សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប៖ គូឆាយ ជាប្រភេទបន្លែដែលត្រូវបានយកទៅច្នៃធ្វើជាម្ហូបអាហារបានជាច្រើនមុខ មិនថាជាមុខសម្លរទឹក ម្ហូបឆា ឬច្នៃធ្វើជានំចៀននោះទេ គឺសុទ្ធតែមានឱជារសឆ្ងាញ់ពិសា និងមានអត្ថប្រយោជន៍ចំពោះសុខភាពអ្នកទទួលទានថែមទៀតផង ខណៈដែលដំណាំប្រភេទនេះក៏ត្រូវបានគេយកទៅប្រើប្រាស់ជាឱសថផងដែរ។ ជាមួយនឹងអត្ថប្រយោជន៍យ៉ាងច្រើនដូចបានរៀបរាប់ទាំងនេះ គូឆាយ បានក្លាយជាដំណាំ ឬជាបន្លែដែលមានតម្រូវការទីផ្សារទូលាយ និងមានតម្លៃល្អមិនពិបាកលក់នោះទេ។
អ្នកស្រី ស្មាន ឌីម ជាកសិករដាំគូឆាយម្នាក់រស់នៅភូមិគោកស្រុក ស្រុកប្រាសាទបាគង ខេត្តសៀមរាប បានប្រាប់ឱ្យដឹងថា៖ មុខរបរដាំដំណាំគូឆាយនេះត្រូវបានអ្នកស្រីធ្វើជាយូរមកហើយ ខណៈដែលការទទួលបានចំណូលពីទិន្នផលក៏មានភាពសមរម្យអាចជួយទំនុកបម្រុងជីវភាពគ្រួសារបានយ៉ាងល្អ។
អ្នកស្រីបានបន្តថា ៖
“ដំណាំគូឆាយនេះ មិនពិបាកដាំ ឬពិបាកថែទាំនោះទេ សំខាន់គឺការថ្នាល់ ឬធ្វើរានសម្រាប់ដាំឱ្យបានល្អ និងមានរបៀបត្រឹមត្រូវតាមបច្ចេកទេស ហើយវាអាចដុះ និងប្រមូលផលបានច្រើនខែណាស់ ចំណែកឯទីផ្សារលក់ក៏មិនជាបញ្ហាច្រើនដែរ ព្រោះមានឈ្មួញមកទទួលទិញដល់ផ្ទះតែម្ដង ដោយឱ្យតម្លៃថ្លៃគួរសម។”
អ្នកស្រី ស្មាន ឌីម បានបញ្ជាក់ឱ្យដឹងថា ដំណាំគូឆាយដែលមានទីផ្សារទូលំទូលាយមួយនេះគឺអាចលក់បានក្នុងតម្លៃថ្លៃបំផុតនៅពេលបុណ្យចូលឆ្នាំ ដោយសារជារដូវអាកាសធាតុក្ដៅ គេដាំមិនសូវបានផលច្រើននោះទេ ហើយថ្លៃបំផុត ១គីឡូក្រាមថ្លៃ ៧០០០រៀល ខណៈដែលបច្ចុប្បន្នអាចលក់ត្រឹម ៤០០០រៀល ហើយនៅខែត្រជាក់ គូឆាយក៏នៅតែមានទីផ្សារគ្រាន់តែតម្លៃអាចធ្លាក់ចុះ ថោកបំផុតត្រឹម២០០០រៀលក្នុងមួយគីឡូក្រាម។
បច្ចុប្បន្ន អ្នកស្រី ស្មាន ឌីម មានរងដាំ ឬរានដីសម្រាប់គូឆាយសរុបទាំងអស់ចំនួន ៥រាន និងកំពុងធ្វើថែម១ទៀត ដែលរាននីមួយៗមានទំហំ ទទឹង ១.២ម៉ែត្រ និងប្រវែង ១៥ម៉ែត្រ ដោយក្នុងមួយថ្ងៃ គាត់អាចកាត់បានប្រមាណ ២០គីឡូក្រាមលក់ឱ្យទៅម៉ូយជាអ្នកលក់នំគូឆាយ និងលតឆា ហើយម៉ូយប្រចាំដែលរង់ចាំទទួលទិញ គឺគ្រួសារលតឆា នៅខេត្តសៀមរាបផ្ទាល់តែម្ដង។
អ្នកស្រីបានប្រាប់ឱ្យដឹងថា បន្ទាប់ពីកាត់បានម្ដងហើយ គេត្រូវចាំប្រមាណ ៤០-៥០ថ្ងៃទើបអាចកាត់បានម្ដងទៀត ហើយការប្រមូលផលនេះនឹងធ្វើជាបន្តបន្ទាប់ដរាបណាដើមគូឆាយនៅលូតលាស់ ខណៈរានគូឆាយអាចទ្រទ្រង់បានរយៈពេលប្រមាណ ៣ឆ្នាំទើបខូច។ យ៉ាងណាក៏ដោយ បើទោះបីជារានដាំគូឆាយបាក់ក៏ដោយ ប្រសិនបើកូនគូឆាយនៅតែដុះល្អ គេក៏នៅតែអាចដូរដី និងបន្តការដាក់ដាំបានជាធម្មតា។
ពាក់ព័ន្ធនឹងការដាំដុះវិញ ត្រូវបានកសិកររូបនេះរៀបរាប់ឱ្យដឹងថា ការដាំហាក់មិនមានផលលំបាកនោះទេ ដោយក្រោយពីបានធ្វើជារង ឬធ្វើជារានដាក់ដីរួចហើយដាំ គេត្រូវយកគុម្ពគូឆាយមកដាំ ដោយដាំបំបែកជាគុម្ពតូចៗល្មម ហើយអាចដាំបាន ៥ជួរក្នុងមួយរាន។ បន្ទាប់ពីដាំបាន ២០ថ្ងៃទើបគេអាចដាក់ជីលាមកគោ ហើយត្រូវការស្រោចទឹកឱ្យជោគនៅពេលព្រឹក។ សម្រាប់ការថែទាំ គេគ្រាន់តែស្រោចទឹកឱ្យបានគ្រប់គ្រាន់ ដាក់ជីលាមកគោ ជីអ៊ុយរេ និងឧស្សាហ៍សម្អាតស្មៅទើបកូនគូឆាយដុះលូតលាស់បានល្អ។
អ្នកស្រីបន្តថា ក្រៅពីដាំលើរាន គេក៏អាចដាំលើដីផ្ទាល់បានដែរ ប៉ុន្តែវាអាចមានស្មៅច្រើន និងបញ្ហាទឹកដក់ ដូច្នេះទើបជាកសិករនិយមដាំនៅលើរានដែលងាយស្រួលថែទាំជាង។ ចំណែកអ្វីដែលគេត្រូវយកចិត្តទុកដាក់ក្នុងការដាំគូឆាយគឺការសម្អាតស្មៅ និងប្រើប្រាស់ថ្នាំសម្លាប់សត្វល្អិតម្ដងម្កាលនៅពេលណាដែលគូឆាយមានបញ្ហា។ ដោយឡែកការប្រមូលផល ភាគច្រើនគេកាត់ពេលព្រឹក ទើបមានពេលរើសឱ្យឈ្មួញទាន់ លុះពេលគេកាត់ហើយ គេត្រូវរើសវាឲ្យស្អាត ទើបថ្លឹងលក់។
ជាមួយនឹងការរៀបរាប់ខាងលើនេះ អ្នកស្រី ស្មាន ឌីម ក៏បានរំលឹកឱ្យដឹងដែរថា អ្នកស្រីបានដាំដំណាំគូឆាយប្រមាណ ១០ឆ្នាំមកហើយ ដោយដំបូងឡើយអ្នកស្រីបានយកពូជពីបងប្អូនមកដាំ ហើយក្រោយមកក៏បានកកើត និងទុកពូជដាំជាបន្តបន្ទាប់រហូតមកដល់ពេលបច្ចុប្បន្ន។ សម្រាប់ទុនដំបូង គេត្រូវចំណាយទៅលើការទិញសម្ភារធ្វើរាន ដោយក្នុង ១រានអាចចំណាយអស់ជិត ៤០ម៉ឺនរៀល ហើយក្រៅពីនេះត្រូវចំណាយទៅលើថ្លៃជីសម្រាប់ជំរុញការលូតលាស់។ គួរបញ្ជាក់ដែរថា គូឆាយ ជាបន្លែផ្ទុកដោយវីតាមីន និងសារធាតុរ៉ែមួយចំនួន ដូចជា វីតាមីន B C ជាតិដែក កាល់ស្យូម និងសារធាតុបេតាខេរ៉ូទីន។ ក្រៅពីនេះ គូឆាយ ក៏ផ្ដល់សារៈប្រយោជន៍ចំពោះសុខភាពអ្នកទទួលទានផងដែរ ដូចជា ជួយសម្រួលដល់ប្រព័ន្ធរំលាយអាហារ ជួយឱ្យការបន្ទោរបង់បានស្រួល កាត់បន្ថយបញ្ហាប្រឈមទល់លាមក កម្ចាស់ធាតុពុលចេញពីរាង្គកាយ ធ្វើឱ្យស្បែកស្អាត និងអាចបញ្ជៀសបញ្ហាប្រឈមនឹងជំងឺមហារីកពោះវៀនធំផងដែរ៕
Account
Security
Favourite Content