ភ្នំពេញ ៖ កម្មវិធីផ្សព្វផ្សាយបច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុ ឬហៅកាត់ជាភាសាអង់គ្លេសថា ASPIRE គឺជាកម្មវិធីមួយត្រូវបានបង្កើតឡើង ដើម្បីជួយដល់កសិករទាំងផ្នែកបច្ចកទេសកសិកម្ម ស្វែងរកទីផ្សារ ពិសេសការចងក្រងជាបណ្ដុំកសិករ ដើម្បីលក់កសិផលដែលទទួលបានទាំងទំនុកចិត្ត និងតម្លៃល្អ។

មួយក្នុងចំណោម យុទ្ធសាស្ត្រជាច្រើនផ្សេងទៀតរបស់កម្មវិធីនេះ ការផ្សារភ្ជាប់ផលិតផលកម្មសិកម្មរបស់កសិករឱ្យទៅជាទីផ្សារ ត្រូវបានដាក់ចេញក្នុងគោលបំណងសម្របសម្រួល ដល់ការអភិវឌ្ឍបណ្ដុំអាជីវកម្មរបស់កសិករខ្នាតតូច និងពង្រីកចលនាសម្ព័ន្ធអាជីវកម្មរបស់ក្រុមផ្ទាល់តែម្ដង។

កម្មវិធី ASPIRE ជាកម្មវិធីមួយដែលធ្វើការមួយកសិករ ពិសេសកសិករក្រីក្រនិងងាយរងគ្រោះ តាមរយៈការជំរុញ​ឱ្យការងារកសិកម្មរបស់ពួកគេអាចឆ្លើយតបទៅនឹងភាពធន់នឹងការប្រែប្រួលអាកាសធាតុ ហើយអាចក្លាយទៅជាអាជីវកម្មដែលអាចរកប្រាក់ចំណេញបានថែមទៀតផង។ កម្មវិធីដដែលនេះបានច្រងក្រងបណ្ដុំកសិករ និងធ្វើការរួមគ្នាក្នុងការនាំយកបន្លែចូលទៅកាន់ទីផ្សារ និងអាចលក់កសិផលរបស់ខ្លួនឱ្យកាន់តែមានភាពប្រកួតប្រជែង ស្មើភាព និងមានទំនុកចិត្ត ទាំងបរិមាណ និងគុណភាព។

សម្រាប់បណ្ដុំអ្នកផលិត គឺជាការប្រមូលផ្ដុំអ្នកដែលពាក់ព័ន្ធ មានទំនាក់នងជាមួយគ្នាក្នុងភូមិសាស្ត្រណាមួយ ដើម្បីទាញយកប្រយោជន៍ដោយផ្ទាល់ និងដោយប្រយោលក្នុងចំណោមកិច្ចការរបស់ពួកគេឱ្យបានច្រើនបំផុត តាមរយៈកិច្ចសហការ និងទទួលបានផលប្រសើរជាងមុន។

ការចងក្រងបណ្ដុំអ្នកផលិតតាមភូមិសាស្ត្រ ត្រូវមានតួអង្គសំខាន់ៗនៅក្នុងខ្សែច្រវ៉ាក់តម្លៃក្នុងតំបន់តែមួយ រួមមាន អ្នកផ្គត់ផ្គង់ធាតុចូលកសិកម្ម កសិករ អ្នកទិញ អ្នកផ្ដល់សេវាកម្ម និងភ្នាក់ងាររដ្ឋបាលដែលបានចូលរួមពិភាក្សាគ្នា លើបញ្ហាដែលបានរកឃើញនៅក្នុងកិច្ចប្រជុំអ្នកពាក់ព័ន្ធជាច្រើនភាគី ហើយបង្កើតជាផែនការសកម្មភាពរួមគ្នា ដើម្បីដោះស្រាយបញ្ហានានា។

បណ្ដុំអ្នកផលិតនេះទៀតសោត ជាសហគមន៍អ្នកពាក់ព័ន្ធដែលជាកត្តាមួយ ដើម្បីពន្លឿនកំណើននៅក្នុងខ្សែច្រវ៉ាក់ទំនិញ ដែលបានជ្រើសរើស ជំរុញឱ្យកសិករខ្នាតតូចចូលរួមបានយូរអង្វែងក្នុងខ្សែច្រវ៉ាក់តម្លៃ និងធ្វើឱ្យខ្សែច្រវ៉ាក់ផលិតកម្មបានប្រសើរឡើងទាំងការប្រកួតប្រជែងស្មើរភាព ការសម្របសម្រួល ការជឿទុកចិត្ត និងការបង្កើតភាពជាដៃគូរវាងវិស័យសាធារណ ឯកជន និងស៊ីវិល។

ចំណែកការងារគេផ្សព្វផ្សាយដែលគេអនុវត្តរួមមាន កសិកម្មឆ្លាតវៃ បន្ស៊ាំ និងបម្រែបម្រួលអាកាសធាតុ ការតភ្ជាប់បណ្ដាញទីផ្សារ និងបច្ចេកទេសទុកដាក់ក្រោយពេលប្រមូលផល ដែលជាផ្នែកមួយជួយឱ្យកសិករខ្នាតតូចអាចមានលទ្ធភាពពង្រីកបណ្ដុំនិងទំនាក់ទំនងជាមួយឈ្មួញ ដែលអាចលក់កសិផលបានក្នុងតម្លៃល្អ និងទទួលបានផលចំណេញសមរម្យ។

គួរបញ្ជាក់ដែរថា កម្មវិធី ASPIRE ជាកម្មវិធីរបស់រាជរដ្ឋាភិបាលកម្ពុជា ដោយមានកិច្ចគាំទ្រពីមូនិធិអន្តរជាតិសម្រាប់អភិវឌ្ឍកសិកម្ម ហៅកាត់ថា IFAD ដែលគោលបំណងជារួមរបស់កម្មវិធីនេះ គឺដើម្បីកែលម្អឱ្យកាន់តែប្រសើរឡើងនូវសេវាផ្សព្វផ្សាយកសិកម្មសម្រាប់កសិករខ្នាតតូចនៅក្នុងប្រទេសកម្ពុជា៕