សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃចុងសប្ដាហ៍កន្លងទៅនេះ បានអញ្ជើញជាអធិបតីក្នុងពិធីប្រគល់ដើមមនចំនួន ១ ០០០ដើម របស់ក្រសួងកសិកម្ម រុក្ខាប្រមាញ់ និងនេសាទ ជូនដល់ក្រុមហ៊ុនសិប្បករអង្គរ នៅក្នុងភូមិសាស្ត្រ ស្រុកពួក ខេត្តសៀមរាប ក្នុងគោលបំណងជួយជំរុញការបើកដំណើរការឡើងវិញនូវរោងសិប្បកម្មតម្បាញ ក៏ដូចជាលើកកម្ពស់វិស័យសូត្រខ្មែរផងដែរ។
ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ក្រុមហ៊ុនសិប្បករអង្គរ នឹងបន្តអភិវឌ្ឍ ជំរុញដំណើរការផលិតសូត្រឱ្យកាន់តែប្រសើរឡើង ទាំងផ្នែកបច្ចេកទេស និងបរិក្ខារ ហើយក្រសួងនឹងបន្តគាំទ្រទៅតាមលទ្ធភាពលើផ្នែកដាំដុះ និងចិញ្ចឹមដង្កូវនាង ដែលស្ថិតក្រោមសមត្ថកិច្ច និងជំនាញរបស់ក្រសួង»។
នៅក្នុងពិធីប្រគល់ដើមមនប្រភេទថ្មី ដល់ក្រុមហ៊ុនអាទីសង់អង្គរ សម្រាប់ដាំដុះ រដ្ឋមន្រ្តីក្រសួងកសិកម្ម ក៏បានជំរុញឱ្យមានការដាំដើមមនឱ្យបានច្រើន ដើម្បីដំណើរការនៃច្រវាក់ផលិតកម្មសូត្រ ដែលមានគុណភាព និងតម្លៃខ្ពស់។ មិនតែប៉ុណ្ណោះការខិតខំប្រឹងប្រែងធ្វើឱ្យដំណើរការឡើងវិញ របស់ក្រុមហ៊ុនសិប្បករអង្គរ ក្នុងស្មារតីលើកកម្ពស់វិស័យសូត្រខ្មែរ និងផ្តល់ឱកាសការងារដល់សិប្បករខ្មែររាប់សិបនាក់។
សូមបញ្ជាក់ដែរថា ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានប្រគល់ដើមមនសរុប ១ ០០០ដើម និងពូជដង្កូវនាងមួយចំនួន ដែលជាពូជថ្មីនេះ អាចដុះលូតលាស់ជាស្លឹកមានគុណភាពល្អ មានប្រូតេអ៊ីនខ្ពស់សម្រាប់ចិញ្ចឹមដង្កូវនាង និងផលិតជាសូត្រមានគុណភាពល្អផងដែរ។
ឯកឧត្តមរដ្ឋមន្ដ្រី ក៏បានលើកឡើងដែរថា វិស័យតម្បាញសូត្ររបស់ក្រុមហ៊ុនសិប្បករអង្គរ នៅកម្ពុជា នឹងរីកចម្រើនថែមទៀតនាពេលអនាគត ហើយការរីកចម្រើននៃវិស័យតម្បាញសូត្រ អាចជួយផ្ដល់ការងារបន្ថែមដល់កសិករដាំដើមមនសម្រាប់ផ្គត់ផ្គង់ដល់ការចិញ្ចឹមដង្កូវនាង និងសិប្បករតម្បាញសូត្រ។ មិនត្រឹមតែប៉ុណ្ណោះ វានឹងរួមចំណែកដល់ការថែរក្សាសិប្បកម្មតម្បាញសូត្រ ដែលជាវប្បធម៌ដ៏ចំណាស់របស់ខ្មែរឱ្យបានស្ថិតស្ថេរគង់វង្ស។
លោក កាយ ឡូត អគ្គនាយកក្រុមហ៊ុនសិប្បករអង្គរ បានអរគុណដល់ក្រសួងកសិកម្ម ដែលជ្រោមជ្រែងក្នុងដំណើរការរោងសិប្បកម្មតម្បាញសូត្រខ្មែរឡើងវិញ និងបានប្រគល់ដើមមនថ្មី ដែលផ្តល់ដោយក្រសួងកសិកម្មជាបន្តបន្ទាប់ នឹងជួយបង្កើនចង្វាក់ផលិតកម្មតម្បាញសូត្រខ្មែរ បានមួយចំណែកធំ ស្របពេលក្រុមហ៊ុនមានតម្រូវការសូត្រកាន់តែច្រើននាពេលបច្ចុប្បន្ន។
សូមជ្រាបថា រោងសិប្បកម្មសូត្រ សិប្បករអង្គរ ស្ថិតនៅស្រុកពួក ជាចង្វាក់ផលិតកម្មក៏រស់រវើកនៃតម្បាញសូត្រខ្មែរ រាប់ចាប់ពីការដាំដើមមន ការចិញ្ចឹមដង្កូវនាង ស្រាវសូត្រ តម្បាញ និងការកែច្នៃជាសម្លៀកបំពាក់ និងសម្ភារប្រើប្រាស់ជាច្រើន ដែលបានបើកដំណើរការឡើងវិញនៅដើមខែកក្កដា ឆ្នាំ២០២៤ ដោយបានជួយឱ្យសិប្បករអ្នកតម្បាញអាជីព ជាង២០០នាក់ មានការងារធ្វើឡើងវិញបន្ទាប់ពីទីតាំងនេះបានបិទទ្វារមួយរយៈដោយសារវិបត្តិជំងឺកូវីដ-១៩ ។
Account
Security
Favourite Content