សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កោះកុង ៖ សហគមន៍អេកូទេសចរណ៍ជីផាត ជាសហគមន៍ចំណាស់មួយដែលត្រូវបានបង្កើតឡើងតាំងតែពីឆ្នាំ២០០៧ មានទីតាំងស្ថិតនៅក្នុងស្រុកថ្មបាំង ខេត្តកោះកុង ដែលជាទឹកដីសម្បូរទៅដោយព្រៃភ្នំយ៉ាងស្រស់បំព្រង។
ក្នុងកិច្ចដំណើរការចាប់ផ្ដើមបង្កើតជាសហគមន៍ទេសចរណ៍លើកដំបូង សហគមន៍នេះទទួលបានការកោតសរសើរច្រើនពីសំណាក់ភ្ញៀវបរទេសដែលនិយមទៅទស្សនាកម្សាន្តនៅទីនេះ។ ចំណែកឯភ្ញៀវក្នុងស្រុក គឺមានក្នុងចំនួនតិចតួចប៉ុណ្ណោះ។ យ៉ាងណាក៏ដោយ រហូតមកដល់ពេលបច្ចុប្បន្ននេះ កំណើនទេសចរក្នុងស្រុកដែលជាជនជាតិខ្មែរមានការកើនឡើងជាបន្តបន្ទាប់គួរឱ្យកត់សម្គាល់។ នេះបើតាមការឱ្យដឹងពីលោក អ៊ន សុវណ្ណ ដែលជាប្រធានសហគមន៍អេកូទេសចរណ៍ធម្មជាតិមួយនេះ។
លោក អ៊ន សុវណ្ណ បានឱ្យដឹងដែរថា ដោយសារតែកំណើនទេសចរមានការកើនឡើង លោកបានត្រៀមនូវកញ្ចប់សេវាកម្មជាច្រើនដើម្បីទទួលភ្ញៀវទាំងក្នុងស្រុក និងអន្តរជាតិ ដែលកញ្ចប់ទាំងនោះរួមមាន៖ សេវាកម្មផ្ទះស្នាក់របស់ប្រជាសហគមន៍ សេវាកម្មជួលកង់ជិះក្នុងសហគមន៍ សេវាកម្មជូនភ្ញៀវឡើងភ្នំ សេវាកម្មជិះទូកកាយ៉ាក និងសេវាកម្មជូនភ្ញៀវទៅទស្សនាតំបន់ប្រវត្តិសាស្ត្រផងដែរ។
លោក អ៊ន សុវណ្ណ បានបញ្ជាក់ថា ៖
«ជាទូទៅ តំបន់យើងពេញស្អាតនៅខែភ្លៀងនេះឯង ហើយភ្ញៀវក៏ចូលចិត្តមកលេងនៅខែនេះដែរ ម្យ៉ាងទៀតបងប្អូននៅក្នុងសហគមន៍យើងមួយចំនួន ក៏បានប្រមូលផលដំណាំមួយចំនួនផង។»
ជារៀងរាល់ឆ្នាំ ប្រជាសហគមន៍អេកូទេសចរណ៍ជីផាតតែងតែប្រមូលផលបាននូវដំណាំហូបផ្លែចម្រុះ ស្រស់ៗ ដែលវាក៏ជាមូលហេតុសំខាន់ក្នុងការទាក់ទាញភ្ញៀវទេសចរផងដែរ។ នេះបើតាមការបញ្ជាក់របស់លោក អ៊ន សុវណ្ណ។
ក្នុងនាមជាប្រធានសហគមន៍ទេសចរណ៍មួយរូប លោក អ៊ន សុវណ្ណ បានបន្តអំពាវនាវដល់ប្រជាពលរដ្ឋក្នុងស្រុកឱ្យចូលរួមគាំទ្រជីវភាពប្រជាសហគមន៍តាមរយៈការទៅទស្សនាតាមតំបន់សហគមន៍ទេសចរណ៍នានា៕
Account
Security
Favourite Content