កាកសំណល់ ដែលអាចកែច្នៃបានមានច្រើនប្រភេទ តែក្នុងនោះ ការផលិតជីកំប៉ុស្តពីកាកសំណល់ជាមធ្យោបាយល្អមួយសម្រាប់អ្នកកែច្នៃ ដែលអាចជួយដល់ការដាំដុះរបស់កសិករផង និងចូលរួមកាត់បន្ថយកាកសំណល់ក្នុងបរិស្ថានកាន់តែច្រើន។

មួយក្នុងចំណោមសិប្បកម្មកែច្នៃជីកំប៉ុស្ត​ អាហ្គ្រោណេតឈ័រ (AGRONature) ជាកន្លែងកែច្នៃជីកំប៉ុស្តមួយ បង្កើតឡើងនៅឆ្នាំ២០១៩​ ក្នុងគោលបំណងជួយដោះស្រាយបញ្ហារបស់កសិករតាមរយៈផលិតផលកសិកម្ម ដែលផលិតឡើងដោយធម្មជាតិ ដើម្បីបង្កើនជីជាតិដី និងការពារដំណាំពីការបំផ្លាញរបស់ជំងឺ និងសត្វល្អិតចង្រៃ។

លោក ញឿ ចាន់រ៉េត ជាអ្នកគ្រប់គ្រងទូទៅរបស់ អាហ្គ្រោណេតឈ័រ និងជាអ្នកជំនាញកសិកម្មដែលបានបញ្ចប់ការសិក្សារពីសាកលវិទ្យាល័យភូមិន្ទកសិកម្ម ជំនាញវិទ្យាសាស្ត្រកសិកម្ម បានប្រាប់ឱ្យដឹងថា៖

«យើងបង្កើតអាជីវកម្មនេះឡើង ដោយមានទស្សនៈវិស័យចង់លើកស្ទួយវិស័យកសិកម្មបែបកសិអេកូឡូស៊ី និងការដាំដុះបែបសរីរាង្គនៅកម្ពុជា ដើម្បីកាត់បន្ថយផលប៉ះពាល់ចំពោះសុខភាព និងបរិស្ថាន ដោយសារការប្រើជី និងថ្នាំពុលគីមីក្នុងវិស័យកសិកម្ម តាមរយៈការស្រាវជ្រាវ និងអភិវឌ្ឍផលិតផល ជីសរីរាង្គ និងថ្នាំបណ្ដេញសត្វល្អិតផ្សំពីរុក្ខជាតិ»។

លោកបន្តថា ៖

«ផលិតផលយើងមានច្រើនមុខ តែផលិតផលដែលគេស្គាល់ជាទូទៅគឺ ជីកំប៉ុស្ត ផ្សំឡើងពីលាមកសត្វ កាកសំណល់រុក្ខជាតិ និងកំបោរកសិកម្ម ជាមួយបច្ចេកទេសនៃការផលិតស្របតាមស្តង់ដារកសិកម្មសរីរាង្គ ជួយឱ្យដីធូ បង្កើនជីជាតិដី ព្យាបាលដីខូច ធ្វើឱ្យដំណាំលូតលាស់ល្អ។ ចំពោះជីកំប៉ុស្តនេះដែរ យើងមានច្រើនប្រភេទដូចជា កំប៉ុស្តជន្លេន កំប៉ុស្តគ្រាប់ កំប៉ុស្តម៉ត់ កំប៉ុស្តទឹក ក្រៅពីនេះយើងក៏មានផលិតផលផ្សេងទៀតដូចជា ល្បាយបណ្ដុះកូនដំណាំ ល្បាយដីដាំដំណាំ ស្រកីដូងម៉ត់ កំបោរកសិកម្ម ទឹកខ្មេះឈើ ថ្នាំបណ្ដេញសត្វល្អិតផ្សំពីរុក្ខជាតិជាដើម។ចំណែកតម្លៃ ជីកំប៉ុស្តយើង ១តោន លក់ក្នុងតម្លៃ១៨០ដុល្លា ដោយយើងអាចផលិតបានប្រមាណ ២០តោន ក្នុង១ខែ ដោយក្នុងនោះយើងអាចលក់បានប្រមាណ ៥ ទៅ ១០តោន ក្នុងមួយខែ។ សម្រាប់អតិថិជនគោលដៅរបស់យើង មានទាំងអ្នករស់នៅទីក្រុងភ្នំពេញផ្ទាល់ និងកសិករដែលមានដីដាំឈើហូបផ្លែ បន្លែ ក៏ដូចជាអ្នករៀបចំសួនច្បារតាមខេត្តផ្សេងផងដែរ»។

លោកបន្ថែមថា ក្រៅពីលក់ផលិតផលជីកំប៉ុស្តឱ្យកសិករហើយ ខាងសិប្បកម្មរបស់លោកក៏បានជួយរកទីផ្សារកសិផលឱ្យកសិករដែលប្រើប្រាស់ជីកំប៉ុស្ត និងជីសរីរាង្គរបស់សិប្បកម្ម អាហ្គ្រោណេតឈ័រ ផងដែរ ដោយមានការប្រឹក្សាពីបច្ចេកទេសដាំដុះជូនកសិករ ធ្វើយ៉ាងណាឱ្យការដាំដុះកាន់តែទទួលបានផលល្អ។

គួរបញ្ជាក់ដែរថា អាហ្គ្រោណេតឈ័រ បង្កើតឡើងក្នុងគោលបំណងកាត់បន្ថយការចោលកាកសំណល់ និងកាត់បន្ថយការនាំចូលជីពីបរទេស។ ដើម្បីដំណើរការអាជីវកម្មនេះបាន លោក ចាន់រ៉េត បានចូលរួមក្នុងកម្មវិធីមួយចំននួនដូចជា កម្មវិធីបណ្ដុះថ្នាលឌីជីថល កម្មវិធីពន្លឿនអាជីវកម្ម Dak Dam រៀបចំឡើង Impact hub Phnom Penh Startup award សហការជាមួយ Khmer Enterprise និងកម្មវិធី Global Clean Tech Innovation ជាដើម ដើម្បីទទួលបានការបណ្ដុះបណ្ដាល ការប្រឹក្សា និងទទួលបានដើមទុអាជីវកម្មដើម្បីវិនិយោគបន្ថែមផងដែរ។

ចុងក្រោយ ម្ចាស់អាជីវកម្មរូបនេះក៏មានបំណងចង់ពង្រីកអាជីវកម្មឱ្យកាន់តែធំ បង្កើនការផលិត និងបង្កើតផលិតផលថ្មីៗបន្ថែមទៀត ដែលអាចជួយដោះស្រាយបញ្ហាសំណល់សរីរាង្គ នៅទីក្រុងភ្នំពេញផង និងកាត់បន្ថយការនាំចូលជីពីបរទេសផង៕