សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការដាំដំណាំ ពិសេសការដាំបន្លែមិនថាក្នុងទំហំតូច ឬទំហំធំជាលក្ខណៈអាជីវកម្មនោះទេ កំពុងទទួលបានការយកចិត្តទុកដាក់កាន់តែខ្លាំងពីសំណាក់ក្រសួងកសិកម្ម និងស្ថាប័ន អង្គការពាក់ព័ន្ធ សម្ដៅលើកកម្ពស់ជីវភាព និងសុខុមាលភាពរបស់អ្នកទទួលទាន។ តួយ៉ាង កសិករក្នុងសហគមន៍មួយនៅខេត្តកំពតកំពុងទទួលបានផលប្រយោជន៍ទាំងផ្នែកអាហារូបត្ថម្ភ និងជីវភាព ក្រោមគម្រោងលើកកម្ពស់សន្តិសុខស្បៀង អាហារូបត្ថម្ភ និងជីវភាពដល់ប្រជាពរដ្ឋក្រីក្រ។
លោក ង៉ែត ចាន់ដា បុគ្គលិកគម្រោងលើកកម្ពស់សន្តិសុខស្បៀង អាហារូបត្ថម្ភ និងជីវភាពដល់ប្រជាពរដ្ឋក្រីក្រ របស់អង្គការ Helen Keller ប្រចាំខេត្តកំពត បានមានប្រសាសន៍ឱ្យដឹងថា គម្រោងលើកកម្ពស់សន្តិសុខស្បៀង អាហារូបត្ថម្ភ និងជីវភាពដល់ប្រជាពរដ្ឋក្រីក្រ តាមរយៈផលិតកម្មស្បៀងជាលក្ខណៈគ្រួសារ បានជួយឱ្យកសិករក្នុងសហគមន៍កសិកម្ម គុណវុឌ្ឍិល្បើក ស្ថិតក្នុងភូមិត្រពាំងថ្ម ឃុំល្បើក ស្រុកឈូក ខេត្តកំពត បានផ្លាស់ប្ដូរច្រើន ដែលពីមុមគាត់ដាំតាមទម្លាប់ និងដាំដំណាំតិចតួសម្រាប់ហូប ទៅជាការដាំដំណាំចម្រុះច្រើនមុខ និងបានពង្រីកការដាំដុះពីការដាំសម្រាប់ទទួលទានទៅជាអាជីវកម្ម ដោយទទួលបានការផ្ដល់នូវជំនួយផ្នែកបច្ចេកទេស ការជ្រើសរើសពូជ រកពូជដែលទទួលបានទិន្នផលខ្ពស់ និងត្រូវតាមតម្រូវការទីផ្សារ ផ្ដល់នូវពូជបន្លែ ជីសរីរាង្គ និងចែករំលែកបច្ចេកទេសថែមទៀតផង។
លោកបញ្ជាក់ថា៖
«ក្នុងគម្រោងនេះ បានជួយទៅដល់កសិករ ដូចជា ផ្ដល់ពូជបន្លែជូនកសិករចំនួន ១៤មុខ ផ្ដល់ជាជីសរីរាង្គ ៥០គីឡូក្រាមក្នុងមួយគ្រួសារ ផ្ដល់ជាបច្ចេកទេសកសិកម្ម និងការចុះព្រឹក្សារជាប្រចាំតាមរយៈគ្រូបង្គោលនៅក្នុងសហគមន៍ផ្ទាល់ ដោយក្នុងមួយសហគមន៍យើងមានគ្រូបង្គោល ៣នាក់ដែលមានតួនាទីជាអ្នកផ្ដល់ និងចែករំលែកបច្ចេកទេសបន្តទៅដល់កសិករដែលជាសមាជិកដទៃទៀត»។
លោកបន្តថា ចំពោះពូជទាំង ១៤មុខ កសិករខ្លះអាចដាំបានទាំង ១៤មុខតែម្ដង ឯកសិករខ្លះទៀតអាចដាំបានចន្លោះពី ៤ ទៅ ៦មុខអាស្រ័យទៅតាមទំហំដី និងទំហំនៃផលិតកម្មរបស់ពូកគាត់។ ចំណែកកសិករដែលទទួលបានផលប្រយោជន៍ពីគម្រោង ភាគច្រើនគាត់ទទួលបានផលដំណាំគ្រាប់គ្រាន់សម្រាប់បរិភោគប្រមាណ ៦០ភាគរយ ឯក្រៅពីនេះអាចពង្រីកការដាំដុះ និងលក់កសិផលនៅក្នុងសហគមន៍ និងទៅលើទីផ្សារទូទៅ។ ទាក់ទងនឹងការលក់កសិផលនេះដែរ យើងមានលក្ខខណ្ឌសម្រាប់ដែលទទួលបានពូជ ក៏ដូចជាជីពីគម្រោងនេះ ត្រូវលក់បញ្ចុះតម្លៃដល់អ្នកដែលមានបណ្ណក្រីក្រ ៣០ភាគរយផងដែរ។
គួរបញ្ជាក់ដែរថា គម្រោងនេះបានចាប់ផ្ដើមនៅខែមករា ឆ្នាំ២០២២ ដោយក្នុងខេត្តកំពត មានសហគមន៍ស្ថិតក្រោមគម្រោងគម្រោងលើកកម្ពស់សន្តិសុខស្បៀង អាហារូបត្ថម្ភ និងជីវភាពដល់ប្រជាពរដ្ឋក្រីក្រចំនួន ២០សហគមន៍ ក្នុងនោះមាន ៣២០គ្រួសារដែលជាកសិករដាំបន្លែ ដោយឡែកក្នុងឃុំល្បើកនេះក៏មានសហកមន៍មួយឈ្មោះថា សហគមន៍គុណវុឌ្ឍិល្បើក ដែលកសិករទទួលផលពីគម្រោងទៅលើផលិតកម្មបន្លែជាលក្ខណៈគ្រួសារនេះមាន ២២គ្រួសារ ដែលគាត់ដាំដុះជាលក្ខណៈគ្រួសារផង និងអាជីវកម្មផង៕
Account
Security
Favourite Content