ភ្នំពេញ៖ ថ្លែងក្នុងកិច្ចប្រជុំរដ្ឋមន្ត្រីទេសចរណ៍អាស៊ានបូកឥណ្ឌាលើកទី១៣នៅប្រទេសហ្វីលីពីន កាលពីថ្ងៃទី៣១ ខែមករា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បាន​កត់សម្គាល់ចំពោះវឌ្ឍនភាពវិជ្ជមានដែលសម្រេចបានក្រោមក្របខណ្ឌនៃផែនការការងារទេសចរណ៍អាស៊ាន–ឥណ្ឌា ឆ្នាំ២០២៣–២០២៧ ព្រមទាំងការអនុវត្តប្រកបដោយជោគជ័យនៃឆ្នាំទេសចរណ៍អាស៊ាន–ឥណ្ឌា ឆ្នាំ២០២៥។

ឯកឧត្តមរដ្ឋមន្ត្រីបានបន្តលើកឡើងថា ការអនុវត្តដោយជោគជ័យនៃឆ្នាំទេសចរណ៍ កម្ពុជា–ឥណ្ឌា ឆ្នាំ២០២៤ និង ឆ្នាំ២០២៥ ដែលឥណ្ឌា គឺជាទីផ្សារមួយដ៏មានសក្តានុពលសម្រាប់កម្ពុជា ជាពិសេស ការតភ្ជាប់ផ្លូវអាកាសដោយផ្ទាល់រវាងទីក្រុងភ្នំពេញ និងទីក្រុងញូវដែលី ព្រមទាំងរវាងទីក្រុងសៀមរាប និងទីក្រុងកុលកាតា បានលើកកម្ពស់ភាពងាយស្រួលក្នុងការធ្វើដំណើរ និងជំរុញលំហូរភ្ញៀវទេសចរឥណ្ឌាឱ្យកើនឡើងបន្ថែមទៀត។

ឯកឧត្តម ហួត ហាក់ ក៏បានថ្លែងផងដែរថា៖

«ដើម្បីពង្រឹងកិច្ចសហប្រតិបត្តិការទេសចរណ៍អាស៊ាន–ឥណ្ឌាបន្ថែមទៀត យើងមានចំណុចអាទិភាពមួយចំនួនដែលត្រូវយកចិត្តទុកដាក់ រួមមាន៖ ការលើកកម្ពស់ការផ្សព្វផ្សាយទេសចរណ៍រួមឱ្យកាន់តែមានប្រសិទ្ធភាព,ការធ្វើឱ្យប្រសើរឡើងនូវការតភ្ជាប់ផ្លូវអាកាស ផ្លូវសមុទ្រ និងទេសចរណ៍តាមនាវាទេសចរណ៍, ការពង្រឹងកិច្ចសហការលើការអភិវឌ្ឍទេសចរណ៍ប្រកបដោយនិរន្តភាពនិងបរិយាបន្ន និង ការពង្រឹងការអភិវឌ្ឍធនធានមនុស្ស ព្រមទាំងការជំរុញការផ្លាស់ប្តូររវាងប្រជាជននិងប្រជាជន»។

ឯកឧត្តម បានគូសបញ្ជាក់ថា៖ ចំពោះកម្ពុជា គឺជាគោលដៅទេសចរណ៍ដែលមានសុវត្ថិភាព និងបានត្រៀមខ្លួនជាស្រេចក្នុងការទទួលស្វាគមន៍យ៉ាងកក់ក្តៅភ្ញៀវទេសចរឥណ្ឌាបន្ថែមទៀតមកទស្សនាតំបន់ទេសចរ​ណ៍​បេតិកភណ្ឌ គោលដៅទេសចរណ៍សាសនា និងគោលដៅទេសចរណ៍ផ្នែកសុខុមាលភាពព្រមទាំងផលិតផលទេសចរណ៍ដ៏សម្បូរបែបរបស់កម្ពុជា។

ខណៈដែលនៅក្នុងឆ្នាំ២០២៥នេះ ភ្ញៀវទេសចរជនជាតិឥណ្ឌា មកទស្សនាកម្ពុជាមានចំនួន ៧១ ០៤៦នាក់ ជាពិសេសមួយរយៈចុងក្រោយនេះមានការកើនឡើងយ៉ាងខ្លាំង។

លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានចាត់ទុកកំណើនភ្ញៀវទេសចរឥណ្ឌានៅកម្ពុជានាពេលថ្មីៗនេះ គឺជាសញ្ញាវិជ្ជមាន និងជាឱកាសមាសសម្រាប់ទេសចរណ៍កម្ពុជា ដែលកំណើននេះនឹងជួយបំពេញបន្ថែមនូវចំនួនភ្ញៀវទេសចរនៅកម្ពុជា ជួយឱ្យមានការងើបឡើងវិញនូវសេដ្ឋកិច្ច ខណៈឥណ្ឌាជាទីផ្សារដ៏ធំមួយ និងមានប្រជាពលរដ្ឋរស់នៅច្រើន ថែមទាំងមានកម្លាំងទិញខ្ពស់។

លោកជំទាវ ឆាយ ស៊ីវ លីន បានមានប្រសាសន៍ថា ៖

«កំណើនទេសចរឥណ្ឌា គឺបង្ហាញពីទំនាក់ទំនងវប្បធម៌ ព្រោះវត្តមានប្រជាជនឥណ្ឌាមកកម្សាន្តនៅតំបន់អង្គរគឺជាការផ្សារភ្ជាប់ឡើងវិញនូវឬសគល់វប្បធម៌ និងសាសនាហិណ្ឌូ និងព្រះពុទ្ធសាសនា ដែលកម្ពុជានិងឥណ្ឌា បានគោរពប្រតិបត្តិជាមួយគ្នាជាយូរលង់ណាស់មកហើយ»។

យោង​តាមរបាយការណ៍របស់​ក្រសួងទេសចរណ៍​ នៅក្នុងឆ្នាំ ២០២៥ កម្ពុជាទទួលបានភ្ញៀវទេសចរអន្តរជាតិជាង ៥,៥ លាននាក់ ក្នុង​នោះមាន​ទេសចរ​វៀត​ណាមចំនួន ​១,២ ​លាននាក់ ​ធ្លាក់ចុះ ៨,៨% ឈរលេខរៀងទី១ ​ចំណែកឯទេសចរចិនចំនួន ១,២ ​លាននាក់ ​កើន ៤១,៤% ឈរលេខរៀងទី២ និង​ថៃ ១ ​លាននាក់ ​ធ្លាក់ចុះ ៥២% ​អាមេរិក ២០ ម៉ឺននាក់ ​ធ្លាក់ចុះ ៣,៦% ទេសចរ​កូរ៉េ ជាង១៥ម៉ឺននាក់ ​ធ្លាក់ចុះ ​២០,៦%និងជប៉ុន ជាង១០ម៉ឺននាក់ ធ្លាក់ចុះ៦%៕