សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ចាម ៖ ជាដំណឹងដ៏ល្អ និងរីករាយសម្រាប់បងប្អូនប្រជាកសិករដែលដាំដុះដំណាំទុរេន ខណៈដែលមានក្រុមហ៊ុនចិនមួយបានប្រកាសពីផែនការប្រមូលផ្លែទុរេនខ្មែរប្រមាណ៥០០០តោនក្នុងមួយឆ្នាំដើម្បីធ្វើការនាំចេញ ខណៈដែលទីផ្សារក្នុងស្រុកក៏មានភាពល្អប្រសើរ។
លោក អាន ពិសិដ្ឋ អ្នកសម្របសម្រួលទិញផ្លែទុរេនរបស់ក្រុមហ៊ុនចិន KONG & DONG (K&D) បានឱ្យដឹងថា សម្រាប់ឆ្នាំ២០២៥នេះ ចិនបានកម្ម៉ង់ទិញផ្លែទុរេនពីកសិករខ្មែរប្រមាណជា៥០០០តោន ច្រើនជាងឆ្នាំកន្លងទៅដែលមានត្រឹមប្រមាណជាង១០០០តោនតែប៉ុណ្ណោះ។ ជាមួយនឹងតម្រូវការដ៏ច្រើនខាងលើនេះ បច្ចុប្បន្ន ក្រុមហ៊ុន បាន និងកំពុងសាងសង់ជាឃ្លាំងដ៏ធំមួយសម្រាប់ត្រៀមរក្សាទុកផ្លែទុរេនដែលប្រមូលទិញបានដោយមានទីតាំងនៅក្នុងឃុំបែកអន្អូង ស្រុកស្ទឹងត្រង់ ខេត្តកំពង់ចាម រហូតគ្រប់ចំនួនទើបធ្វើការនាំចេញ។
លោកថា ៖ «សម្រាប់ទិន្នផលផ្លែទុរេន ការលក់បោះដុំ កសិករអាចទទួលបានក្នុងតម្លៃសមរម្យចន្លោះពី ១២០០០រៀល ទៅ ១៤០០០រៀល ក្នុងមួយគីឡូក្រាម ពោលគឺប្រហាក់ប្រហែលទៅនឹងតម្លៃលក់រាយនៅលើទីផ្សារក្នុងប្រទេសកម្ពុជាយើងដែរ។ ការកម្ម៉ង់ទិញចំនួនដ៏ច្រើននេះ ខាងក្រុមហ៊ុនអាចជួបភាពប្រឈមខ្លះក្នុងការស្វែងរកដៃគួផ្គត់ផ្គង់ក្នុងស្រុក ដោយសារព័ត៌មានលម្អិតពីតម្រូវការផ្លែទុរេនសម្រាប់នាំចេញនេះនៅមិនទាន់មានការផ្សព្វផ្សាយឱ្យបានទូលំទូលាយនៅឡើយ ប៉ុន្តែយ៉ាងណា ក្នុងនាមជាអ្នកសម្របសម្រូលខ្ញុំបានសហការជាមួយកសិករដែលមានចំការទុរេនធំៗនៅក្នុងស្រុកស្ទឹងត្រង់, នៅខេត្តរតនគិរី ត្បូងឃ្មុំ សំឡូត តំបន់អូសោម និងខេត្តពោធិ៍សាត់ជាដើម»។
ជាមួយគ្នានេះ លោកក៏បានអំពាវនាវដល់កសិករដែលមានចំការទុរេនដែលមានបំណងលក់បោះដុំសម្រាប់ការនាំចេញអាចទាក់ទងមកកាន់ក្រុមហ៊ុនខាងលើដោយផ្ទាល់ ប៉ុន្តែចំពោះប្រភេទផ្លែទុរេនដែលមានតម្រូវការ ក៏ដូចជាទទួលទិញពីក្រុមហ៊ុន គឺប្រាកដថា ជាផ្លែទុរេនខ្មែរ ដាំដុះ និងថែទាំទៅស្តង់ដារកសិកម្មសុវត្ថិភាព ជាពិសេសគឺធុរេនគ្មានផ្ទុកសារធាតុគីមី។
លោក តាង ពិសិដ្ឋ ម្ចាស់ចំការទុរេននៅខេត្តរតនៈគរី និងលោក វ៉ាន់ ម៉ា ម្ចាស់ចំការទុរេនខេត្តកំពត បានសម្តែងមតិស្រដៀងគ្នាថា មកទល់បច្ចុប្បន្ននេះ ពួកលោកនៅមិនទាន់បានដឹងដំណឹងពីការប្រកាសទិញទុរេនពីក្រុមហ៊ុននោះឡើយ។ យ៉ាងនេះក្តី កសិករទាំងពីរខាងលើនេះ បានសម្តែងភាពរីករាយដោយគិតថា ទុរេនឆ្នាំនេះនឹងមានទីផ្សារល្អ ដោយសារមានក្រុមហ៊ុនចិនចាំទទួលទិញក្នុងទំហំច្រើន ខណៈដែលតម្រូវការទីផ្សារក្នុងស្រុកក៏មានភាពទូលាយ ដូច្នេះ ទោះជាមិនបានលក់ទៅឱ្យក្រុមហ៊ុនខាងលើ ក៏ទីផ្សារទុរេនខ្មែរមិនជួបភាពប្រឈមដូចដំណាំដទៃទៀតមួយចំនួន ដែលនៅពេលដល់ខែប្រមូលផលបែជារកទីផ្សារលក់ចេញមិនបាន។
គួរបញ្ជាក់ថា ទុរេនចាប់ផ្តើមឱ្យផលចាប់ពីខែមេសា ដល់ខែកក្កដា ជារៀងរាល់ឆ្នំា ចំណែកទីផ្សារលក់រាយនៅលើទីផ្សារក្នុងស្រុក ជាទូទៅគេអាចលក់បានក្នុងតម្លៃចន្លោះពី ១៨០០០រៀលទៅដល់ ២៥០០០រៀលក្នុងមួយគីឡូក្រាម៕ អត្ថបទ ៖ វិន ឈុនហ៊ាត
Account
Security
Favourite Content