ប្រសិនបើអ្នកមិនរៀនគ្រប់គ្រងលុយរបស់អ្នកទេ នោះអ្នកផ្សេងទៀតនឹងរកវិធីគ្រប់គ្រងលុយឲ្យអ្នកនៅពេលអនាគតជាមិនខាន ដូច្នេះអ្នកគួររៀនគ្រប់គ្រងហិរញ្ញវត្ថុ និងក្លាយជាម្ចាស់ការដោយខ្លួនចាប់ពីពេលនេះទៅ។ 

វិធីសាស្ត្រ ក៏ដូចជារបៀបនៃការគ្រប់គ្រងលើការចំណាយថវិកាផ្ទាល់ខ្លួនមិនមែនជាមុខវិជ្ជាដែលត្រូវបានហាត់រៀននៅសាល និងវិទ្យាល័យ ឬមហាវិទ្យាល័យនោះទេ។ ដូច្នេះ កង្វះខាតលើការអប់រំផ្នែកហិរញ្ញវត្ថុមូលដ្ឋាននេះបានធ្វើឱ្យយុវវ័យជាច្រើនមិនបានដឹងអំពីរបៀបគ្រប់គ្រងថវិកា ជាពិសេសការចំណាយខុសខ្ទង់។ ខាងក្រោមនេះ គឺជាចំណុចសំខាន់ៗចំនួន ៤ ស្ដីអំពីហិរវត្ថុសម្រាប់យុវវ័យ។ គន្លឹះហិរញ្ញវត្ថុទាំងនេះត្រូវបានរៀបចំឡើងដើម្បីជួយអ្នកឱ្យរស់នៅជាមួយហិរញ្ញវត្ថុដ៏ល្អ និងទាញយកអត្ថប្រយោជន៍ទាំងដែលអ្នកនៅក្មេងមានពេលវេលាសន្សំ និងវិនិយោគបានកាន់តែច្រើន។

១. រៀនគ្រប់គ្រងខ្លួនឯង ៖ ប្រសិនបើអ្នកមានសំណាង ឪពុកម្តាយរបស់អ្នកបានបង្រៀនជំនាញនេះដល់អ្នកនៅពេលអ្នកនៅក្មេង។ បន្ថែមពីនេះ អ្នកក៏អាចរៀនគ្រប់គ្រងដោយខ្លួនឯងបានក្នុងការរក្សាហិរញ្ញវត្ថុផ្ទាល់ខ្លួនឱ្យមានសណ្តាប់ធ្នាប់។ ថ្វីត្បិតតែអ្នកអាចប្រើកាតឥណទានដែលឪពុកម្ដាយផ្តល់ឱ្យទិញទំនិញអនឡាញបានក្នុងមួយនាទីទៅតាមអ្វីដែលអ្នកចង់បាន ប៉ុន្តែអ្នកគួរតែរង់ចាំដល់ពេលដែលអ្នកសន្សំលុយបានគ្រប់គ្រាន់ ហើយវាតាមក្រោយទើបជាការប្រសើរ។ ដូចនេះយុវវ័យគួរតែចេះគ្រប់គ្រងខ្លួនឯងក្នុងការចាយវាយ។

២. គ្រប់គ្រងអនាគតហិរញ្ញវត្ថុរបស់អ្នក ៖ ប្រសិនបើអ្នកមិនរៀនគ្រប់គ្រងលុយរបស់អ្នកទេ នោះអ្នកផ្សេងទៀតនឹងរកវិធីគ្រប់គ្រងលុយឲ្យអ្នក។ មនុស្សទាំងនេះខ្លះអាចមានចេតនាអាក្រក់ ដូចជាអ្នករៀបចំផែនការហិរញ្ញវត្ថុដែលមិនមានភាពស្មោះត្រង់ ហើយក៏មានអ្នកផ្សេងទៀតអាចមានចេតនាល្អជាដើម។ ជំនួសឱ្យការពឹងផ្អែកលើអ្នកដទៃ សម្រាប់ដំបូន្មានហិរញ្ញវត្ថុ អ្នកអាចចំណាយពេលអានសៀវភៅមូលដ្ឋានអំពីហិរញ្ញវត្ថុផ្ទាល់ខ្លួន។ នៅពេលដែលអ្នកមានចំណេះដឹង អ្នកមានសមត្ថភាពគ្រប់គ្រងហិរញ្ញវត្ថុផ្ទាល់ខ្លួនរបស់អ្នកដោយពុំចាំបាច់ពឹងអ្នកដទៃឡើយ។

៣. ដឹងពីចរន្តលុយរបស់អ្នក ៖ នៅពេលអ្នកបានអានសៀវភៅហិរញ្ញវត្ថុផ្ទាល់ខ្លួនពីរ ឬបីក្បាល អ្នកនឹងដឹងថា វាសំខាន់ប៉ុណ្ណាក្នុងការរក្សាការចំណាយតិចជាងចំណូល។ ការរៀបចំគម្រោងថវិកាជារឿងសំខាន់។ នៅពេលដែលអ្នកឃើញថាថ្លៃកាហ្វេពេលរសៀលរបស់អ្នកសរុបជាប្រចាំខែ អ្នកនឹងដឹងថាការផ្លាស់ប្តូរតិចតួចដែលអាចគ្រប់គ្រងបានចំពោះការចំណាយប្រចាំថ្ងៃរបស់អ្នក ព្រោះវាអាចមានផលប៉ះពាល់យ៉ាងធំដល់ស្ថានភាពហិរញ្ញវត្ថុរបស់អ្នក។

៤. ចាប់ផ្តើមមូលនិធិសង្គ្រោះបន្ទាន់ ៖ មិនថាអ្នកជំពាក់ប្រាក់កម្ចីសិក្សា ឬបំណុលកាតឥណទានប៉ុន្មានទេ ហើយមិនថាប្រាក់ខែរបស់អ្នកទាបប៉ុណ្ណាទេ វាជាការប្រសើរក្នុងការដាក់ប្រាក់មួយចំនួនទៅក្នុងកញ្ចប់ថវិកាសម្រាប់គ្រាអាសន្នជារៀងរាល់ខែ។ ការមានលុយសន្សំដើម្បីប្រើសម្រាប់គ្រាអាសន្នអាចធ្វើឱ្យអ្នកមិនមានបញ្ហាផ្នែកហិរញ្ញវត្ថុ និងជួយឱ្យអ្នកគេងលក់ស្រួលនៅពេលយប់។ ប្រសិនបើអ្នកមានទម្លាប់សន្សំប្រាក់ ហើយចាត់ទុកវាជាការចំណាយប្រចាំខែដែលមិនអាចប្រកែកបាននោះ មិនយូរប៉ុន្មានអ្នកនឹងមានលុយច្រើនជាងកញ្ចប់ប្រាក់សម្រាប់គ្រាអាសន្ន។ អ្នកនឹងមានប្រាក់ចូលនិវត្តន៍ ប្រាក់ដើរលេងវិស្សមកាល ឬសូម្បីតែប្រាក់សម្រាប់វិនិយោគបន្ថែម។ បន្ថែមពីនេះអ្នកគួរដាក់កញ្ចប់ប្រាក់របស់អ្នកទៅក្នុងគណនីសន្សំស្តង់ដារ ដែលមានការប្រាក់ខ្ពស់។ បើមិនដូច្នោះទេ អតិផរណានឹងបំផ្លាញតម្លៃនៃការសន្សំរបស់អ្នក៕