សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការចិញ្ចឹមសត្វ គឺត្រូវការចំណីជាចាំបាច់ដើម្បីបំប៉ន ប៉ុន្តែបើពឹងផ្អែកតែលើចំណីដូចជាស្មៅដែលដុះតាមធម្មជាតិទាំស្រុង គឺគេមិនអាចផ្គត់ផ្គង់បានគ្រប់គ្រាន់នោះទេ ពោលគឺតម្រូវឱ្យអ្នកចិញ្ចឹមស្វែងរកចំណីបន្ថែម។ ក្នុងនោះ ស្មៅដំរី ជាប្រភេទដំណាំចំណីសត្វមួយដែលមានផ្ទុកសារធាតុចិញ្ចឹមខ្ពស់ ងាយស្រួលក្នុងការដាំដុះបានគ្រប់រដូវកាល ហើយថែមទាំងអាចជួយបំប៉នសុខភាពសត្វចិញ្ចឹមបានយ៉ាងល្អទៀតផង។
ស្មៅដំរី (Elephant Grass) ជាប្រភេទដំណាំចំណីសត្វ មានប្រភពមកពីប្រទេសអាហ្រ្វិក និងជាស្មៅមានដើមខ្ពស់ សម្បូរប្រូតេអ៊ីនពី ១៥-១៦ភាគរយ អាស៊ូត ១.៦-២.២ភាគរយ សារធាតុស្ងួតដែលអាចរលាយបាន ៥០-៦៥ភាគរយ (ស្មៅស្ងួត)។ ស្មៅប្រភេទនេះផ្ដល់ទិន្នផលជាមធ្យមនៅរដូវវស្សាពី ២៥-៣០ តោន (ស្មៅស្រស់) និងរដូវប្រាំងពី ៧-១០តោន (ដាំដុះលើផ្ទៃដី ទំហំ១ហិកតា) ហើយគុណភាព និងទិន្នផលស្មៅអាចប្រែប្រួលទៅតាមទីតាំងភូមិសាស្ត្រ ដី ជីវជាតិរបស់ដី និងអាយុរបស់ស្មៅ។
ចំពោះបច្ចេកទេសដាំស្មៅដំរី គេត្រូវជ្រើសរើសដីមិនលិចទឹក ឬមិនជាំទឹកពេក ហើយត្រូវរៀបចំដីឱ្យបានស្អាតល្អ ដោយភ្ជួរដីឱ្យបានជ្រៅ ២-៣ដង មុនដាំ ១៤ថ្ងៃ។ បន្ទាប់មករាស់បំបែកដីឱ្យបានម៉ត់ល្អ សម្អាតស្មៅចង្រៃ និងផ្ទៃដីធ្វើឱ្យបានរាបស្មើ (ងាយដាំដុះ បំប៉ន ស្រោចទឹក) រួចឆូតរងជាជួរជម្រៅ ២-៣សង់ទីម៉ែត្រ ចន្លោះរង ០.៤ម៉ែត្រ ដាក់ជីទ្រាប់បាទ អាចប្រើជីលាមកគោ ឬជីកំប៉ុស្តិ៍។
ពពួកស្មៅនេះ ងាយស្រួលដាំណាស់ ដែលគេអាចដាំដោយកាត់ដើម ឬបំបែកកូន។ ដោយឡែក សម្រាប់ការដាំដោយសាបគ្រាប់ គឺអាចធ្វើឡើងក្រោយពីព្យួរដីរួចរាល់ ដោយយកគ្រាប់ទៅត្រាំទឹកឱ្យរីកល្អ រួចរោយគ្រាប់ពូជក្នុងចង្អូរដែលឆូតរួច (ដោយដៃ ឬកំប៉ុង លុបដី ម៉ត់ពីលើបង្ហាប់ថ្មមៗ)។ ក្រោយពេលព្រោះបាន ២-៣ថ្ងៃ បើមានភ្លៀងធ្លាក់គឺដុះលូតល្អ ប៉ុន្តែបើក្រោយពេលព្រោះបានពី ៧-១០ថ្ងៃ គ្មានភ្លៀងទេ គេត្រូវស្រោចទឹកឱ្យបានសើមដី។
ចំណែកការដាំដោយបំបែកកូនវិញ ដើម្បីសន្សំកម្លាំងពលកម្មក្នុងការថែទាំស្មៅ គេមានវិធីសាស្ត្រមួយទៀត គឺសាបពូជស្មៅនៅលើថ្នាលតូចមួយ(ដូចសំណាប)។ នៅពេលដែលកូនស្មៅធំល្មម (អាយុប្រហែល ២០-២៤ថ្ងៃ) ទើបចាប់ផ្ដើមបំបែកយកទៅដាំ ។ ការដាំស្មៅចំណីសត្វដោយការបណ្តុះ និងបំបែកកូននេះគឺមានការលូតលាស់លឿន ងាយស្រួលកំចាត់ស្មៅចង្រៃ មិនពិបាករៀបចំដីឱ្យបានល្អនោះទេ និងចំណេញពេលវេលា។
ពាក់ព័ន្ធនឹងការថែទាំ គេត្រូវតាមដានការលូតលាស់របស់ស្មៅ បោចស្មៅចង្រៃចេញ ជ្រួយដី ដាក់ជីបន្ថែម។ ក្រោយពេលព្រោះ ឬដាំបាន ២-៣ថ្ងៃមានភ្លៀងធ្លាក់ដំណាំដុះបានល្អ បើក្រោយពេលព្រោះ ឬដាំបាន ៧-១០ថ្ងៃ គ្មានភ្លៀងទេ គឺត្រូវស្រោចទឹកឱ្យបានសើមល្អ ហើយចុងក្រោយ អ្នកដាំត្រូវប្រមូលផលលើកទី ១ នៅពេលស្មៅមានអាយុពី ៥០-៦០ថ្ងៃ ឯរយៈពេលប្រមូលផលលើកទី ២នៅពេលស្មៅមានអាយុ ៣០-៣៥ថ្ងៃ ដោយកាត់យកដើមណាដែលមានកម្ពស់ពីដីប្រមាណ ៥-១០សង់ទីម៉ែត្រ។
គួរបញ្ជាក់ដែរថា គុណប្រយោជន៍នៃការដាំដំណាំចំណីសត្វមានច្រើន អាចជួយបង្កើនជីជាតិដីតាមរយៈប្រភេទដំណាំចំណីសត្វ និងជីលាមកសត្វកើនឡើង ការផ្ដល់ដល់សត្វនូវបរិមាណ និងគុណភាពចំណីតាមកម្រិតអាហារូបត្ថម្ភ អាចជួយគ្រប់គ្រងបរិស្ថានបានល្អប្រសើរ (ជាគម្របដី ការពារដីហូរច្រោះ បង្កើនជីវជាតិដី និងបំផ្លាញស្មៅចង្រៃ)។ ក្រៅពីនេះ អាចចំណេញពេលវេលា និងថវិកាដែលចំណាយក្នុងការស្វែងរក ឬទិញស្មៅសម្រាប់សត្វ ជាពិសេសអាចជួយឱ្យកសិករផ្លាស់ប្ដូរពីការចិញ្ចឹមសត្វបែបយថាផលមកជាការគ្រប់គ្រងបានតាមផែនការដែលបានគ្រោងទុក៕
Account
Security
Favourite Content