សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ពានរង្វាន់អាស៊ាន សម្រាប់អាជីវកម្ម និងធុរកិច្ច ដែលបានជួយកិច្ចការសង្គមប្រចាំឆ្នាំ២០២៤ ត្រូវបានរៀបចំឡើងនៅរាជធានីភ្នំពេញ ប្រទេសកម្ពុជា កាលពីរាត្រីថ្ងៃទី ១១ ខែវិច្ឆិកា ឆ្នាំ២០២៤ ដោយសហគ្រិនចំនួន៧៥រូបមកពី១៩ប្រទេស ត្រូវបានជ្រើសរើសសម្រាប់ការផ្ដល់ជូនពានរង្វាន់កម្រិតអាស៊ានមួយនេះ ។
នៅក្នុងឱកាសនៃពិធីប្រគល់ពានរង្វាន់នេះដែរ លោកបណ្ឌិត គង់ វិចិត្រា ស្ថាបនិកអង្គការ KPF និងជាអនុប្រធានក្លិបGlobal Entrepreneur 1% Club ( កិច្ចការងារសង្គម ) បានមានប្រសាសន៍ថា ព្រឹត្តិការណ៍ដ៏អស្ចារ្យនេះ បានបង្ហាញពីការប្ដេជ្ញាចិត្តក្នុងចក្ខុវិស័យរបស់សមាគម ដែលមិនគិតត្រឹមតែរកប្រាក់ចំណេញប៉ុណ្ណោះទេ តែថែមទាំងផ្ដល់ត្រលប់មកវិញដល់សង្គមផងដែរ ។
លោកបន្តថា ៖
«ការទទួលខុសត្រូវសង្គម មិនគ្រាន់តែជាការផ្ដល់ត្រលប់មកវិញទេ វាគឺជាការកសាងអនាគតប្រកបដោយចីរភាពសម្រាប់មនុស្សគ្រប់រូប ។ ក្នុងនាមខ្ញុំជាអ្នកទទួលខុសត្រូវលើសង្គមមួយរូប ខ្ញុំសូមអំពាវនាវដល់ម្ចាស់អាជីវកម្ម និងសហគ្រិនជាច្រើនផ្សេងទៀត បន្តគាំទ្រជួយដល់សង្គម ដោយសារវាមានសារសំខាន់ណាស់សម្រាប់កិច្ចអភិវឌ្ឍប្រទេស»។
លោក ហ៊ាង វុទ្ធា ប្រធានក្លិប Global Entrepreneur 1% Club បានមានប្រសាសន៍ឱ្យដឹងដែរថា ពានរង្វាន់អាស៊ានសម្រាប់អាជីវកម្ម និងធុរកិច្ចឆ្នើម ដែលបានជួយកិច្ចការសង្គមប្រចាំឆ្នាំ២០២៤នេះ បានឆ្លុះបញ្ចាំងយ៉ាងជ្រាលជ្រៅជាមួយនឹងទំនួលខុសត្រូវសង្គម ជាពិសេសកិច្ចការជួយសង្គម ។
លោកបានបញ្ជាក់ថា ៖
«វាមិនត្រឹមតែលើកកម្ពស់ដំណើរការអាជីវកម្មប៉ុណ្ណោះទេ ប៉ុន្តែថែមទាំងលើកកម្ពស់ជីវភាពរស់នៅរបស់មនុស្សជុំវិញខ្លួនយើងផងដែរ ។ តាមរយៈកម្មវិធីដ៏អស្ចារ្យមួយនេះ ក៏បានឆ្លុះបញ្ចាំងពីជំហានសំខាន់ៗដែលយើងធ្វើក្នុងនាមយើងជាផ្នែកមួយលើការជំរុញកិច្ចអភិវឌ្ឍប្រកបដោយចីរភាព លើកកម្ពស់ជីវិត និងរួមចំណែកដល់សុខុមាលភាពនៃសង្គមក្នុងតំបន់អាស៊ានទាំងមូល» ។
លោកបន្តថា កម្មវិធីពានរង្វាន់នេះ ត្រូវបានរៀបចំឡើងអស់រយៈពេល៨០ថ្ងៃដែលមានអ្នកចូលរួមដាក់ពាក្យចំនួន ៣ ៧៦០នាក់ មកពីបណ្ដាប្រទេសចំនួន ៣៩ប្រទេស ។ ក្នុងនោះគណៈកម្មាធិការបានជ្រើសរើសអ្នកមានសក្ដានុពលចំនួន ៤៨០នាក់ ហើយឈានទៅដល់វាយតម្លៃជាផ្លូវការចំនួន ២៨០នាក់ មកពី ៣០ប្រទេស ។ ជាចុងក្រោយ គណៈកម្មាធិការបានសម្រេចជ្រើសរើសយកម្ចាស់ជ័យលាភីសរុបចំនួន ៧៥រូបមកពីប្រទេសចំនួន១៩ ដើម្បីផ្ដល់ជូនពានរង្វាន់ ។
គួរបញ្ជាក់ថា នៅក្នុងកម្មវិធីប្រគល់ពានរង្វាន់នេះដែរ ក៏មានការចូលរួមពីតំណាងក្រសួងស្ថាប័នសំខាន់ៗមួយចំនួនរួមមាន តំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងមកពីក្រសួងពាណិជ្ជកម្ម ប្រធានសភាពាណិជ្ជកម្មសិង្ហបុរីប្រចាំប្រទេសកម្ពុជា និងប្រធានសមាគមវិនិយោគកម្ពុជា-សិង្ហបុរីជាដើម ។
សម្រាប់កម្មវិធីពានរង្វាន់អាស៊ាន សម្រាប់អាជីវកម្ម និងធុរកិច្ចដែលជួយកិច្ចការសង្គម ត្រូវបានបែងចែកទៅជាពានរង្វាន់មាន៥ប្រភេទ ដែលក្នុងនោះ ពានរង្វាន់អាស៊ានសម្រាប់ថ្នាក់ពានសហគមន៍ និងធុរកិច្ចដែលជួយកិច្ចការសង្គមចំនួន១០រូប ពានរង្វាន់អាស៊ានសម្រាប់ថ្នាក់ពានសិល្បករ/សិល្បការិនីនិងធុរកិច្ចដែលជួយកិច្ចការសង្គមចំនួន៣រូប ពានរង្វាន់អាស៊ានសម្រាប់អាជីវកម្ម និងធុរកិច្ចដែលជួយកិច្ចការសង្គមចំនួន១២រូប ពានរង្វាន់អាស៊ានសម្រាប់ពានសហគ្រិននិងធុរកិច្ចដែលជួយកិច្ចការសង្គមចំនួន៣៤រូប និងពានរង្វាន់អាស៊ានសម្រាប់ថ្នាក់ដឹកនាំនិងធុរកិច្ចដែលជួយការសង្គមមានចំនួន១៣រូប ៕
Account
Security
Favourite Content