សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ បាត់មុខពីពិភពរកស៊ី និងសារព័ត៌មានអស់រយៈពេលជាច្រើនឆ្នាំ លោក Jack Ma ស្ថាបនិកក្រុមហ៊ុនលក់ទំនិញអនឡាញដ៏ធំ Alibaba កាលពីសប្តាហ៍កន្លងទៅនេះ បានបង្ហាញខ្លួនសាជាថ្មីនៅក្នុងកម្មវិធីពាណិជ្ជកម្មមួយរបស់ក្រុមហ៊ុនបុត្រសម្ព័ន្ធរបស់លោកគឺ Ant Group។
ខួបលើកទី២០ឆ្នាំនៃក្រុមហ៊ុន fintech ដ៏ល្បីរបស់ចិនមួយនេះត្រូវបានគេលើកឡើងថាជាព្រឹត្តិការណ៍ទី១ហើយដែលលោក Jack Ma បានចូលរួមគិតចាប់តាំងតែពីពេលដែលោកបានប្រកាសដក Ant Group ចេញពីទីផ្សារលក់ភាគហ៊ុននៅក្នុងទីក្រុងហុងកុង និងសៀងហៃកាលពីឆ្នាំ២០២០ ។
នៅក្នុងសុន្ទរកថាដ៏ខ្លីរបស់លោក Jack Ma ដែលជាស្ថាបនិកម្នាក់របស់ Ant បានអបអរសាទរចំពោះសមិទ្ធផលរបស់ក្រុមហ៊ុន ជាមួយនឹងការបង្ហាញពីភាពជឿជាក់យ៉ាងខ្លាំងចំពោះ Ant Group ដែលនឹងរីកធំធាតុ ល្បីល្បាញទូទាំងសកលលោកនៅក្នុងរយៈពេល២០ឆ្នាំខាងមុខ។
សូមរំលឹកដែរថា បុរសជើងខ្លាំងរូបនេះធ្លាប់បានលាលែងចេញពីតួនាទីនានានៅក្នុង Ant Group ហើយបានព្យាយាមមិនបង្ហាញខ្លួនជាសាធារណៈអស់រយៈពេលជាច្រើនឆ្នាំ។ យ់ាងណាក្តី លោក Ma នៅតែត្រូវបានចាត់ទុកថាជាអ្នកដឹកនាំដ៏មានឥទ្ធិពលបំផុតនៅក្នុងក្រុមអាជីវកម្មទាំងអស់របស់គាត់ដែលគាត់បានបង្កើតឡើង ក៏ដូចជាតំណាងជាមុខមាត់ឲ្យវិស័យឯកជនរបស់ប្រទេសចិនផងដែរ។
នៅក្នុងឱកាសបង្ហាញខ្លួនដ៏កម្រក្នុងព្រឹត្តិការណ៍ខាងលើនេះ លោក Jack Ma ក៏បានធ្វើការបង្ហាញពីការព្យាករណ៍របស់លោកចំពោះបច្ចេកវិទ្យា AI នាពេលអនាគតពាក់ព័ន្ធទៅនឹងការរស់នៅរបស់មនុស្សជាតិផ្សារភ្ជាប់ជាមួយនឹងបច្ចេកវិទ្យាដែលជាតម្រូវការចាំបាច់។
លោកបានពោលបែបនេះថា៖
«កាលពី២០ឆ្នាំមុន អ៊ិនធឺណេតទើបតែចាប់ផ្តើមមានប៉ុណ្ណោះ ដូច្នេះជំនាន់របស់ខ្ញុំគឺជាអ្នកដែលទទួលបានកំណប់ និងទទួលបានឱកាសដ៏អស្ចារ្យពីអ៊ិនធឺណេត។ តាមទស្សនៈរបស់ខ្ញុំនៅពេលបច្ចុប្បន្ននេះជាការផ្លាស់ប្តូរដែលនាំមកដោយបញ្ញាសិប្បនិម្មិតឬ AI ហើយក្នុងរយៈពេល២០ឆ្នាំខាងមុខនឹងអាចទៅហួសពីការស្មានរបស់មនុស្សគ្រប់គ្នា ព្រោះថា AI នឹងនាំមកនូវយុគសម័យដ៏អស្ចារ្យដែលមិនអាចស្មានដល់»។
លោកបានមានប្រសាសន៍ទៀតថា៖ AI នឹងផ្លាស់ប្តូរអ្វីៗគ្រប់យ៉ាង ប៉ុន្តែវាមិនមានន័យថា AI អាចកំណត់អ្វីគ្រប់យ៉ាងនោះទេ ខណៈពេលដែលបច្ចេកវិទ្យាមានសារៈសំខាន់។ ជាចុងក្រោយ លោក Ma ដែលមានអាយុ៦០ឆ្នាំទៅហើយនោះបាននិយាយថា Ant នឹងបន្តប្រើប្រាស់បច្ចេកវិទ្យាដើម្បីនាំមកនូវវឌ្ឍនភាព និងការផ្លាស់ប្តូរដល់ការរស់នៅរបស់មនុស្សក្នុងរយៈពេលពីរទសវត្សរ៍ខាងមុខនេះ៕
Account
Security
Favourite Content