សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រោយពីបញ្ចប់នីតិវិធីសម្រាប់ការនាំចេញទៅប្រទេសចិន នៅថ្ងៃទី១៧ ខែកក្កដា ឆ្នាំ២០២៥នេះ រដ្ឋបាលគយចិន ចាប់ផ្តើមបើកភ្លើងខៀវឱ្យពាណិជ្ជករកម្ពុជានាំផ្លែធុរេនស្រស់ទៅកាន់ទីផ្សារប្រទេសចិនជាលើកដំបូងហើយ ដោយផ្តើមពីក្រុមហ៊ុន អេច អេហ្វ ហ្រ្វូត ឯ.ក (HF FRUIT LTD.) ដែលមានទីតាំងនៅភូមិចាន់ទូង ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ សហការជាមួយក្រុមហ៊ុនចិន ធ្វើការវេចខ្ចប់ស្របតាមភូតនាមអនាម័យរបស់ក្រសួងក្នុងការនាំចេញចំនួន១៧តោន។
លោក ហេង ពិសិទ្ធ ប្រធានមន្ទីរកសិកម្មខេត្តត្បូងឃ្មុំ បានថ្លែងអបអរសាទចំពោះកសិករខ្មែរ ជាពិសេសកសិករដាំដុះដើមទុរេននៅក្នុងប្រទេសកម្ពុជា ដែលអាចផលិតផ្លែទុរេន មានស្តងដារអនាម័យខ្ពស់នាំចេញទៅកាន់ទីផ្សារប្រទេសចិន។
លោកបញ្ជាក់ថា ៖
«កន្លងមក ទុរេនខ្មែរមិនមានទីផ្សារទូលំទូលាយនោះទេ ពោលមានត្រឹមទីផ្សារក្នុងស្រុកប៉ុណ្ណោះ ហើយថានៅពេលដែលទុរេនខ្មែរមានទីផ្សារនៅក្រៅប្ររទេសដូច្នេះ មានន័យថា ទុរេននៅប្រទេសកម្ពុជានឹងមានទីផ្សារល្អ និងមានតម្លៃខ្ពស់ទៀតផង។ នេះគឺជាលទ្ធផលដែលទទួលបានពីការខិតខំប្រឹងប្រែងរបស់ក្រសួងកសិកម្ម ក៏ដូចជារដ្ឋាភិបាល… ចឹង…ខ្ញុំចង់ឱ្យក្រុមហ៊ុនទំនាក់ទំនងជាមួយម្ចាស់ចំការឱ្យបានជាមុន ដើម្បីឱ្យគាត់ដឹងថា ទុរេននោះគ្មានសារធាតុគីមី និងគ្មានសត្វល្អិតជាប់នៅលើផ្លែមុននឹងនាំចេញ»។
លោក Wang Wenbin ឯកអគ្គរដ្ឋទូតចិនប្រចាំកម្ពុជា បានឱ្យដឹងនៅលើគណនីហ្វេសបុកថា ទុរេន គឺជាកសិផលដែលមានគុណភាពខ្ពស់ដំបូងគេរបស់កម្ពុជាដែលត្រូវបានអនុញ្ញាតនាំចេញទៅកាន់ប្រទេសចិនក្នុងឆ្នាំ២០២៥ ដែលរដ្ឋបាលគយប្រទេសចិនបានធ្វើបច្ចុប្បន្នភាពបញ្ជីរាយនាមចម្ការ និងរោងចក្រវេចខ្ចប់សម្រាប់ការនាំចេញផ្លែឈើកម្ពុជាទៅកាន់ប្រទេសចិន
លោកបានបញ្ជាក់ថា ៖
«បញ្ជីរាយនាមត្រូវបានបន្ថែមជាមួយនឹងបញ្ជីឈ្មោះចម្ការ និងរោងចក្រវេចខ្ចប់សម្រាប់ការនាំចេញទុរេនស្រស់របស់កម្ពុជា ទៅកាន់ប្រទេសចិន ដែលនេះមានន័យថា ទុរេនស្រស់របស់កម្ពុជាបានបញ្ចប់នីតិវិធីសម្រាប់ការនាំចេញទៅប្រទេសចិន ហើយអាចនាំចេញទៅប្រទេសចិនបាន»។
លោកអះអាងថា នេះជាកសិផលដែលមានគុណភាពខ្ពស់ដំបូងគេរបស់កម្ពុជា ដែលត្រូវបានអនុញ្ញាតនាំចេញទៅកាន់ប្រទេសចិនក្នុងឆ្នាំ ២០២៥ និងជាសមិទ្ធផលថ្មីមួយទៀត នៃកិច្ចសហប្រតិបត្តិការជាក់ស្តែងចិន-កម្ពុជាផងដែរ។ រហូតមកដល់បច្ចុប្បន្ននេះ កម្ពុជាមានផ្លែឈើចំនួន៥ប្រភេទដែលអាចនាំចេញទៅកាន់ប្រទេសចិន រួមមានដូចជា ចេក ស្វាយ មៀន ដូង និងទុរេន។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រទេសកម្ពុជាមានផ្ទៃដីដាំដុះដំណាំទុរេនចំនួន ៥ ២៨៩ហិកតា ក្នុងនោះផ្ទៃដីប្រមូលផលមានចំនួន ៣ ៤០៣ហិកតា ដែលទទួលបានបរិមាណផលប្រមាណ ៣៦ ៦៥៦តោនក្នុង១ឆ្នាំ៕ វិន ឈុនហ៊ាត
Account
Security
Favourite Content