សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានរៀបចំសិក្ខាសាលាមួយស្ដីពី បទពិសោធន៍នៃការរៀបចំទីក្រុងនិងលំនៅឋាននៅកម្ពុជា និងហុងកុង នៅព្រឹកថ្ងៃទី០២ ខែកញ្ញា ឆ្នាំ២០២៤ នាទីស្ដីការក្រសួង ដោយមានការចូលពីបណ្ដាមន្ទីរ រាជធានី ខេត្ត តំណាងគណៈស្ថាបត្យករកម្ពុជា គណៈវិស្វករកម្ពុជា សមាគមអ្នកសាងសង់កម្ពុជា សមាគមអ្នកអភិវឌ្ឍន៍លំនៅឋាន និងមានការចូលរួមធ្វើបទបង្ហាញដោយអ្នកជំនាញផ្នែកលំនៅឋានមកពីហុងកុង និងកម្ពុជា ផងដែរ ។
ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា សិក្ខាសាលានេះ មានគោលបំណងចែករំលែកបទពិសោធន៍ក្នុងការរៀបចំទីក្រុងនៅកម្ពុជា និងនៅទីក្រុងហុងកុង ដល់ថ្នាក់ជាតិ និងនៅថ្នាក់ក្រោមជាតិ ក៏ដូចជាជូនដល់វិស័យឯកជន សមាគម និងផ្នែកឧត្តមសិក្សាដែលពាក់ព័ន្ធនៅវិស័យនេះ ។
ឯកឧត្តមបានមានប្រសាសន៍ថា ដើម្បីសម្រេចបាននូវគោលនយោបាយជាអាទិភាពរបស់រដ្ឋាភិបាល ក្រសួងបានកំណត់យកការចុះបញ្ជីដីធ្លីជាអាទិភាព និងយកចិត្តទុកដាក់យ៉ាងខ្លាំងទៅលើការរៀបចំផែនការយុទ្ធសាស្ត្រ ផែនការរៀបចំដែនដី និងនគរូបនីយកម្ម ដោយបានកំណត់ច្បាស់លាស់ពីតំបន់ប៉ូលអភិវឌ្ឍសេដ្ឋកិច្ច តំបន់ស្នូលនៃការអភិវឌ្ឍ និងអ័ក្សអភិវឌ្ឍ សមាហរណកម្មប្រទាក់ក្រឡាគ្នា ផែនការរៀបចំដែនដីតំប់ឆ្នេរ ផែនការរៀបចំដែនដីថ្នាក់ខេត្ត ប្លង់គោលប្រើប្រាស់ដី ផែនការប្រើប្រាស់ដីទីក្រុង និងទីប្រជុំជន ប្លង់គោលប្រើប្រាស់ដី ក្រុង ស្រុក ខណ្ឌ ផែនការប្រើប្រាស់ដីថ្នាក់ឃុំ សង្កាត់ ដើម្បីធានាការគ្រប់គ្រងការអភិវឌ្ឍ និងការសាងសង់ប្រកបដោយចីរភាព ។
ឯកឧត្តមបានបន្ថែមថា ៖ ការរៀបចំសិក្ខាសាលានេះឡើង ក្នុងគោលបំណងរួមចំណែកចែករំលែកបទពិសោធន៍ ការងាររៀបចំទីក្រុង និងលំនៅឋាននៅកម្ពុជា និងហុងកុង ដើម្បីបន្តពង្រឹងការរៀបចំដែនដី នគរូបនីយកម្ម និងសំណង់ នៅគ្រប់កម្រិតនៅកម្ពុជា។ នៅក្នុងសិក្ខាសាលានោះដែរ ក៏មានការធ្វើបទបង្ហាញដោយសាស្ត្រាចារ្យមកពីហុងកុង ដោយរៀបរាប់ពីបទពិសោធន៍នៃការរៀបចំទីក្រុងហុងកុង រួមជាមួយមន្ត្រីកម្ពុជាដែលពាក់ព័ន្ធនឹងការរៀបចំទីក្រុងក្នុងប្រទេសកម្ពុជាផងដែរ ។
លោក Ngai Ming Yip សាស្ត្រាចារ្យនៃសាកលវិទ្យាល័យហុងកុង បានបង្ហាញពីការរៀបចំទីក្រុងហុងកុង កាលពីទសវត្សរ៍ ឆ្នាំ ៥០-៦០មកចែករំលែកជូនអង្គសិក្ខាសាលាដែលបានចូលរួម ។
នៅក្នុងនោះដែរ លោកស្រី នូសុវត្ថិ ចាន់វត្តី អនុប្រធាននាយកដ្ឋានអភិវឌ្ឍសេដ្ឋកិច្ច កិច្ចការវិនិយោគ និងទំនាក់ទំនងអន្តរជាតិ ក៏បានធ្វើបទបង្ហាញពពីដំណោះស្រាយជោគជ័យនៃអគារប៊ូឌីញ ស ដល់សិក្ខាកាម ដោយលោកស្រី បានលើកឡើងថា អគារប៊ូឌិញ មានផ្ទៃក្រឡា ៦.៥៣១ម៉ែត្រការ៉េ ដោយមាន ៤៩៣ចំណែកឯកជន ( យូនីត ) ។ ក្រោយឆ្នាំ ១៩៧៩ មានប្រជាពលរដ្ឋចំនួន ២ ០៥៥នាក់ បានរស់នៅទីនោះ និងបន្តរស់នៅរហូតដល់អំឡុងឆ្នាំ២០១៧ រដ្ឋាភិបាលសម្របសម្រួលពលរដ្ឋចាកចេញពីអគារចាស់ៗនោះទៅកាន់តំបន់ថ្មីដោយយុទ្ធសាស្ត្រឈ្នះឈ្នះ ។
បើតាមឯកឧត្តម លាង មុនីរិទ្ធ បច្ចុប្បន្ន ក្រសួងរៀបចំដែនដី នគរូបនីយកម្ម និងសំណង់ បាន និងកំពុងសហការជាមួយដៃគូរដ្ឋ និងវិស័យឯកជន ក្នុងគោលបំណងលើកកម្ពស់សោភ័ណភាពទីក្រុង ទីប្រជុំជន និងបរិស្ថានល្អ សម្រាប់លើកកម្ពស់សុខុមាលភាពស៊ីវិល័យ និងគុណតម្លៃគ្រួសារ ។ លទ្ធផលនៃការរៀបចំដែនដី និងនគរូបនីយកម្ម មិនត្រឹមតែរួមចំណែកក្នុងការធានាការអភិវឌ្ឍ និងការអភរិក្សប្រកបដោយចីរភាព តុល្យភាព និងសមធម៌ប៉ុណ្ណោះទេ ថែមទាំងបានរួមចំណែកយ៉ាងសំខាន់ក្នុងការជំរុញកំណើសេដ្ឋកិច្ចតាមរយៈកំណើននៃការអភិវឌ្ឍ និងការកសាងជារៀងរាល់ឆ្នាំ ៕
Account
Security
Favourite Content