សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សម្លៀកបំពាក់ដែលកំពុងចរាចរណ៍ក្នុងទីផ្សារក្នុងស្រុកនាពេលបច្ចុប្បន្នមានច្រើនប្រភេទ ច្រើនយីហោណាស់ ដែលខ្លះជាផលិតផលនាំចូលពីប្រទេសជិតខាង ឯខ្លះទៀតជាផលិតផលដែលផលិតឡើងនៅក្នុងស្រុក។ នៅក្នុងចំណោមម៉ាកសម្លៀកបំពាក់ទាំងនោះ មានយីហោក្នុងស្រុកមួយបានបង្កើតឡើង និងផ្គត់ផ្គង់សម្លៀកបំពាក់ដែលបង្កើតឡើងដោយកូនខ្មែរ និងមានគោលដៅចង់ឱ្យបរទេសបានស្គាល់ពីសម្លៀកបំពាក់ខ្មែរ។
សំណាងហ្វេស្សិនប្រេន (Samnang Fashion Brand) ជាយីហោក្រុមហ៊ុនផលិតសម្លៀកបំពាក់ក្នុងស្រុកមួយដែលកំពុងច្នៃម៉ូដ និងផលិតសម្លៀកបំពាក់នារីដើម្បីផ្គត់ផ្គង់តម្រូវការក្នុងស្រុក និងជាផ្នែកមួយលើកស្ទួយសេដ្ឋកិច្ចជាតិតាមរយៈការបង្កើតការងារឱ្យក្រុមអ្នកផលិតផងដែរ។
អ្នកស្រី ខុន សំណាង ជាស្ថាបនិករបស់សំណាងហ្វេស្សិនប្រេន បានមានប្រសាសន៍ថា៖
“យើងបង្កើតប្រេននេះឡើងគឺចង់ឱ្យប្រជាជនទូទាំងពិភពលោកបានស្គាល់ផលិតផលសម្លៀកបំពាក់ដែលផលិតនៅកម្ពុជា ជាពិសេសចង់ឱ្យប្រជាជនកម្ពុជាផ្ទាល់ ចូលរួមគាំទ្រផលិតផលក្នុងស្រុកកាន់តែច្រើនថែមទៀត។”
អ្នកស្រីបន្តថា ៖
“សម្រាប់ក្រុមហ៊ុនយើងបានផ្ដល់ឱកាសការងារដល់កម្មករ និងកម្មការនីប្រមាណ ៣០នាក់ ថែមទាំងផ្ដល់នូវការបណ្ដុះបណ្ដាលជំនាញទាំងក្នុងក្រុម និងវគ្គបណ្ដុះបណ្ដាលពីអ្នកជំនាញផ្សេងៗ ដើម្បីឱ្យពួកគាត់បានដុះខាត់សមត្ថភាព ទេពកោសល្យឱ្យកាន់តែពូកែបន្ថែមទៀត។ ចំពោះសម្លៀកបំពាក់នារី ដែលជាផលិតផលរបស់ក្រុមហ៊ុនខាងលើនេះផលិតឡើងសម្រាប់អតិថិជនចាប់ពី ១៨ឆ្នាំឡើងទៅ ពិសេសម្រាប់បងប្អូននារីដែលចូលចិត្តសម្លៀកបំពាក់សាមញ្ញៗ មិនសាំញ៉ាំច្រើន ថ្នេរស្អាត ងាយស្រួលបត់បែន ពិសេសអាចស្លៀកបានយូរលើសពី ៨ម៉ោងដោយមិនមានភាពស្អុះស្អាប់អ្វីនោះឡើយ។”
ចំណែកតម្លៃវិញ សម្លៀកបំពាក់របស់សំណាងហ្វេស្សិនប្រេនមានតម្លៃចាប់ពី ៧-៣០ដុល្លារអាស្រ័យទៅតាមម៉ូដ ហើយក្រុមហ៊ុននេះមានផ្គត់ផ្គង់បោះដុំតាមរយៈដៃគូអាជីវកម្មប្រមាណជិត១០០នាក់ ទាំងនៅរាជធានីភ្នំពេញ និងតាមបណ្ដាខេត្តធំៗដូចជា សៀមរាប ព្រះសីហនុ កំពង់ចាម និងបាត់ដំបងជាដើម។
គួរបញ្ជាក់ដែរថា អាជីវកម្មនេះត្រូវបានបង្កើតឡើងនៅឆ្នាំ២០២០ ដោយក្រុមស្ថាបនិកមួយក្រុមធ្វើការរួមគ្នាក្រោមការផ្ដួចផ្ដើមរបស់អ្នកស្រី ខុន សំណាង ដែលគាត់ធ្លាប់លក់សម្លៀកបំពាក់ក្បាលគីប ហើយក៏បានវិវត្តខ្លួនមកបង្កើតប្រេនក្នុងស្រុកដូចបច្ចុប្បន្ន។ ទន្ទឹមគ្នានេះដែរ អ្នកស្រី ខុន សំណាង ក៏បានរៀបរាប់ពីផលលំបាកដែរថា សម្រាប់ការបង្កើតប្រេនខ្លួនឯងនេះគឺមិនងាយស្រួលនោះទេ ជាពិសេសផលិតក្នុងស្រុកដែលបងប្អូនយើងភាគច្រើនពុំទាន់ទុកចិត្ត និងមានការប្រៀបធៀបតម្លៃក៏ដូចជាគុណភាពជាមួយនឹងផលិតផលនាំចូលផងដែរ។ តទៅថ្ងៃអនាគត អ្នកស្រី និងក្រុមការងារក៏មានចក្ខុវិស័យចង់ឱ្យសំណាងហ្វេស្សិនប្រេន ក្លាយជាក្រុមហ៊ុនមួយដែលអាចផ្គត់ផ្គង់សម្លៀកបំពាក់ក្នុងស្រុកទៅកាន់ទីផ្សារកាន់តែធំ ផ្ដល់ការងារដល់ប្រជាជនកាន់តែច្រើន និងឈានដល់ការលក់ហ្វ្រេនឆាយថែមទៀតផង៕
Account
Security
Favourite Content