សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រហុក គឺជាគ្រឿងផ្សំមួយប្រភេទ និងជាមុខម្ហូបដ៏ពេញនិយមនៅក្នុងសង្គមខ្មែរ។ ប្រហុកដែលផលិតចេញពីសាច់ត្រីមានជាតិប្រៃ និងមានក្លិនខ្លាំង ដែលត្រូវបានគេប្រើប្រាស់ជាគ្រឿងបន្ថែមក្នុងសម្ល និងទឹកជ្រលក់ ជាដើម។
ជាទូទៅ ប្រហុកត្រូវបានគេរក្សាទុកក្នុងពាងដីឥដ្ឋធំៗ ផ្អាប់ទុករយៈពេល ២០ថ្ងៃ ឬខែ ឬរហូតដល់រាប់ឆ្នាំដើម្បីឱ្យប្រហុកនោះកាន់តែមានគុណភាពខ្ពស់។ ទោះពេញនិយមយ៉ាងណាក្ដី ប្រហុកនៅតែស្ថិតក្នុងទម្រង់ដើមពុំសូវមានអ្នកកែច្នៃឱ្យក្លាយជាផលិតផលមួយបែបផ្សេងទាន់សម័យ និងអាចដាក់លក់តាមផ្សារទំនើបធំៗបាននៅឡើយទេ។
កញ្ញា ច័ន្ទ និមល និស្សិតឆ្នាំទី៤ ផ្នែកគីមីចំណីអាហារ នៅវិទ្យាស្ថានបច្ចេកវិទ្យាកម្ពុជា-តិចណូ ដែលចង់ធ្វើឱ្យប្រហុកមិនសូវមានក្លិនខ្លាំង និងមានអនាម័យជាងមុន បានរកឃើញគំនិតកែច្នៃប្រហុកទៅជាម្សៅចូលរួមការប្រកួតប្រជែងកែច្នៃប្រហុក ហើយទទួលបានជ័យលាភីលេខ២ ពិសេសទទួលបានការចាប់អារម្មណ៍ខ្លាំងពីគណៈកម្មការ និងអ្នកចូលរួម។
កន្លងទៅប៉ុន្មានខែក្រោយការប្រកួតប្រជែង យុវតីរូបនេះ នៅតែបន្តការផលិតលក់តាមការកម្ម៉ង់របស់អតិថិជន និងមានបំណងចង់កែច្នៃវាទៅជាអាជីវកម្មមួយទៀតក្រោយបញ្ចប់ការសិក្សា ប្រសិនបើមានអ្នកជួយជ្រោមជ្រែង និងសហការជាមួយ។
កញ្ញា ច័ន្ទ និមល បានរៀបរាប់ឱ្យដឹងថា ៖
«ដំបូងឡើយខ្ញុំធ្វើការជាក្រុម ដើម្បីធ្វើការប្រកួតប្រជែងផ្នែកប្រហុក ពេលធ្វើទៅប្លែកហើយមានគេចាប់អារម្មណ៍ មានគេចង់ទិញ ចង់យកទៅប្រើប្រាស់ ទើបបានដំណើរការមកដល់ពេលនេះទៅ»។
កញ្ញា និមល បានបន្តឱ្យដឹងថា ៖
«កាលកម្មវិធីប្រកួតហ្នឹង គេតម្រូវឱ្យយើងច្នៃប្រហុកដើម្បីងាយស្រួលដល់ការនាំចេញ ងាយស្រួលទុកដាក់ ក្លិនក៏មិនសូវមាន អត់សើម អត់ពិបាកក្នុងការវេចខ្ចប់ ដោយអាចលក់បានក្នុងមួយកែវតម្លៃ៧ដុល្លារ ហើយភាគច្រើនលក់តាមប្រព័ន្ធអនឡាញ និងតេឡេក្រាម»។
កញ្ញា ច័ន្ទ និមល និយាយថា ប្រភេទម្សៅប្រហុកនេះល្អសម្រាប់អ្នកដែលមិនសូវចូលចិត្តក្លិនប្រហុកខ្លាំង ឬរសជាតិ ប្រហុកដិតខ្លាំងពេក ហើយវាជាផលិតផលសមស្រពសម្រាប់អតិថិជនដែលគិតគូរខ្លាំងលើអនាម័យ ដោយហេតុថាការផលិតរបស់ក្រុមកញ្ញាផ្តោតសំខាន់លើអនាម័យ និងមានបច្ចេកទេសខ្លាំងលើការសម្លាប់មេរោគជាដើម។ លើសពីនេះការប្រើប្រាស់ក៏មានភាពងាយស្រួល ដោយមិនចាំបានដួសទៅលាងទឹកទេ គឺគ្រាន់តែដាក់ម្សៅចូលក្នុងសម្លប៉ុណ្ណោះ។
ទាក់ទិនទៅនឹងការផលិត កញ្ញា ច័ន្ទ និមល បានរៀបរាប់ឱ្យដឹងត្រួសៗថា ៖ «ដំបូងឡើយ ត្រូវរើសប្រភេទត្រីដែលអាចធ្វើបានល្អបំផុត ខ្ញុំរើសយកត្រីរៀលពីកន្លែងណាដែលគាត់ធ្វើដោយខ្លួនឯង ដោយមិននាំចូល បន្ទាប់មកយើងយកទៅសម្ងួត និងលាយម្សៅ ទើបអាចបង្កើតបានជាផលិតផលនេះ»។
កញ្ញា ច័ន្ទ និមល បានបញ្ជាក់ថា ម្សៅប្រភេទនេះអាចប្រើប្រាស់បានជាមួយម្ហូបច្រើនប្រភេទដូចជា បុកល្ហុង ដាក់ក្នុងសម្លជាច្រើន លើកលែងតែប្រភេទម្ហូបមួយចំនួនដែលត្រូវការប្រហុកស្រស់ មិនអាចប្រើបានទេ។ ជុំវិញគម្រោងអាជីវកម្មទៅថ្ងៃមុខ កញ្ញា ច័ន្ទ និមល មានកូនចិត្តចង់ពង្រីកម្សៅប្រហុកនេះទៅជាអាជីវកម្មស្តង់ដាមួយ ប៉ុន្តែកញ្ញាថាខ្លួនត្រូវការធនធានបន្ថែម ត្រូវការដើមទុន និងចង់បានអ្នកអាចជួយសហការ ឬអ្នកវិនិយោគផងដែរ៕ អត្ថបទដោយ ៖ ស្រ៊ុន សិរីវឌ្ឍនៈ
Account
Security
Favourite Content