សៀមរាប ៖ នៅពេលដែលទេសចរទៅលេងកម្សាន្តនៅតំបន់ទេសចរណ៍នៃខេត្តសៀមរាប ភាគច្រើនគេកម្រនឹងរំលងតំបន់ដែលមានប្រជាប្រិយភាព និងល្បីឈ្មោះជាភូមិគំរូប្រចាំស្រុកបន្ទាយស្រីនៃភូមិព្រះដាក់ណាស់ ត្បិតនៅទីនេះក្រៅពីមានការរៀបចំភូមិស្ថានយ៉ាងស្អាត មានរបៀប និងសណ្តាប់ធ្នាប់ល្អនោះ នៅមានអាហារប្រចាំតំបន់ដ៏ឈ្ងុយឆ្ងាញ់ជាច្រើនមុខ ដូចជាមាន់អាំង នំបញ្ចុក អន្សដូងអាំង ជាពិសេសនំអាកោរត្នោត ដែលត្រូវបានគេប្រសិទ្ធនាមថាជានំសម្គាល់ភូមិសាស្ត្រដ៏ល្បីឈ្មោះមួយនេះ ដែលអាចលក់បានរហូតដល់ប្រមាណ៥០០០នំក្នុងមួយថ្ងៃ។

អ្នកស្រី ថ្លុង ថាង ជាម្ចាស់យីហោកន្លែងលក់នំអាកោត្នោតដ៏ល្បីឈ្មោះប្រចាំភូមិព្រះដាក់ ស្ថិតនៅភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប បានមានប្រសាសន៍ឱ្យដឹងថា ៖

«យើងបង្កើតអាជីវកម្មនេះពីដំបូងឡើយមិនជាធំដុំប៉ុន្មានទេ តែមួយរយៈចុងក្រោយនេះកាន់តែមានភ្ញៀវ និងអតិថិជច្រើនឡើងៗ ជាពិសេសអ្នកដំណើរគាត់ឈប់ទិញច្រើន ហើយក៏មានគេទទួលទិញយកទៅលក់បន្តនៅតាមខេត្ត និងរាជធានីភ្នំពេញ ព្រោះគេស្គាល់ច្រើន»។

អ្នកស្រីបន្ថែមថា តាមរយៈអាជីវកម្មមួយនេះ ក្រៅពីអាចរកបានចំណូលសម្រាប់ដោះស្រាយជីវភាពគ្រួសារយ៉ាងប្រសើរ ថែមទាំងអាចផ្តល់នូវការងារដល់បងប្អូនក្នុងសហកមន៍ជិត៣០នាក់ផងដែរ ហើយអ្វីដែលកាន់តែពិសេសនោះ រាល់វត្ថុធាតុដើមសម្រាប់ធ្វើនំរហូតដល់ការវេចខ្ចប់គឺប្រើប្រាស់ផលិតផលក្នុងតំបន់ទាំងអស់ដូចជា ផ្លែត្នោតទុំ ដូងទុំ ដូងខ្ចី ស្ករត្នោត ស្លឹកចេក និងស្លឹកត្នោតសម្រាប់ធ្វើជាស្មុកជាដើម ហើយចំណូលដែលទទួលបានពីការលក់ជាប្រចាំថ្ងៃប្រមាណ ៣លានរៀលក្នុងមួយថ្ងៃ។

អ្នកស្រីបានបញ្ជាក់ថា ចំណុចពិសេសដែលអាចទាក់ទាញចិត្តអតិថិជន ក៏ដូចជាបណ្តាទេសចរនានាឱ្យមានទំនោរមកលើនំអាកោរត្នោតរបស់អ្នកស្រី គឺរសជាតិឆ្ងាញ់ ក្លិនឈ្ងុយល្អ សាច់នំទន់ផ្អែម ជាពិសេសគឺមានស្នូលដែលចម្រាញ់ពីខ្ទិះដូងសុទ្ធប្លែកខុសពីគេ។

គួរបញ្ជាក់ដែរថា អ្នកស្រីបានចាប់ផ្ដើមអាជីវកម្មលើកដំបូងត្រឹមដើមទុន ៣ម៉ឺនរៀលប៉ុណ្ណោះ ដោយសារតែមានវត្ថុធាតុដើមខ្លួនឯងស្រាប់ដូចជា ស្រូវ ត្នោត ស្ករ ពោលគឺចំណាយទុនតិច ដោយចាប់ផ្ដើមផលិតបន្តិចម្ដងៗរហូតដល់មានគេស្គាល់ច្រើន និងពង្រីកការលក់រហូតសព្វថ្ងៃ។ យ៉ាងណាមិញ អាជីវកម្មនេះក៏ជួបប្រទះនូវបញ្ហាមួយចំនួនផងដែរ ជាពិសេសក្នុងរដូវភ្លៀង ដែលធ្លាក់ចុះចំនួនទេសចរ ។  

ចុងក្រោយអ្នកស្រី ថ្លុង ថាង ក៏នៅតែមានចិត្តចង់ពង្រីកការលក់ និងបង្កើនកម្លាំងពលកម្មឱ្យកាន់តែច្រើនដើម្បីផលិតឱ្យទាន់តម្រូវការ និងលើកកម្ពស់ជីវកម្មបងប្អូននៅក្នុងសហកមន៍ឱ្យកាន់តែប្រសើរឡើងថែមទៀតតាមរយៈការផ្តល់ការងារក្នុងសង្វាក់ផលិតកម្មនៃនំអាកោរត្នោតប្រចាំតំបន់មួយនេះ៕