សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាការពិត សហគ្រាសធុនតូច និងមធ្យម (SME) ក៏ដូចជារបរក្រៅប្រព័ន្ធជាប្រភេទមុខរបរដែលនៅក្នុងក្របខ័ណ្ឌតូចតាច រីឯការរកប្រាក់ចំណូលក៏នៅមានកម្រិត ម្ល៉ោះហើយបានជាកាលពីពេលកន្លងទៅ រាជរដ្ឋាភិបាលដាក់ការខិតខំប្រឹងប្រែង ក្នុងការជួយជ្រោមជ្រែងអ្នកធ្វើការនៅក្នុងវិស័យនេះឱ្យមានភាពល្អប្រសើរ។
មិនត្រឹមតែគិតគូរលើការផ្ដល់ជាទុនសម្រាប់ដំណើរការរកស៊ីនោះទេ ប្រមុខរាជរដ្ឋាភិបាលក៏បានគិតគូរអំពីរបបសន្តិសុខសង្គម ដែលផ្ដោតលើសេវាសុខភាពផងដែរ។ បេឡាជាតិរបបសន្តិសុខសង្គម ឬ ប.ស.ស ប្រៀបដូចជាសេវាធានារ៉ាប់រងសង្គម ដែលពលរដ្ឋ បុគ្គលិកក្រុមហ៊ុន មន្ត្រីរាជការអាចបង់ភាគទានដើម្បីក្លាយជាសមាជិក។ យ៉ាងណាមិញ ថ្មីៗនេះ បេឡាជាតិរបបសន្តិសុខបានប្រកាសនៅលើគេហទំព័ររបស់ខ្លួនក្នុងការផ្ដល់ជូនប័ណ្ណ ប.ស.ស ជូនដល់អ្នកបម្រើការក្នុងវិស័យសហគ្រាសធុនតូច និងមធ្យម ព្រមទាំងអ្នកធ្វើការក្នុងវិស័យសេដ្ឋកិច្ចក្រៅប្រព័ន្ធផងដែរ។
ការពង្រឹងសេវាសន្តិសុខសង្គមនេះបានជំរុញឱ្យប្រជាជនគ្រប់ស្រទាប់ ជាពិសេសប្រជាជនដែលមិនធ្លាប់បានប្រើប្រាស់សេវាសង្គមនេះសោះ ក៏អាចក្លាយជាសមាជិកបានដោយគ្រាន់តែបង់ភាគទានក្នុងចំនួនមួយដែលពួកគេអាចទ្រទ្រង់បាន។ សម្រាប់វិស័យសហគ្រាសធនតូច និងមធ្យម (SME) ក៏ដូចជាសហគ្រាសធនតូចបំផុត (Micro SME) ការផ្ដល់ជូននេះគឺពិតជាមានសារៈសំខាន់ណាស់ ហើយក៏ជាផ្នែកមួយដែលជួយជំរុញឱ្យសេដ្ឋកិច្ចគ្រួសារពួកគេមានស្ថិរភាពផងដែរ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានយល់ឃើញថា នេះជារឿងចំណេញសម្រាប់អ្នកធ្វើការក្នុងវិស័យខាងលើ។
លោកឧកញ៉ា តែ តាំងប៉ បានលើកឡើងថា ៖
“អ្នកដែលមានប័ណ្ណ ប.ស.ស អាចទទួលបានអត្ថប្រយោជន៍ច្រើនដូចជា ពេលឈឺថ្កាត់អី អាចប្រើប្រាស់ប័ណ្ណដើម្បីទប់ការចំណាយលើសេវាសុខភាព ពេលមានគ្រោះថ្នាក់ណាមួយដែលប៉ះពាល់ដល់បុគ្គល ឬឈានដល់អាយុជីវិត រដ្ឋគេនឹងជួយតាមរយៈ ប.ស.ស នេះ។”
លោកឧកញ៉ាបន្តថា ៖
“សម្រាប់អ្នកធ្វើការក្នុងវិស័យ SME ដែលមានប្រាក់ចំណូលតិច គឺកាន់តែជារឿង សំខាន់សម្រាប់ពួកគេក្នុងការគិតគូរពីការធ្វើប័ណ្ណ ប.ស.ស ព្រោះនៅពេលមានជំងឺឈឺថ្កាត់ម្ដងៗ ពួកគេត្រូវខាតបង់ថវិកាដែលខ្លួនខិតខំរកកន្លងមក និងថែមទាំងប៉ះពាល់ដល់ចំណូលក្នុងគ្រួសារទៀតផង។”
បើតាមការបញ្ជាក់ឱ្យដឹងពីសំណាក់ប្រធានសមាគមរូបនេះ គិតត្រឹមរយៈពេលប្រមាណជា ២ឆ្នាំចុងក្រោយនេះ ចំនួនអ្នកធ្វើការក្នុងវិស័យ SME បានចុះឈ្មោះជាសមាជិក ប.ស.ស បានកើនឡើងគួរឱ្យកត់សម្គាល់ ដែលការកើនឡើងនេះ គឺដោយសារប្រជាជនមានការយល់ដឹងច្រើនជាងមុនអំពីការថែទាំសុខភាព ជាពិសេសគឺការសម្របសម្រួលពីសំណាក់រាជរដ្ឋាភិបាលពាក់ព័ន្ធនឹងតម្លៃភាគទាន។
គួររំលឹកថា បេឡាជាតិរបបសន្តិសុខសង្គមបានផ្ដល់ប័ណ្ណ ប.ស.ស ដល់អាជីវករលក់ដូរ អ្នករត់កង់បី ក៏ដូចជាអ្នករត់ម៉ូតូឌុប ដោយក្នុងមួយខែពួកគេត្រូវបង់ភាគទានត្រឹមតែ ១៥ ៦០០រៀលតែប៉ុណ្ណោះ។ សម្រាប់លក្ខខណ្ឌក្នុងការស្នើសុំគឺទាមទារដូចជា មានមុខរបរ, មានប្រាក់ចំណូលផ្ទាល់ខ្លួន (ដោយមិនពាក់ព័ន្ធនឹងប្រាក់ឈ្នួល ធ្វើការងារ ឬប្រកបរបរអាជីវកម្មផ្ទាល់ខ្លួន និងមិនប្រើប្រាស់បុគ្គលិក) ត្រូវមានអាយុមិនលើសពី៦០ឆ្នាំគិតត្រឹមកាលបរិច្ឆេទស្នើចុះបញ្ជីនៅ ប.ស.ស. សាមីខ្លួនត្រូវអញ្ជើញមកស្នើសុំធ្វើប័ណ្ណ ប.ស.ស. ដោយផ្ទាល់ និងភ្ជាប់ជាមួយនូវអត្តសញ្ញាណប័ណ្ណសញ្ជាតិខ្មែរច្បាប់ដើម (មានសុពលភាព)នៅតាមបណ្តាសាខាទីស្នាក់បេឡាជាតិរបបសន្តិសុខសង្គមដែលនៅជិតផ្ទះលោកអ្នកប៉ុណ្ណោះ៕
Account
Security
Favourite Content