សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Politico បានរាយការណ៍ថា រដ្ឋាភិបាលអាល្លឺម៉ង់បានយល់ព្រមដកគ្រឿងបន្លាស់របស់ក្រុមហ៊ុនចិន Huawei ចេញពីបណ្តាញ 5G របស់ខ្លួនក្រោមកិច្ចព្រមព្រៀងមួយ។
យោងតាមប្រភពដដែលបានឲ្យដឹងថា កិច្ចព្រមព្រៀងនេះមានបំណងរកដំណោះស្រាយទន់បំផុតដែលអាចធ្វើទៅបាន និងជាការបញ្ជាក់ដល់ប្រតិបត្តិករបណ្តាញ និងទីក្រុងប៉េកាំង ប៉ុន្តែវាអាចគ្រាន់តែជាការផ្គាប់ចិត្តប្រទេសសមាជិកសហភាពអឺរ៉ុប និងសម្ព័ន្ធមិត្តរបស់អាល្លឺម៉ង់ ដែលកំពុងរង់ចាំទីក្រុងប៊ែរឡាំងចាត់វិធានការលើសុវត្ថិភាព 5G អស់រយៈពេលជាច្រើនឆ្នាំ។ នៅក្រោមកិច្ចព្រមព្រៀងនេះ នឹងត្រូវហាមឃាត់នូវការប្រើប្រាស់គ្រឿងបន្លាស់ 5G ដែលផលិតដោយក្រុមហ៊ុន Huawei ពីហេដ្ឋារចនាសម្ព័ន្ធបណ្តាញស្នូលដ៏រសើបរបស់អាល្លឺម៉ង់មុនចុងឆ្នាំ២០២៦ ខណៈដែលការរំពឹងទុកគឺអាចធ្វើឡើងនៅចុងឆ្នាំ២០២៥ខាងមុខនេះ។ លើសពីនេះ គ្រឿងបន្លាស់របស់ Huawei នឹងត្រូវដកចេញពីបណ្តាញវិទ្យុ (RAN) ក៏ដូចជាបង្គោលអង់តែននានានៅមុនចុងឆ្នាំ២០២៩ ។ នេះគឺជាលទ្ធផលជាទីគាប់ចិត្តសម្រាប់ប្រតិបត្តិករអាល្លឺម៉ង់ ដែលស្ថិតក្នុងដំណើរការនាបច្ចុប្បន្ន ចៀសវាងការចំណាយបន្ថែមទៀត។
រដ្ឋមន្ត្រីឌីជីថលអាល្លឺម៉ង់ លោក Volker Wissing បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលយកចិត្តទុកដាក់លើបញ្ហាសុវត្ថិភាពជាខ្លាំង ខណៈដែលកំពុងតាមដានស្ថានភាពពិតនៃសេដ្ឋកិច្ច។ រដ្ឋាភិបាលអាល្លឺម៉ង់កំពុងផ្តល់ឱ្យប្រតិបត្តិករនូវពេលវេលាគ្រប់គ្រាន់ដើម្បីធានាឱ្យមានការផ្លាស់ប្តូរដោយរលូន ជាមួយនឹងកាលបរិច្ឆេទផ្លាស់ប្តូរដែលបានព្រមព្រៀង។
អ្នកជំនាញផ្នែកសន្តិសុខមានភាពភ័យខ្លាចអស់រយៈពេលជាច្រើនឆ្នាំ ដែលបច្ចេកវិទ្យាពីអ្នកលក់ Huawei និងគូប្រជែងរបស់គេ ZTE អាចត្រូវបានប្រើប្រាស់ដោយប្រទេសចិនសម្រាប់ចារកម្ម ឬអាចបំផ្លាញហេដ្ឋារចនាសម្ព័ន្ធឌីជីថលរបស់ប្រទេសអាល្លឺម៉ង់ក្នុងករណីមានជម្លោះ។ យ៉ាងណាមិញ ចិនបានច្រានចោលការចោទប្រកាន់ទាំងនោះ ខណៈដែលមានការបញ្ចុះបញ្ចូលឲ្យរដ្ឋាភិបាលអាល្លឺម៉ង់កុំកាត់ផ្តាច់ក្រុមហ៊ុន Huawei ចៀសវាងធ្វើឲ្យបញ្ហានេះក្លាយជារឿងនយោបាយដ៏រសើបរវាងទីក្រុងប៊ែរឡាំង និងទីក្រុងប៉េកាំង។
កាលពីឆ្នាំមុន គណៈកម្មការអឺរ៉ុបបានព្រមានថា រដ្ឋាភិបាលនៃប្រទេសជាសមាជិកមានភាពយឺតយ៉ាវក្នុងការអនុវត្តការហាមឃាត់លើក្រុមហ៊ុន Huawei និង ZTE ដែលបង្កហានិភ័យខ្ពស់ជាងអ្នកផ្គត់ផ្គង់ 5G ផ្សេងទៀតសម្រាប់ផ្នែកសំខាន់ៗ និងរសើបនៃបណ្តាញទូរគមនាគមន៍។ មិនត្រឹមតែប៉ុណ្ណោះ ការបោះជំហានឥតឈប់ឈររបស់ក្រុមហ៊ុន Huawei នៅក្នុងទ្វីបអឺរ៉ុប គឺជាចំណុចរសើបមួយរវវាងសហភាពអឺរ៉ុប និងសម្ព័ន្ធមិត្តរបស់សហរដ្ឋអាមេរិក។ យ៉ាងណាមិញ ប្លុកនេះកំពុងរកដំណោះស្រាយកាត់បន្ថយហានិភ័យដល់វិស័យសំខាន់ៗ និងខ្សែសង្វាក់ផ្គត់ផ្គង់ដែលពឹងផ្អែកខ្លាំងលើចិន។
កាលពីឆ្នាំ២០២០ ចក្រភពអង់គ្លេសបានសម្រេចដកចេញឧបករណ៍របស់ Huawei ទាំងស្រុងពីបណ្តាញ 5G របស់ខ្លួនមុនចុងឆ្នាំ២០២៧ ខណៈដែលប្រទេសផ្សេងទៀតក៏បានហាមឃាត់ឧបករណ៍ទាំងស្រុងផងដែររួមមានស៊ុយអែត ដាណឺម៉ាក អេស្តូនី ឡាតវី និងលីទុយអានី។ យ៉ាងណាមិញ ប្រទេសជាច្រើនផ្សេងទៀតនៅអឺរ៉ុប រួមមាន អេស្ប៉ាញ ព័រទុយហ្គាល់ ហូឡង់ អូទ្រីស ស្វីស និងហ្វាំងឡង់ បានជ្រើសរើសមិនអនុវត្តការហាមឃាត់ស្រដៀងគ្នានេះ ហើយនៅតែពឹងផ្អែកយ៉ាងខ្លាំងលើគ្រឿងបន្លាស់ Huawei នៅក្នុងបណ្តាញទូគមនាគមន៍របស់ពួកគេ។
គួរឲ្យបញ្ជាក់ដែរថា ប្រតិបត្តិករអាល្លឺម៉ង់បានពឹងផ្អែកយ៉ាងខ្លាំងលើក្រុមហ៊ុន Huawei ដើម្បីដាក់ចេញនូវបណ្តាញ 4G និង 5G សម្រាប់ហេដ្ឋារចនាសម្ព័ន្ធទូរគមនាគមន៍របស់ខ្លួន។ ការសិក្សាក្នុងឆ្នាំ២០២២ ដោយក្រុមហ៊ុនប្រឹក្សា Strand Consult បានប៉ាន់ប្រមាណថា គ្រឿងបន្លាស់ ឬ ធាតុផ្សំរបស់ចិនមានចំណែក ៥៩ ភាគរយក្នុងការដំឡើង 5G របស់អាល្លឺម៉ង់។ ទោះជាយ៉ាងណាក្តី លោកស្រី Nancy Faeser រដ្ឋមន្ត្រីមហាផ្ទៃអាល្លឺម៉ង់ បានផ្តល់សញ្ញាថា ទីក្រុងប៊ែកឡាំង បានត្រៀមខ្លួនជាស្រេចក្នុងការកាត់ផ្តាច់ក្រុមហ៊ុន Huawei បន្ទាប់ពីមានបញ្ហាជាច្រើនជុំវិញការមិនចុះសម្រុងផ្ទៃក្នុង សម្ពាធពីប្រតិបត្តិករ និងការភ័យខ្លាចនៃការសងសឹករបស់ចិនមកលើឧស្សាហកម្មរថយន្តរបស់ខ្លួន៕
Account
Security
Favourite Content