សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ថានភាពអចលនទ្រព្យទាំងក្នុងប្រទេស និងក្នុងតំបន់នាពេលបច្ចុប្បន្ននេះត្រូវបានមើលឃើញថា នៅតែបន្តជួបបញ្ហា និងវិបត្តិ ខណៈដែលអ្នកជំនាញនៅក្នុងវិស័យអចលនទ្រព្យបានលើកឡើងថា វិស័យមួយនេះត្រូវការពេលវេលាយ៉ាងហោចណាស់ក៏៣-៥ឆ្នាំ ដើម្បីជំរុញ និងស្ដារឱ្យសន្ទុះឡើងវិញ ។
លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យបានឱ្យដឹងថា គិតចាប់ពីឆ្នាំនេះរហូត៥ឆ្នាំទៅមុខទៀត វិស័យអចលនទ្រព្យកម្ពុជា ជាពិសេសវិស័យសំណង់វាមិនអាចមានការវិនិយោគថ្មីៗក្នុងទំហំទុនច្រើននោះទេ តែវាជាពេលវេលាដែលត្រូវរួមគ្នាដោះស្រាយបញ្ហាដែលកើតឡើងនៅពេលនេះ។ បច្ចុប្បន្ននេះ ផ្នែកលំនៅដ្ឋានមានការអភិវឌ្ឍច្រើន ប៉ុន្តែមិនមានអ្នកទិញ ហើយលំនៅដ្ឋានខ្លះក៏ត្រូវបានក្រុមហ៊ុនរឹបអូសយកវិញ ព្រោះតែម្ចាស់ផ្ទះមិនមានលុយបង់រំលស់ជាមួយក្រុមហ៊ុនអភិវឌ្ឍន៍បន្តទៀត។
លោកឧកញ៉ាបន្តថា ៖
“យើងងាកទៅមើលសំណង់ដែលជាប់គាំងនៅក្នុងក្រុងព្រះសីហនុរយៈពេល៣ឆ្នាំហើយ នៅតែដោះស្រាយមិនទាន់អស់នៅឡើយ ហើយក៏ចាប់ផ្ដើមមកជួបវិបត្តិដោយសារតែកូវីដ១៩ និងវិបត្តិនៃសង្គ្រាមរវាងរុស្ស៊ី និងអ៊ុយក្រែន ដូច្នេះហើយពីពេលនេះទៅ៥ឆ្នាំខាងមុខទៀត គឺជាពេលវេលាដែលយើងត្រូវដោះស្រាយបញ្ហាដែលបានកើតឡើងតាំងពីកូវីដ១៩ និងវិបត្តិថ្មីៗនៃសង្គ្រាមរវាងដែលបណ្ដាលឱ្យកើនឡើងនៃអតិផរណា។”
លោកឧកញ៉ាបន្ថែមថា ៖
“នៅរយៈពេល៥ឆ្នាំក្រោយ នៅពេលស្ថានភាពអាក្រក់នៃវិស័យអចលនទ្រព្យបានប្រសើរ តម្រូវការទីផ្សារអាចនឹងងើបឡើងវិញ ដូច្នេះទើបអាចមានការវិនិយោគថ្មីៗចូលមកកម្ពុជា ប៉ុន្តែយ៉ាងណាក្ដី ការវិនិយោគក្នុងវិស័យនេះនាពេលអនាគត គឺត្រូវមានការគិតគូរម៉ត់ចត់ ជាពិសេសការត្រួតពិនិត្យពីសំណាក់អាជ្ញាធរ និងអ្នកពាក់ព័ន្ធដើម្បីឱ្យការវិនិយោគប្រកបដោយរន្តរភាព។”
អ្នកនាង គឹម គិនកេសា នាយិការងនៃក្រុមហ៊ុន CBRE Cambodia បានឱ្យដឹងផងដែរថា នៅក្នុងឆ្នាំ២០២៣នេះ គម្រោងវិនិយោគថ្មីៗមិនសូវជាមានទេ គឺមានគម្រោងដែលបានផ្អាកកាលពីអំឡុងកូវីដ១៩ ដែលចាប់ផ្ដើមដំណើរការឡើងវិញ តែក៏មិនសូវជាមានច្រើននោះដែរ ។
អ្នកនាងក៏បានបញ្ជាក់ប្រាប់ដល់វិនិយោគិនទាំងក្នុង និងក្រៅប្រទេសឱ្យមានការប្រុងប្រយ័ត្នខ្ពស់ ចំពោះការបណ្ដាក់ទុនវិនិយោគក្នុងវិស័យអចលនទ្រព្យ ពីព្រោះថាក្នុងឆ្នាំ២០២៣នេះ ស្ថានភាពមើលទៅហាក់កាន់តែពិបាកជាងឆ្នាំ២០២១ និងឆ្នាំ២០២២ទៅទៀត ។
គួរបញ្ជាក់ដែរថា ក្នុងចំណោមផ្នែកផ្សេងៗនៃវិស័យអចលនទ្រព្យ ត្រូវបានមើលឃើញថា ទីផ្សារដីឡូត៍ និងទីផ្សារលំនៅឋាន ហាក់ជួបបញ្ហាច្រើនជាងគេ ក្នុងនោះអ្នកអភិវឌ្ឍន៍ដីឡូត៍មួយចំនួនមិនបានផ្ដល់ប្លង់កម្មសិទ្ធិជូនអតិថិជន ប្រមូលលុយពីអតិថិជនរួចហើយតែមិនទាន់អភិវឌ្ឍន៍ដីឱ្យអតិថិជន។ សម្រាប់លំនៅដ្ឋានវិញក៏ឃើញថាមានក្រុមហ៊ុនអភិវឌ្ឍន៍ខ្លះមិនបានអភិវឌ្ឍន៍ជូនអតិថិជនតាមកិច្ចសន្យា ដែលនាំឱ្យមានការតវ៉ាពីសំណាក់ពលរដ្ឋទិញគម្រោងទាំងនោះផងដែរ ៕
Account
Security
Favourite Content