេតុដែលយើងចាប់ផ្ដើមអាជីវកម្មនេះដោយសារក្នុងប្រទេសយើងមិនទាន់មានការផលិតផលទឹកស៊ីអ៊ីវល្បើងលក្ខណៈបន្ទំទុកយូរឆ្នាំតាមធម្មជាតិនៅឡើយ ទើបយើងបានអនុវត្តវិធីនេះ ហើយមិនមានផលប៉ះពាល់ដល់សុខភាព និងគ្មានសារធាតុដែលបង្កឱ្យមានជំងឺមហារីកថែមទៀតផង»។
អ្នកស្រីបន្តថា បច្ចុប្បន្នសិប្បកម្មខាងលើអាចផ្គត់ផ្គង់ប្រមាណ ១-២ម៉ឺនដបក្នុងមួយខែ ដែលដាក់លក់នៅតាមម៉ាត និងផ្សាទំនើបមួយចំនួន ក៏ដូចជានៅតាមបណ្តាបែបប្រពៃណីផងដែរ។
ចំពោះជំនាញក្នុងការផលិត គឺការអនុវត្តតាមបច្ចេកទេស និងតាមក្បួនរបស់ប្រទេសជប៉ុនដោយផ្ទាល់ ដោយទីតាំងសិប្បកម្មផលិតស្ថិតនៅភូមិគ្រួសលិច ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំ ហើយវត្ថុធាតុដើមរួមមាន សណ្ដែកសៀង ស្រូវសាឡី អំបិល និងទឹក ខណៈដែលសណ្ដែកសៀវបានប្រមូលទិញពីប្រជាកសិករនៅខេត្តព្រះវិហារ។
អ្នកស្រីបានបញ្ជាក់ថា ៖
«តាមរយៈអាជីវកម្មនេះ យើងអាចចូលរួមដល់ផលប្រយោជន៍ក្នុងសហគមន៍បានមួយចំណែក ក៏ដូចជាលើកកម្ពស់ជីវភាពកសិករដាំសណ្ដែកសៀង និងផ្ដល់ការងារដល់អ្នកឃុំក្រាំងល្វាផងដែរ។ យើងព្យាយាមផលិតចេញនូវផលិតផលដែលមានគុណភាព សុវត្ថិភាពដល់អ្នកទទួលទាន និងមានតម្លៃសមរម្យ»។
គួរបញ្ជាកដែរថា អ្នកស្រីបានចាប់ផ្ដើមអាជីវកម្មនេះនៅឆ្នាំ២០១៨ ដោយផ្ដើមពីការផលិតបន្តិចម្ដងៗ ក្នងបរិមាណប្រមាណ ២ពាន់គីឡូក្រាមនៃគ្រាប់សណ្ដែកសៀង ដោយចាប់ផ្ដើមស្ងោរ ផ្អាប់ទុករយៈពេលជាងមួយឆ្នាំទើបសម្រេចជាផលិតផល និងបន្តផលិតជារឿយៗដល់បច្ចប្បន្ន ហើយបន្តទភថ្ងៃអនាគត សិប្បកម្មនេះមានគម្រោងផលិតនូវទឹកត្រី ទឹកម្ទេស ប្រេងខ្យង ទឹកប៉េងប៉ោះ ទឹកសៀង និងគ្រឿងទឹកជ្រលក់ផ្សេងទៀតផងដែរ។
ជាចុងក្រោយ អ្នកស្រីក៏សូមថ្លែងអំណរគុណដល់អតិថិជនដែលតែងតែនិយមគាំទ្រផលិតទឹកស៊ីអ៊ីវក្នុងស្រុកប្រភេទនេះ ហើយក៏សូមអំពាវនាវឱ្យមានការគាំទ្រកាន់តែច្រើនបន្ថែមទៀត ដើម្បីឱ្យសិប្បកម្មនេះអាចបន្តដំណើរទៅមុខទៀតក្នុងការផលិតទឹកស៊ីអ៊ីវដែលមិនប៉ះពាល់ដល់សុខភាព ជួយបង្កើតការងារដល់ប្រជាជនក្នុងតំបន់ ក៏ដូចជាបានចូលរួមជួយជីវភាពសហគមន៍ផងដែរ៕
Account
Security
Favourite Content