បរទេស៖ យោងតាមប្រភពព័ត៌មានពី BBC បានឱ្យដឹងថា ចិន បានប្រកាសថា ខ្លួនកំពុងស៊ើបអង្កេតក្រុមហ៊ុនម៉ាកសំលៀកបំពាក់ដ៏ល្បីរបស់អាម៉េរិក PVH ដោយសង្ស័យថា ក្រុមហ៊ុនមួយនេះមានវិធានការរើសអើងប្រឆាំងនឹងក្រុមហ៊ុនកប្បាសចិននៅក្នុងតំបន់ស៊ីនជាំង។

ចំណាត់ការនេះ គឺជាកិច្ចខិតខំប្រឹងប្រែងថ្មីមួយរបស់ទីក្រុងប៉េកាំងទៅលើការប្រឆាំងតបទៅនឹងការចោទប្រកាន់ពីមន្ត្រីលោកខាងលិច និងសកម្មជនសិទ្ធិមនុស្សថា ការផលិតកប្បាស និងទំនិញផ្សេងទៀតនៅក្នុងតំបន់បានប្រើកម្លាំងពលកម្មក្រុមជនជាតិភាគតិច Uyghur ដោយបង្ខំ ហើយកាលពីឆ្នាំ២០២១ សហរដ្ឋអាមេរិកបានហាមឃាត់ការនាំចូលពីតំបន់នេះ ដោយបានលើកឡើងពីបញ្ហាទាំងនោះ។ ថ្មីៗនេះដែរ ក្រសួងពាណិជ្ជកម្មរបស់ប្រទេសចិនបានចោទប្រកាន់ក្រុមហ៊ុនសំលៀកបំពាក់អាម៉េរិក PVH ពីបទធ្វើពហិការលើកប្បាសនៅតំបន់ស៊ីនជាំង និងផលិតផលផ្សេងទៀតដោយគ្មានភស្តុតាងជាក់លាក់ណាមួយ។ សេចក្តីថ្លែងការណ៍របស់ក្រសួងបាននិយាយថា ការរើសអើងរបស់ PVH ប្រឆាំងនឹងផលិតផលនៅតំបន់ស៊ីនជាំងធ្វើឱ្យខូចខាតយ៉ាងធ្ងន់ធ្ងរដល់សិទ្ធិ និងផលប្រយោជន៍ស្របច្បាប់របស់ក្រុមហ៊ុនចិនដែលពាក់ព័ន្ធ ព្រមទាំងប៉ះពាល់ដល់អធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ចិនផងដែរ។

PVH គឺជាក្រុមហ៊ុនមេនៃម៉ាកយីហោល្បីៗចំនួន ២ គឺ Tommy Hilfiger និង Calvin Klein ដែលកំពុងមានវត្តមានដ៏សំខាន់នៅក្នុងប្រទេសចិន។ ទន្ទឹមនឹងនេះ PVH មិនបានឆ្លើយតបទៅនឹងសំណើសុំការអត្ថាធិប្បាយទេ ប៉ុន្តែខ្លួនធ្លាប់បាននិយាយថា បានអនុវត្តតាមច្បាប់នៅក្នុងតំបន់ដែលខ្លួនធ្វើអាជីវកម្ម។ យ៉ាងណាមិញ PVH មានរយៈពេល ៣០ ថ្ងៃដើម្បីឆ្លើយតបទៅនឹងអាជ្ញាធរចិនពាក់ព័ន្ធទៅនឹងការចោទប្រកាន់មួយនេះ ហើយក្រុមហ៊ុនក៏អាចនឹងត្រូវបានបញ្ចូលទៅក្នុងបញ្ជីអង្គភាពដែលមិនគួរឱ្យទុកចិត្តរបស់ចិន ជាមួយនឹងការរឹតបន្តឹងបន្ថែមទៀត។

Cullen Hendrix អ្នកជំនាញជាន់ខ្ពស់នៅវិទ្យាស្ថាន Peterson Institute of International Economics បានលើកឡើងថា ការប្រកាសរបស់ចិនមួយនេះអាចនឹងប៉ះពាល់ដល់កេរ្តិ៍ឈ្មោះរបស់ក្រុមហ៊ុនឬបាត់ទំនុកចិត្តពីអតិថិជនចិន ហើយក៏ជាការព្រមានយ៉ាងទូលំទូលាយដល់ក្រុមហ៊ុនផ្សេងៗទៀតអំពីហានិភ័យដែលគោរពតាមការរឹតបន្តឹងរបស់លោកខាងលិច។ ក្នុងន័យនេះ ចិន កំពុងបង្ហាញពីភាពខ្លាំងខ្លារបស់ខ្លួន ដោយព្រមានពីផលវិបាកដល់អាជីវកម្មរបស់លោកខាងលិចជាជាងព្រមានទៅរដ្ឋាភិបាលលោកខាងលិច។

ការស៊ើបអង្កេតទៅ PVH បានកើតឡើងចំពេលដែលមានភាពតានតឹងរវាងចិន និងលោកខាងលិចទៅលើបញ្ហាជាច្រើន ជាពិសេសបញ្ហានៃការផលិតរថយន្តអគ្គិសនី ។ កាលពីថ្ងៃចន្ទ សហរដ្ឋអាមេរិកបានស្នើច្បាប់ហាមឃាត់លើការប្រើប្រាស់បច្ចេកវិទ្យាមួយចំនួននៅក្នុងរថយន្តរបស់ចិន និងរុស្ស៊ី ដោយលើកឡើងពីការគំរាមកំហែងផ្នែកសន្តិសុខ។ កាលពីមុន ចិនបានដាក់ក្រុមហ៊ុនអាមេរិកនៅក្នុងបញ្ជីអង្គភាពដែលមិនអាចជឿទុកចិត្តបានចំពេលមានភាពតានតឹងពាណិជ្ជកម្មក្តៅគគុករវាងទីក្រុងប៉េកាំង និងទីក្រុងវ៉ាស៊ីនតោន។

លោក Hendrix បានបន្ថែមថា ការសម្រេចចិត្តរបស់ចិនក្នុងការកំណត់គោលដៅលើ PVH ដែលជាក្រុមហ៊ុនអាម៉េរិកល្បីឈ្មោះក្នុងចំណោមអ្នកប្រើប្រាស់ បានបង្ហាញថា ជម្លោះរបស់ប្រទេសទាំងពីរបានរីកធំលើសពីវិស័យការពារជាតិ និងបច្ចេកវិទ្យាទំនើប។ លើសពីនេះ វាអាចប៉ះពាល់ដល់ខ្សែសង្វាក់ផ្គត់ផ្គង់កាន់តែច្រើននៅក្នុងវិស័យផ្សេងៗនៃសេដ្ឋកិច្ច។

នៅក្នុងរបាយការណ៍ប្រចាំឆ្នាំរបស់ខ្លួន PVH បានជូនដំណឺងដល់វិនិយោគិនអំពីប្រាក់ចំណូល និងហានិភ័យដល់កេរ្តិ៍ឈ្មោះដែលកើតចេញពីជម្លោះនៅតំបន់ស៊ីនជាំង។ មិនត្រឹមតែប៉ុណ្ណោះ PVH បានកត់សម្គាល់ថា ជម្លោះដ៏តានតឹងរវាងចិន និងសហរដ្ឋអាមេរិក បណ្តាលឱ្យមានការរឹតបន្តឹងដល់ក្រុមហ៊ុនពហុជាតិដែលមានសាខាជាច្រើន។ កាលពីឆ្នាំ ២០២០ ក្រុមហ៊ុននេះបានលើកឡើងនៅក្នុងរបាយការណ៍ឆ្នាំ២០២០ ដោយចោទប្រកាន់ថា ក្រុមហ៊ុននេះទទួលបានអត្ថប្រយោជន៍ពីការរំលោភបំពានពលកម្មនៅតំបន់ស៊ីនជាំង។​ ជាការឆ្លើយតប PVH បានយកចិត្តទុកដាក់ដោះស្រាយបញ្ហានេះ ខណៈដែល PVH មានបុគ្គលិកជាង ២៩ ០០០ នាក់នៅទូទាំងពិភពលោក ហើយចំណូលច្រើនជាង ៦៥ ភាគរយបានមកពីការលក់នៅក្រៅសហរដ្ឋអាមេរិក៕