សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្រទាលកន្ទុយក្រពើ ជាប្រភេទប្រទាលមួយប្រភេទដែលមានសារប្រយោជន៍ច្រើនសម្រាប់សុខភាព ជាពិសេសអាចច្នៃធ្វើជាភេសជ្ជៈដែលមានរសជាតិឆ្ងាញ់ថែមទៀតផង។ ក្នុងនោះក៏មានអាជីវកម្មថ្មីមួយចាប់ផ្ដើមផលិតទឹកប្រទាលកន្ទុយក្រពើដែលជាផលិតផលធម្មជាតិ ផលិតពីប្រទាលស្រស់ៗ និងជួយសល់ជីវភាពសហគមន៍ តាមរយៈការទទួលទិញពីអ្នកដាំនៅក្នុងតំបន់។
កញ្ញា សំ ស្រីនុត ជាម្ចាស់អាជីវកម្មទឹកប្រទាលកន្ទុយក្រពើសុខភាព បានលើកឡើងថា ៖
«មូលហេតុដែលយើងផលិតទឹកប្រទាលនេះ គឺដោយសារមើលឃើញពីសក្ដានុពលដំណាំប្រទាលកន្ទុយក្រពើ ហើយចង់ផលិតនូវទឹកប្រទាលកន្ទុយក្រពើក្នុងស្រុក ហើយអាចលើកស្ទួយវិស័យកសិកម្មនៅកម្ពុជាផង និងផ្ដល់នូវភេសជ្ជៈល្អចំពោះសុខភាពផង ណាមួយក៏មិនចំណាយដើមទុនច្រើនក្នុងការផលិតផងដែរ»។
កញ្ញាបន្តថា អាជីវកម្មនេះផ្ដោតលើតែផលិតផលទឹកប្រទាលកន្ទុយក្រពើមួយមុខប៉ុណ្ណោះ ដែលផលិតដោយខ្លួនឯង ផលិតពីប្រទាលកន្ទុយក្រពើស្រស់ៗ ធម្មជាតិមួយរយភាគរយ ប្រើស្ករក្រាមដែលមិនប៉ះពាល់សុខភាព អាចញ៉ាំបានទាំងចាស់ ទាំងក្មេង ដែលអ្នកមានជំងឺទឹកនោមផ្អែម និងស្ត្រីមានផ្ទៃពោះ ក៏អាចទទួលទានបានដែរ។
ចំពោះតម្លៃវិញ ទឹកប្រទាលកន្ទុយក្រពើសុខភាពមានតម្លៃពី ២៥០០-៣០០០រៀលក្នុងមួយដប ហើយអតិថិជនភាគច្រើនជាអ្នករស់នៅរាជធានីភ្នំពេញ ដែលនិយមគិតគូរពីសុខភាព និងផ្ដោតលើគុណភាពផលិតក្នុងស្រុកផងដែរ។ សម្រាប់វត្ថុធាតុដើមវិញ ប្រទាលកន្ទុយក្រពើ ១០គីឡូក្រាម អាចផលិតបានប្រមាណ ៣០-៤០ដប។
ពាក់ព័ន្ធនឹងការផលិតវិញ ម្ចាស់អាជីវកម្មរូបនេះបន្ថែមទៀតថា ដំបូងឡើយគេត្រូវចិតសំបកប្រទាលកន្ទុយក្រពើឱ្យស្អាត ហាន់សាច់ជាដុំតូចៗ និងលាងឱ្យអស់ទឹកអន្តាយៗ រួចដាក់ដាំទឹកស្ងោរប្រទាលដែលបានហាន់រួច ស្ងោររម្ងាស់ឱ្យសាច់ប្រទាលឆ្អិនល្អទើបមិនធុំក្លិន ហើយបន្ថែមស្ករតាមបរិមាណដែលគេកម្ម៉ង់។
គួរបញ្ជាក់ដែរថា អាជីវកម្មទឹកប្រទាលកន្ទុយក្រពើសុខភាពខាងលើនេះបានចាប់ផ្ដើមឡើងនៅដើមឆ្នាំ២០២៣ ដោយចំណាយដើមទុនត្រឹមតែប្រមាណ ២០ដុល្លារ ទៅលើការទិញដបសម្រាប់វេចខ្ចប់ និងទិញវត្ថុធាតុដើម ដោយក្នុងដំណាក់កាលដំបូងកញ្ញាយកប្រទាល់កន្ទុយក្រពើដែលខ្លួនមានស្រាប់រៀបចំផលិត លុះក្រោយមកដោយមានការបញ្ជាទិញកាន់តែច្រើនទើបចាប់ផ្តើមស្វែងការផ្គត់ផ្គង់ពីអ្នកដាំនៅក្នុសហគមន៍។
ចុងក្រោយ កញ្ញា សំ ស្រីនុត ក៏មានគម្រោងចង់ពង្រីកទីផ្សារទឹកប្រទាលកន្ទុយក្រពើសុខភាពឱ្យកាន់តែទូលំទូលាយ ជាពិសេសអាចចែកចាយតាមបណ្ដាខេត្តនានា ដើម្បីឱ្យបងប្អូនខ្មែរទទួលបាននូវផលិតផលល្អសម្រាប់សុខភាព និងជាផ្នែកមួយជួយដល់សេដ្ឋកិច្ចកសិករដែលដាំដើមប្រទាលកន្ទុយក្រពើ៕
Account
Security
Favourite Content