ម៉ាដាមច្នៃ គឺជាហាងលក់វត្ថុអនុស្សាវរីយ៍បែបប្រណិតដែលផលិតចេញពីស្ពាន់ ខណៈដែលរាល់វត្ថុអនុស្សាវរីយ៍គ្រប់ប្រភេទ សុទ្ធតែផលិតឡើង​ដោយដៃ និងឆ្លាក់ចេញជាក្បាច់ផ្សេងៗដែលតំណាងឱ្យកេរតំណែលរបស់ខ្មែរ។

ហាងមួយនេះត្រូវបានបង្កើតឡើងនៅអំឡុងឆ្នាំ២០១៩ ចំពេលដែលជំងឺកូវីដកំពុងរីករាលដាលខ្លាំង ប៉ុន្តែដោយទឹកចិត្តស្រឡាញ់ចំពោះ​ការងារ​នេះ ព្រមទាំងមានគ្រួសារជាជាងចម្លាក់ស្រាប់ផងនោះ ស្ត្រីម្នាក់បានជំនះ និងរិះរកគ្រប់វិធីដើម្បីឱ្យអាជីវកម្ម​របស់ខ្លួនអាច​ឆ្លងផុតវិបត្តិ​សកល​លោកនោះ។

អ្នកស្រី ឈឿន ពុទ្ធារី ម្ចាស់ហាងលក់វត្ថុអនុស្សាវរីយ៍ «ម៉ាដាមច្នៃ» បានលើកឡើងឱ្យដឹងថា ដើម្បីអាចទ្រទ្រង់អាជីវកម្មបាន អ្នកស្រីបានជ្រើស​រើស​យកវិធីបង្វិលទុន ដែលលុះ​ត្រាតែមាន​ការ​កម្មង់ទិញទើបអ្នកស្រីឱ្យជាងធ្វើ ឬផលិត។ ម្យ៉ាងទៀត អ្នកស្រីតម្រូវឱ្យអតិថិជនបង់ប្រាក់កក់មុន​ពាក់កណ្ដាល ដើម្បីអ្នកស្រីអាចយក​ប្រាក់​នោះ​ទៅបន្តធ្វើការងារទៀត។

សម្រាប់អ្នកស្រី នេះមិនមែនជាអាជីវកម្មដែលអាចជោគជ័យ ត្រចះត្រចង់​ និងអាចរកចំណូល​ឱ្យអ្នក​ស្រីក្នុងចំនួនច្រើននោះទេ ប៉ុន្តែវាជាការ​ផ្ដោត​ការយកចិត្តទុកដាក់លើផលប្រយោជន៍សង្គមមួយផ្នែក។ ជាក់ស្ដែង តាមរយៈអាជីវកម្មរបស់អ្នកស្រី ប្រជាសហគមន៍ដែលមាន​វ័យ​ចំណាស់ និងមិនមានចំណូលចូលគ្រួសារអាចទទួលបានឱកាស​ការងារជា​ប្រចាំ។ មិនត្រឹមតែប៉ុណ្ណោះ ក្មេងៗជំនាន់ក្រោយដែលមិនមាន​ឱកាសសិក្សាអប់រំបានវែងឆ្ងាយក៏អាចរៀនពីជំនាញនេះផងដែរ។ អ្វីដែលសំខាន់បំផុតសម្រាប់អាជីវកម្មអ្នកស្រី គឺក្បាច់បុរាណដែលទាក់​ទង​នឹងវប្បធម៌ អរិយធម៌ខ្មែរ ដែលអ្នកស្រី និងបុគ្គលិកបានឆ្លាក់ជាប់នៅលើស្ពាន់ទាំងនោះ។ ការកែច្នៃផលិតផលនីមួយៗ គឺទាមទារការយក​ចិត្ត​ទុកដាក់ផ្ចិតផ្ចង់យ៉ាងខ្លាំងទម្រាំអាចបានផលិតផលនីមួយៗ។

ការច្នៃចេញជាផ្ការំដួល ថូផ្កា ដែលមានក្បូក្បាច់រចនា រូបរាងផ្លែឈើរបស់ខ្មែរ រូបរាងសត្វផ្សេងៗ និងផ្ទាំងស៊ុមសម្រាប់​ដាក់តាំងផ្ទះ​ដោយមានរូប​ប្រាសាទ​អង្គរវត្តជាដើម តែងតែផ្ទុះការចាប់អារម្មណ៍ ច្រើនពីបណ្ដាអ្នកប្រើប្រាស់បណ្ដាញសង្គម។

តាមរយៈ​ស្នាដៃទាំងនេះរបស់អ្នកស្រី គឺបានបង្ហាញពីភាពប្រណិតនៃផលិតផលនីមួយៗ ជាពិសេស ពីភាពច្នៃប្រឌិតរបស់អ្នកឆ្លាក់ ក្នុងការដាក់​បញ្ចូលនូវក្បាច់ភ្ញីខ្មែរចូលទៅក្នុងស្ពាន់ទាំងនោះ ហើយទម្រាំអាចទទួលបានវត្ថុអនុស្សាវរីយ៍មួយៗគឺត្រូវការចំណាយពេលវេលាច្រើន។ ប្រសិន​បើជារបស់នោះតូចល្មមទេ វាត្រូវការពេលពី ៤ថ្ងៃទៅ ១សប្ដាហ៍ ប៉ុន្តែបើរបស់នោះធំ ហើយមានក្បាច់ច្រើន អាចចំណាយពេល​រហូត​ដល់​៣ខែ។

សម្រាប់បច្ចុប្បន្ន អាជីវកម្មរបស់អ្នកស្រីថ្វីត្បិតថានៅក្មេងខ្ចីនៅឡើយ ក៏ប៉ុន្តែវាបានសម្រេចបំណងដ៏ធំ​របស់អ្នកស្រីជាបណ្ដើរៗ គឺការធ្វើឱ្យក្មេង​ជំនាន់ក្រោយបានស្គាល់ពីភាពសម្បូរបែបនៃចម្លាក់ខ្មែរ។ លើសពីការរំពឹងទុក អាជីវកម្មរបស់អ្នកស្រីក៏មានការជាវទិញច្រើន ដែលគោល​បំណង​នៃការទិញគឺយកទៅដាក់តាំងលម្អផ្ទះ ហាង ឬទីតាំងផ្សេងៗ និងជូនជាកាដូដល់មនុស្សជាទីស្រលាញ់ជាដើម។

មិនថាក្នុងរូបភាពណា​ អ្នកស្រីមានការសប្បាយចិត្តដែលអាជីវកម្មអ្នកស្រីបានចូលរួមជួយផ្សព្វផ្សាយ វប្បធម៌ខ្មែរដល់សាធារណៈជនបានស្គាល់ បានយល់ដឹងកាន់តែទូលំទូលាយ៕