បរទេស ៖ យោងទៅតាមប្រភពពី Markets Insider បានរាយការណ៍ថា ធនាគាររដ្ឋធំៗរបស់ចិនកំពុងមមាញឹកក្នុងការលក់ប្រាក់ដុល្លារអាមេរិកដើម្បីទិញប្រាក់យ័ននៅក្នុងទីផ្សារប្តូរប្រាក់បរទេសទាំងក្នុង និងក្រៅប្រទេសកាលពីថ្ងៃចុងសប្ដាហ៍កន្លងទៅនេះ ដើម្បីទប់ទល់នឹងការធ្លាក់តម្លៃប្រាក់យ័ន។

ទន្ទឹមនឹងនេះ ចិនបានស្នើឱ្យធនាគារគ្រប់គ្រងដោយរដ្ឋចាត់វិធានការនៅក្នុងទីផ្សាររូបិយប័ណ្ណក្នុងសប្តាហ៍នេះ ដើម្បីកំណត់ភាពប្រែប្រួលនៃប្រាក់យ័ន។ លើសពីនេះ មន្ត្រីជាន់ខ្ពស់ចិនកំពុងបង្កើនកិច្ចខិតខំប្រឹងប្រែងលើវិធានការកាត់បន្ថយបរិមាណទុនបម្រុងរូបិយប័ណ្ណបរទេស ដើម្បីទប់ទល់នឹងសេដ្ឋកិច្ចមិនឱ្យធ្លាក់ចុះបន្ថែមទៀត។ គេយល់ឃើញថា វាគឺជាយុទ្ធសាស្ត្រស្រដៀងគ្នាទៅនឹងយុទ្ធសាស្ត្រកាលពីឆ្នាំ២០២២ នៅពេលដែលធនាគារកណ្តាលចិនបានស្នើសុំឱ្យធនាគាររដ្ឋធំៗត្រៀមខ្លួនលក់ប្រាក់ដុល្លារចេញដើម្បីទិញប្រាក់យ័ន។ អ្នកវិនិយោគម្នាក់ដែលរស់នៅទីក្រុងសៀងហៃនិយាយថា ការលក់ប្រាក់ដុល្លារចេញពីធនាគាររដ្ឋបានក្លាយទៅជារឿងធម្មតាហើយ ដើម្បីទប់ទល់នឹងការធ្លាក់តម្លៃប្រាក់យ័ន។

នៅក្នុងខែនេះ ប្រាក់យ័នចិនបានធ្លាក់តម្លៃប្រហែល ២,៤ ភាគរយ ឬ ៧,៣៥ យ័នក្នុង ១ ដុល្លារ។ កាលពីថ្ងៃព្រហស្បតិ៍កន្លងទៅនេះ ធនាគារកណ្តាលរបស់ចិនបាននិយាយថា ទីផ្សាររូបិយប័ណ្ណបរទេស គឺស្របតាមមូលដ្ឋានគ្រឹះ ហើយខ្លួនប្តេជ្ញាថានឹងទប់ស្កាត់ការឡើងចុះនៃតម្លៃប្រាក់យ័ន។ ទោះជាយ៉ាងណាក្តី វាក៏ជាបញ្ហាមួយស្មុគស្មាញផងដែរ ដោយសារ​ធនាគារកណ្តាល​ចិនត្រូវ​រក្សា​ស្ថិរភាព​នៃប្រាក់​យ័ន ខណៈដែល​​ព្យាយាម​ជំរុញ​សេដ្ឋកិច្ច​ដែល​កំពុង​ធ្លាក់​ចុះ។

ស្របពេលនេះដែរ អ្នកបង្កើតគោលនយោបាយបានកំណត់នូវអត្រាយោងប្រចាំថ្ងៃដ៏រឹងមាំមួយចំនួនសម្រាប់ការជួញដូរជាប្រាក់យ័ន។ ដើម្បីជួយស្តារកំណើនសេដ្ឋកិច្ចឡើងវិញ ពួកគេក៏បានអនុវត្តការកាត់បន្ថយអត្រាការប្រាក់មួយចំនួន ដែលជាមូលហេតុធ្វើឲ្យប្រាក់យ័នធ្លាក់ចុះតម្លៃ។ យ៉ាងណាមិញ កាលពីសប្តាហ៍មុនកន្លងទៅនេះ តួលេខនៃការលក់រាយ និងទិន្នផលឧស្សាហកម្មបានបង្ហាញថា កំណើនកំពុងធ្លាក់ចុះកាន់តែខ្លាំង។ កាលពីដើមខែសីហានេះ ការិយាល័យស្ថិតិជាតិរបស់ចិននិយាយថា តម្លៃអ្នកប្រើប្រាស់ប្រចាំឆ្នាំបានធ្លាក់ចុះនៅខែកក្កដាជាលើកដំបូងក្នុងរយៈពេលពីរឆ្នាំ ដែលជំរុញឱ្យមានការភ័យខ្លាចអំពីបរិត្តផរណា (ការធ្លាក់ចុះនៃថ្លៃទំនិញ និង សេវាកម្ម)៕