សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងវិនិយោគធំមួយក្នុងខេត្តក្រចេះ ដែលមានទុនវិនិយោគរហូតដល់៣៥០លានដុល្លារអាមេរិក ត្រូវបានទទួលការគាំទ្រពីរាជរដ្ឋាភិបាលតាមរយៈកម្មវិធីពិសេសជំរុញការវិនិយោគ ដោយក្រុមការងារជំរុញការវិនិយោគខេត្តទាំងបួនក្នុងភូមិភាគឦសានបានប្រជុំពិភាក្សាសម្រួលនីតិវិធីធ្វើយ៉ាងណាឱ្យការវិនិយោគរបស់គម្រោងនេះទៅមុខដោយរលូន ។
បើតាមសេចក្ដីប្រកាសព័ត៌មានរបស់ក្រុមការងារជំរុញការវិនិយោគក្នុងភូមិភាគឦសានបានឱ្យដឹងថានៅថ្ងៃទី២៧ ខែវិច្ឆិកា ឆ្នាំ២០២៥ ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី, រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចប្រជុំពិភាក្សាលើយន្តការ និង កិច្ចសម្របសម្រួលនីតិវិធីក្នុងការសាងសង់ពង្រីកផ្លូវនៃគម្រោងវិនិយោគបង្កើតរោងចក្រផលិតស៊ីម៉ងត៍ និង ជំរុញការអភិវឌ្ឍហេដ្ឋារចនាសម្ព័ន្ធ របស់ក្រុមហ៊ុន ខេ.ភី ស៊ីមេន អ៊ិនដាសស្រ្ទី ឯ.ក ក្នុងខេត្តក្រចេះ ដោយមានការអញ្ជើញចូលរួមពី តំណាងក្រសួង-ស្ថាប័នពាក់ព័ន្ធ, រដ្ឋបាលខេត្តក្រចេះ និង មន្ត្រីជំនាញពាក់ព័ន្ធ ។
នៅក្នុងសេចក្ដីប្រកាសព័ត៌មានដដែលនេះបានឱ្យដឹងថា ការសាងសង់ផ្លូវនេះ គឺជាផ្នែកមួយនៃគម្រោងវិនិយោគពហុវិស័យរបស់ក្រុមហ៊ុន ខេ.ភី ស៊ីមេន អ៊ិនដាសស្ទី្រ ឯ.ក ក្នុងខេត្តក្រចេះ ដែលរួមមាន ការផលិតស៊ីម៉ងត៍, ការបង្កើតតំបន់សេដ្ឋកិច្ចពិសេស, ការកសាងកំពង់ផែពហុបំណង និង អាជីវកម្មពាក់ព័ន្ធផ្សេងទៀត ក្នុងទំហំទុនវិនិយោគសរុបចំនួន ៣៥០ លានដុល្លារអាមេរិក ។
ឯកឧត្តមបណ្ឌិតសភាចារ្យ បានលើកឡើងអំពីសារសំខាន់នៃ “យន្តការច្រកចេញចូលតែមួយ” ដែលគ្រប់ភាគីពាក់ព័ន្ធ ត្រូវចូលរួមសម្រេចរួមគ្នា ក្នុងក្របខណ្ឌនៃក្រុមការងារការវិនិយោគក្នុងភូមិភាគឦសាន ក្នុងអភិក្រមជវភាពនៃប្រព័ន្ធតួអង្គតែមួយ ដើម្បីផ្តល់ការសម្របសម្រួល និង ពន្លឿននីតិវិធីចាំបាច់ ជាអតិបរមា ដោយយោងតាមច្បាប់ជាធរមាន ដើម្បីផ្តល់ភាពកក់ក្តៅ និង ទំនុកចិត្ត ដល់វិនិយោគិន ដែលតែងតែទាមទារនូវប្រសិទ្ធភាព ល្បឿន និង តម្លាភាពនៃនីតិវិធី ។
នៅក្នុងអង្គប្រជុំស្វាគមន៍ និង គាំទ្រការសាងសង់ផ្លូវ ពីទីតាំងរោងចក្រស៊ីម៉ង់ត៍ ទៅកាន់ទីតាំងកំពង់ផែ ស្ថិតក្នុងស្រុកព្រែកប្រសប់ ដោយក្រុមហ៊ុនត្រូវអនុវត្តតាមច្បាប់ និង បទដ្ឋានបច្ចេកទេសនៃការសាងសង់ផ្លូវ រួមទាំងការប្រើប្រាស់កម្លាំងពលកម្មខ្មែរជាអតិបរិមា ព្រមទាំងលក្ខខណ្ឌផ្សេងទៀត តាមការចាំបាច់ ។
ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ បានថ្លែងប្រាប់សារព័ត៌មាន AMS កាលពីពេលថ្មីៗនេះថា គម្រោងវិនិយោគលើរោងចក្រផលិតស៊ីម៉ង់ត៍ ការបង្កើតតំបន់សេដ្ឋកិច្ចនិងកំពង់ផែពហុបំណងនេះ គឺជាគម្រោងដែលធំជាងគេក្នុងខេត្តក្រចេះ នាពេលនេះ ហើយរដ្ឋាភិបាលខេត្តក្រចេះ ក៏បានសហការជាមួយនឹងក្រុមការងារជំរុញការវិនិយោគក្នុងភូមិភាគឦសានលើការគាំទ្ររាល់ដំណើរការនៃការវិនិយោគ ដើម្បីឱ្យគម្រោងវិនិយោគនោះដំណើរការដោយរលូនស្របតាមបំណងរបស់រាជរដ្ឋាភិបាល ។
គួរបញ្ជាក់ថា កម្មវិធីពិសេសជំរុញការវិនិយោគក្នុងខេត្តទាំងបួនក្នុងភូមិភាគឦសានត្រូវបានរាជរដ្ឋាភិបាលប្រកាសដាក់ឱ្យអនុវត្តន៍កាលពីអំឡុងខែមេសា ឆ្នាំ ២០២៥ ដើម្បីជំរុញការវិនិយោគក្នុងខេត្តនៅភូមិភាគឦសានដែលរួមមាន ខេត្តក្រចេះ ស្ទឹងត្រែង មណ្ឌលគិរី និងរតនគិរី ដោយផ្ដោតលើវិស័យកសិកម្មកសិ-ឧស្សាហកម្ម និងវិស័យទេសចរណ៍ ៕
Account
Security
Favourite Content