សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខណៈស្ថានភាពសង្គ្រាមរុស្ស៊ី-អ៊ុយក្រែន និងស្ថានភាពសេដ្ឋកិច្ចពិភពលោកមានភាពមិនច្បាស់លាស់ ស្របពេលថ្លៃប្រេងឆៅពិភពលោកត្រូវបានព្យាករថានឹងកើនឡើងជាបន្តបន្ទាប់ ខណៈដែលអតិផរណានៅកម្ពុជាក្នុងឆមាសទី២ ឆ្នាំ២០២៣ ត្រូវបានព្យាករថាមានកម្រិតជាមធ្យមប្រមាណ ២,៧% (១,២% នៅឆមាសទី១) ហើយអតិផរណាសម្រាប់ឆ្នាំ២០២៣ អាចមានកម្រិតជាមធ្យមប្រមាណ ២%។ នេះបើយោងតាមរបាយការណ៍បូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា
របាយការណ៍បានឱ្យដឹងថា អតិផរណាបន្តនិន្នាការថយចុះនៅឆមាសទី១ នេះ ជាចម្បងបណ្តាលមកពីការថយថ្លៃប្រេង និងការថយល្បឿននៃការឡើងថ្លៃម្ហូបអាហារ ស្របពេលដែលអតិផរណាស្នូលមានកម្រិតទាប។ អតិផរណារួមជាមធ្យមមានកម្រិត ១,២% ទាបជាងឆមាសទី២ ឆ្នាំ២០២២ (៤,១%) និងឆមាសទី ១ ឆ្នាំ២០២២ (៦,៦%)។
ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបានថយចុះ ៦,៣% នៅឆមាសនេះ (៣,៨% នៅឆមាសទី២ ឆ្នាំ២០២២ និង១៨,៤% នៅឆមាសទី១ ឆ្នាំ២០២២) ស្របតាមនិន្នាការថមថយនៃថ្លៃប្រេងឆៅពិភពលោក។ កំណើនថ្លៃក្រុមម្ហូបអាហារបានបន្តថយល្បឿនមក ២,៦% (៤,៣% នៅឆមាសទី២ ឆ្នាំ២០២២ និង ៥,៦% នៅឆមាសទី១ ឆ្នាំ២០២២) ដែលជាចម្បងបណ្តាលមកពីភាពប្រសើរឡើងនៃខ្សែច្រវាក់ផ្គត់ផ្គង់សកល ដែលនាំឱ្យមានការថមថយថ្លៃដើមផលិត ដូចជាជីកសិកម្ម ថ្នាំសម្លាប់សត្វល្អិតនិងស្មៅ និងប្រេងឥន្ធនៈ។
របាយការណ៍បានឱ្យដឹងទៀតថា អតិផរណានៅឆមាសទី២ អាចប្រឈមនឹងភាពមិនច្បាស់លាស់ ដោយសារស្ថានភាពសង្គ្រាមរុស្ស៊ី-អ៊ុយក្រែន និងស្ថានភាពសេដ្ឋកិច្ចពិភពលោក។ អតិផរណាក្នុងឆមាសទី២ ឆ្នាំ២០២៣ ត្រូវបានព្យាករថាមានកម្រិតជាមធ្យមប្រមាណ ២,៧% (១,២% នៅឆមាសទី១) ហើយអតិផរណាសម្រាប់ឆ្នាំ២០២៣ អាចមានកម្រិតជាមធ្យម ប្រមាណ ២%។
ការព្យាករនេះត្រូវបានធ្វើឡើងក្រោមការសន្មតដូចខាងក្រោម៖
១-ការថយថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈ ០,៣%“(៦,៣% នៅឆមាសទី១) ដោយសារការរំពឹងពីការថមថយកំណើនសេដ្ឋកិច្ចពិភពលោក ដែលធ្វើឱ្យតម្រូវការប្រេងថយចុះ បើទោះជាថ្លៃប្រេងឆៅពិភពលោកត្រូវបានព្យាករថានឹងកើនឡើងជាបន្តបន្ទាប់ចាប់ពីខែកក្កដា ដល់ខែកញ្ញា មុននឹងថមថយមកវិញចាប់ពីខែតុលា ក្នុងបរិការណ៍ដែល OPEC និងបណ្តាប្រទេសដៃគូ (OPEC+) បានប្រកាសកាត់បន្ថយការផលិតប្រេងឆៅចំនួន ១,២ លានបារ៉ែលក្នុងមួយថ្ងៃ នៅដើម ខែមេសា រហូតដល់ចុងឆ្នាំ២០២៣។
២-កំណើនថ្លៃម្ហូបអាហារបន្តមានកម្រិតទាប ប៉ុន្តែកើនមកវិញបន្តិច ៣,២% (២,៦% នៅឆមាសទី១) ដោយសារភាពប្រសើរឡើងនៃវិស័យកសិកម្ម គួបផ្សំនឹងមូលដ្ឋានខ្ពស់ស្រាប់កាលពីគ្រាដូចគ្នាឆ្នាំមុន និង ៣-អតិផរណាស្នូលអាចនឹងកើនឡើងមកវិញបន្តិចផងដែរ ប៉ុន្តែបន្តមានកម្រិតទាប ២,៧% (១,៥% នៅឆមាសទី១) ដោយសារកំណើនតម្រូវការ គួបផ្សំនឹងឥទ្ធិពលនៃការកើនឡើងថ្លៃម្ហូបអាហារ។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា មានប្រសាសន៍ថា ដោយសារបញ្ហាដុល្លារូបនីយកម្ម ការប្រែប្រួលអត្រាប្តូរប្រាក់មានឥទ្ធិពលដោយផ្ទាល់និងឆាប់រហ័សមកលើអត្រាអតិផរណានៅកម្ពុជា ពីព្រោះកាលណាតម្លៃប្រាក់រៀលធ្លាក់ចុះ ថ្លៃទំនិញនិងសេវានានានឹងអាចកើនឡើងភ្លាម។ ដូចនេះ ក្រៅពីការធ្លាក់ថ្លៃប្រេងឥន្ធនៈនិងការថមថយកំណើនថ្លៃក្រុមម្ហូបអាហារ ការរក្សាបានស្ថិរភាពអត្រាប្តូរប្រាក់រៀល បានរួមចំណែកយ៉ាងសំខាន់ក្នុងការបន្ថយអត្រាអតិផរណាផងដែរ។ ឯកឧត្តម ជា ចាន់តូ បានថ្លែងបន្តថា ជាមួយគ្នានេះ ការពង្រឹងការប្រើប្រាស់ប្រាក់រៀលឱ្យកាន់តែទូលំទូលាយនៅតែជាការងារចាំបាច់ ដើម្បីកាត់បន្ថយឥទ្ធិពលពីកត្តាខាងក្រៅមកលើកម្រិតថ្លៃនៅកម្ពុជា និងពង្រឹងប្រសិទ្ធភាពនយោបាយរូបិយវត្ថុក្នុងការគ្រប់គ្រងស្ថិរភាពថ្លៃនិងជំរុញកំណើនសេដ្ឋកិច្ចឱ្យកាន់តែមានប្រសិទ្ធភាព។ ការប្រើប្រាស់ប្រាក់រៀលក្នុងសេដ្ឋកិច្ចច្រើន ក៏អាចជួយគរពូនទុនបម្រុងអន្តរជាតិឱ្យកាន់តែខ្ពស់ជាងកម្រិតបច្ចុប្បន្នថែមទៀត ដែលនឹងពង្រឹងជំនឿទុកចិត្តរបស់វិនិយោគិននិងសាធារណជនមកលើស្ថិរភាពសេដ្ឋកិច្ចនិងហិរញ្ញវត្ថុកម្ពុជាឱ្យកាន់តែរឹងមាំ៕
Account
Security
Favourite Content